ഉണ്ണി മുകുന്ദന് നായകനാകുന്ന മലയാളം ത്രില്ലർ ചിത്രം മേപ്പടിയാൻ ഇന്നാണ് റിലീസ് ചെയ്തത്. നവാഗതനായ വിഷ്ണു മോഹന് സംവിധാനം ചെയ്ത ‘മേപ്പടിയാന്’ മൂന്ന് വര്ഷത്തെ ഇടവേളയ്ക്കു ശേഷം ഉണ്ണി മുകുന്ദൻ നായകനായെത്തുന്ന ചിത്രമാണ്. മികച്ച പ്രതികരണമാണ് ചിത്രത്തിന് ലഭിക്കുന്നത്. ഉണ്ണി മുകുന്ദന് വേറിട്ട വേഷത്തിലെത്തിയ ചിത്രം എന്നാണ് പ്രേക്ഷകരുടെ അഭിപ്രായം. നിർമ്മാതാവ് എന്ന നിലയിൽ ഉണ്ണി മുകുന്ദന്റെ ആദ്യ പ്രൊജക്റ്റ് കൂടിയാണിത്. ഉണ്ണി മുകുന്ദൻ ഫിലിംസിന്റെ ബാനറിലാണ് ചിത്രമെത്തുന്നത്. ഇപ്പോഴിതാ സിനിമ കണ്ട് പുറത്തിറങ്ങുന്ന ഉണ്ണി മുകുന്ദന് പ്രേക്ഷകപ്രതികരണം കണ്ട് വളരെ ഇമോഷണലായി പൊട്ടിക്കരഞ്ഞിരിക്കുകയാണ്. ‘‘ എന്നെ സംബന്ധിച്ച് ഇത് വലിയൊരു ചലഞ്ചാണ്. തിയേറ്ററില് കൈയടി കിട്ടിയപ്പോള് കുറച്ച് ഇമോഷണലായി.’’ എന്നാണ് ഉണ്ണി മുകുന്ദന് മാധ്യമങ്ങളോട് പറഞ്ഞു തുടങ്ങിയത്.
172 സ്ക്രീനുകളിലാണ് ചിത്രം പ്രദർശനത്തിന് എത്തിയത്, ഉണ്ണി മുകുന്ദന് ഫിലിംസിന്റെ ബാനറില് നിര്മ്മിക്കപ്പെടുന്ന ചിത്രം തിയേറ്ററുകളിലെത്തിക്കുന്നത് ഗുഡ്വില് എന്റര്ടെയ്ന്മെന്റസ് ആണ്. ജയകൃഷ്ണന് എന്ന കഥാപാത്രത്തിനുവേണ്ട ശാരീരികമായ മേക്കോവറിനായി മറ്റു സിനിമാ തിരക്കുകളില് നിന്നും ഉണ്ണി ഇടവേള എടുത്തിരുന്നു. അഞ്ജു കുര്യന് ആണ് ചിത്രത്തിലെ നായിക. സൈജു കുറുപ്പ്, അജു വര്ഗീസ്, ഇന്ദ്രന്സ്, കോട്ടയം രമേശ്, നിഷ സാരംഗ്, ശങ്കര് രാമകൃഷ്ണന്, കലാഭവന് ഷാജോണ്, അപര്ണ്ണ ജനാര്ദ്ദനന്, ജോര്ഡി പൂഞ്ഞാര്, കുണ്ടറ ജോണി, മേജര് രവി, ശ്രീജിത്ത് രവി, പൗളി വില്സണ്, കൃഷ്ണ പ്രദാസ്, മനോഹരി അമ്മ തുടങ്ങി വലിയ താരനിരയും അണിനിരക്കുന്ന ചിത്രമാണിത്. നീല് ഡി കുഞ്ഞയാണ് ഛായാഗ്രഹണം നിര്വ്വഹിച്ചിരിക്കുന്നത്.
Comments