അഹമ്മദാബാദ്ഃ പ്രണയത്തിന്റെ പേരില്‍ യുവാവിനെ മരത്തില്‍ കെട്ടിയിട്ട് പെണ്‍കുട്ടിയുടെ വീട്ടുകാര്‍ ക്രൂരമായി കൊലപ്പെടുത്തി. വീട്ടില്‍ നിന്ന് പുറത്തേക്ക് വലിച്ചിഴച്ച ശേഷം മരത്തില്‍ കെട്ടിയിട്ടായിരുന്നു മര്‍ദനം. സ്വകാര്യഭാഗത്ത് ഉള്‍പ്പെടെ ക്രൂരമായ ആക്രമണത്തിന് വിധേയനായ യുവാവിനെ ഉടന്‍ തന്നെ ആശുപത്രിയിലെത്തിച്ചെങ്കിലും രക്ഷിക്കാനായില്ല.
ഗുജറാത്തിലെ പദ്ര താലൂക്കിലാണ് സംഭവം. 20 വയസ്സുകാരനായ ജയേഷ് റാവലാണ് കൊല്ലപ്പെട്ടത്. ദിവസവേതനത്തിന് പണിയെടുക്കുന്ന തൊഴിലാളിയാണ് ജയേഷ്. അയാള്‍ സ്‌നേഹിക്കുന്ന ആരതി എന്ന പെണ്‍കുട്ടിയുടെ വീട്ടുകാരാണ് ജയേഷിനെ ക്രൂരമായി കൊലപ്പെടുത്തിയതെന്ന് പോലീസ് പറയുന്നു. ഉച്ചയ്ക്ക് വീടിനു പുറത്തേക്ക് വലിച്ചിഴച്ചതിനു ശേഷമായിരുന്നു മര്‍ദനം.
രണ്ടുമാസം മുന്‍പ് ആരതിയുടെ വീട്ടുകാര്‍ ജയേഷിനെ താക്കീത് ചെയ്തിരുന്നു. ബന്ധം തുടരുകയാണെങ്കില്‍ വ്യാപകമായ പ്രത്യാഘാതങ്ങള്‍ നേരിടേണ്ടി വരുമെന്ന് ഭീഷണിയും നല്‍കിയിരുന്നു. ബുധനാഴ്ച ജയേഷും ആരതിയും സംസാരിക്കുന്നത് പെണ്‍കുട്ടിയുടെ അമ്മ കാണുകയും വീട്ടുകാരോട് കാര്യം പറയുകയുമായിരുന്നു. പെണ്‍കുട്ടിയുടെ അമ്മ കണ്ടതോടെ ജയേഷ് ഓടി. എന്നാല്‍ വിട്ടില്‍ നിന്ന് പുഞത്തേക്ക് വലിച്ചിഴച്ച് സാരി ഉടുപ്പിച്ച ശേഷം മരത്തില്‍ കെട്ടിയിട്ടായിരുന്നു മര്‍ദനം. യുവാവ് കേണപേക്ഷിച്ചുവെങ്കിലും അതിനൊന്നും ചെവി കൊടുക്കാന്‍ പെണ്‍കുട്ടിയുടെ വീട്ടുകാര്‍ തയാറായില്ല എന്നാണ് പോലീസ് പറയുന്നത്.
സംഭവത്തില്‍ ജയേഷിന്റെ അമ്മയുടെ പരാതിയില്‍ പെണ്‍കുട്ടയുടെ നാലു ബന്ധുക്കള്‍ക്കെതിരെ പോലീസ് കേസെടുത്ത് അന്വോഷണമാരംഭിച്ചു. പ്രതികളെ പോലീസ് അറസ്റ്റ് ചെയ്തതായി അറിയിച്ചു.
Comments