200 ഡിഗ്രി ചൂടില്‍ തിളച്ചുമറിയുന്ന ജലാശയത്തില്‍ വീണു യുവാവ് വെന്തു മരിച്ചു; ദൃശ്യം സഹോദരി മൊബൈലില്‍ പകര്‍ത്തി

അമേരിക്കയിലെ യെല്ലോ സ്‌റ്റോണ്‍ നാഷണല്‍ പാര്‍ക്കിലെ കടുത്ത ചുട് പ്രവഹിക്കുന്ന ജലാശയത്തില്‍ വീണ് യുവാവ് വെന്തു മരിച്ചു. കോളിന്‍ നതാനിയേല്‍ സ്‌കോട്ട് എന്ന 23 കാരനായിരുന്നു ദുരന്തത്തിന് ഇരയായത്. ഒപ്പമുണ്ടായിരുന്ന സഹോദരിയുടെ കണ്‍മുമ്പില്‍ വെച്ചായിരുന്നു എല്ലാം നടന്നത്. എല്ലാം ആകസ്മികമായി യുവതി മൊബൈലില്‍ പകര്‍ത്തുകയും ചെയ്തു. മൃതദേഹം എടുക്കാനായി എത്തിയവര്‍ക്ക് പൊടിപോലും കണ്ടെത്താനും കഴിഞ്ഞില്ല.

ആവി പൊന്തുന്ന 200 ഡിഗ്രിയോളം ചൂടുള്ള കുളത്തില്‍ വെള്ളത്തിന്റെ ചൂട് പരിശോധിക്കാനായി ശ്രമിക്കുമ്പോള്‍ വീണു പോകുകയായിരുന്നു. 'ഹോട്ട് പോട്ടിംഗ്' എന്നറിയപ്പെടുന്ന വസന്തകാല ചൂടന്‍ പ്രകൃതി കുളിയുമായി ബന്ധപ്പെട്ടാണ് രണ്ടുപേരും ഇവിടെ എത്തിയത്.

തുടര്‍ന്ന് കോളിന്‍ വെള്ളത്തിന്റെ ചൂട് പരിശോധിക്കുമ്പോള്‍ തെന്നിവീഴുകയായിരുന്നു. പാര്‍ക്കിലെ ജോലിക്കാരും രക്ഷാ പ്രവര്‍ത്തകരും ഓടിയെത്തിയെങ്കിലും ഇയാള്‍ മരിച്ചിരുന്നു. ഏറെ ശ്രമിച്ചെങ്കിലും മൃതദേഹം പോലും എടുക്കാന്‍ കഴിഞ്ഞില്ല. തുടര്‍ന്ന ശക്തിയേറിയ ഇടിമിന്നല്‍ ഉണ്ടാകുകയും ചെയ്തു. എന്നാല്‍ പിറ്റേന്ന് മൃതദേഹം വീണ്ടും നോക്കാന്‍ എത്തിയപ്പോഴാകട്ടെ ഒന്നും അവശേഷിച്ചുമില്ല.

കടുത്ത ചൂടുള്ള ഇവിടെ വെള്ളം ആസിഡിന് തുല്യമാണെന്നാണ് ഉദ്യോഗസ്ഥര്‍ പറഞ്ഞത്. മൊബൈലില്‍ കോളിന്റെ സഹോദരി എല്ലാം പകര്‍ത്തുന്നുണ്ടായിരുന്നു. എന്നാല്‍ കോളിന്റെ ബന്ധുക്കളെ മാനിച്ച് ദൃശ്യങ്ങള്‍ പുറത്തുവിടാന്‍ അധികൃതര്‍ തയ്യാറായില്ല. 1890 ല്‍ കണ്ടെത്തിയത് മുതല്‍ യെല്ലോസ്‌റ്റോണില്‍ ഇതുവരെ 22 പേര്‍ സമാനഗതിയില്‍ ആവിക്കുളത്തില്‍ വീണു മരിച്ചിട്ടുണ്ട്. അമേരിക്കന്‍ സ്‌റ്റേറ്റായ വ്യോമിംഗില്‍ 3,500 ചതുരശ്ര മൈലിലായി വ്യാപിച്ചു കിടക്കുന്ന യെല്ലോസ്‌റ്റോണ്‍ നാഷണല്‍ പാര്‍ക്ക് അസാധാരണ ഭൗമ വൈവിദ്ധ്യങ്ങള്‍ കൊണ്ട് സമ്പന്നമാണ്. ഈര്‍പ്പമുള്ള കാട്, അപ്രതീക്ഷിത ജലപ്രവാഹങ്ങള്‍, വെള്ളച്ചാട്ടം, ആവി പൊന്തുന്ന അരുവികള്‍, ഉഷ്ണജല സ്രോതസ് എന്നിവയെല്ലാം ഇവിടെയുണ്ട്.