യുവജനോത്സവ വേദിയില് നിന്നും സിനിമയിലേക്കെത്തി താരമായി മാറിയ പ്രേക്ഷകരുടെ പ്രിയപ്പെട്ട അഭിനേത്രികളിലൊരാളാണ് നവ്യ നായര്. ‘ഇഷ്ടം’ എന്ന സിനിമയിലൂടെ വെള്ളിത്തിരയില് അരങ്ങേറ്റം കുറിച്ച നവ്യയ്ക്ക് അഭിനേത്രി എന്ന നിലയില് കൂടുതല് അംഗീകാരം കിട്ടിയത് രഞ്ജിത്ത് സംവിധാനം ചെയ്ത ‘നന്ദനം’ എന്ന സിനിമയിലൂടെയാണ്. സിനിമയില് നിറഞ്ഞു നിന്നിരുന്ന നവ്യ വിവാഹത്തോടെ വെള്ളിത്തിരയില് നിന്ന് ഇടവേളയെടുത്തിരുന്നു. എന്നാല് സിനിമയില് സജീവമല്ലെങ്കില്ക്കൂടിയും സോഷ്യല് മീഡിയയിലൂടെ മികച്ച സ്വീകാര്യതയും പിന്തുണയുമാണ് താരത്തിന് ലഭിച്ചുകൊണ്ടിരിക്കുന്നത്. സോഷ്യല് മീഡിയയില് സജീവമായ താരത്തിന്റെ ചിത്രങ്ങളും വീഡിയോയുമൊക്കെ ക്ഷണനേരം കൊണ്ടാണ് വൈറലാകുന്നത്. ഇപ്പോഴിതാ നവ്യ പങ്കുവച്ചിരിക്കുന്നത് പഴയകാല സൂപ്പര്ഹിറ്റ് നടിയായ ഷീലയ്ക്കൊപ്പമുള്ള ചിത്രമാണ്. ചിത്രത്തില് രണ്ടുപേരെയും പട്ടു സാരിയിലാണ്. നവ്യയ്ക്കൊപ്പം തന്നെ സുന്ദരിയായി ഷീലാമ്മയെയും കാണാം. ‘‘എക്കാലത്തെയും സുന്ദരിയും കഴിവുറ്റതുമായ ഷീലാമ്മ .. മലയാള സിനിമയിലെ സ്ത്രീ കാലഘട്ടത്തിലെ രാജ്ഞി ...’’ എന്ന ക്യാപ്ഷനും നല്കിയാണ് നവ്യ ചിത്രം പങ്കുവച്ചിരിക്കുന്നത്.
വിവാഹത്തിനു ശേഷം അഭിനയ ജീവിതത്തിൽ നിന്നും വിട്ടുനിന്ന നവ്യാനായർ ഇപ്പോൾ നൃത്ത പരിപാടികളിലും ടെലിവിഷൻ പരിപാടികളിലും സജീവമാണ്. ദൃശ്യത്തിന്റെ കന്നഡ പതിപ്പിന്റെ രണ്ടു ഭാഗത്തും നായികയായി എത്തിയത് നവ്യയായിരുന്നു. ‘ഒരുത്തീ’ എന്ന സിനിമയാണ് നവ്യയുടേതായി മലയാളത്തില് വരാനുള്ള സിനിമ.
