ഒരു കുടുംബത്തിന് ഏറ്റവും പ്രയാസമനുഭവിക്കുന്ന കാര്യമാണ് ഓട്ടിസമുള്ള കുഞ്ഞിനെ വളര്ത്തിയെടുക്കുക എന്നത്. മുന്കാലങ്ങളെ അപേക്ഷിച്ച് ഓട്ടിസമുള്ള കുഞ്ഞുങ്ങളെ സഹായിക്കാന് ഇന്ന് നമുക്ക് സാധിക്കും.
'ഓട്ടിസം' ഒരു അസുഖമല്ല, അത് ഒരു അവസ്ഥയാണ്. നമ്മുടെ സമൂഹത്തിന് ഓട്ടിസത്തെക്കുറിച്ച് അറിവു നല്കുവാനും ഓട്ടിസമുള്ള കുട്ടികളെ സമൂഹം ഒറ്റപ്പെടുത്തുകയല്ല ചെയ്യേണ്ടതെന്നും അവരെ നമ്മളില് ഒരാളായി കാണണമെന്ന വലിയ സന്ദേശം ജനങ്ങളില് എത്തിക്കുകയെന്ന ലക്ഷ്യത്തോടെയും എല്ലാ വര്ഷവും ഏപ്രില് 2 ന് 'ഓട്ടിസം ബോധവത്കരണ ദിനം' ആയി ലോകമെമ്പാടും ആചരിക്കുന്നു.
സ്വഭാവത്തില് നിന്നും തിരിച്ചറിയാം
കുട്ടികളുടെ ബുദ്ധിവികാസവുമായി ബന്ധപ്പെട്ട മാനസിക വ്യതിയാനമാണ് ഒട്ടിസം. ജനനസമയത്തെ ആദ്യനാളുകളില് ഓട്ടിസം കണ്ടുപിടിക്കാന് സാധിക്കുകയില്ല. ഓട്ടിസം ഒരു കുഞ്ഞിന് ഉണ്ട് എന്ന് മനസിലാക്കുന്നത് അവരുടെ സ്വഭാവത്തിലൂടെയാണ്. ഓട്ടിസം കുട്ടികള് ദൈനംദിന ജീവിതത്തില് പ്രകടിപ്പിക്കുന്ന ചില ലക്ഷണങ്ങള് അവരെ മറ്റു കുഞ്ഞുങ്ങളില് നിന്നും വ്യത്യസ്തരാക്കുന്നു. ആണ്കുട്ടികളിലാണ് ഓട്ടിസം കൂടുതലായി കണ്ടുവരുന്നത്. തലച്ചോറിന്റെ ഘടനയിലും പ്രവര്ത്തനത്തിലുമുള്ള അസാധാരണത്വമാണ് ഓട്ടിസം ഉണ്ടാകുന്നത്.
സാമൂഹികപരവും ആശയവിനിമയപവും ബുദ്ധിപരവുമായും പ്രശ്നങ്ങള് സൃഷ്ടിക്കുന്ന 'ഓര്ഗാനിക്ക് ന്യൂറോഡെവലപ്മെന്റല് ഡിസോഡര്' ആണ് ഓട്ടിസം. ഓട്ടിസമുള്ള കുട്ടികളുടെ പ്രശ്നങ്ങള് മനസിലാക്കി അവരുടെ കഴിവുകള് വളത്തിയെടുക്കുവാന് അവരുടെ മാതാപിതാക്കള്ക്ക് 'ഓട്ടിസം' എന്ന അവസ്ഥയെക്കുറിച്ച് പൂര്ണ ബോധവത്കരണം നല്കേണ്ടതുണ്ട്.
നിരീക്ഷണത്തിലൂടെ തിരിച്ചറിയാം
ഓട്ടിസത്തിന്റെ ലക്ഷണങ്ങള് ഓരോ കുട്ടിയിലും വ്യതസ്തമായിരിക്കും. മൂന്ന് വയസിനുള്ളില് കുട്ടിക്ക് ഓട്ടിസം ഉണ്ടോ എന്ന് തിരിച്ചറിയാന് സാധിക്കും. കുഞ്ഞുങ്ങളുടെ വളര്ച്ചയും ബുദ്ധിവികാസവും ശരിയായ രീതിയില് നടക്കുന്നുവെന്ന് എല്ലാ മാതാപിതാക്കളും നിര്ബന്ധമായും ഉറപ്പുവരുത്തേണ്ടതാണ്. കാരണം, കൃത്യമായി കുഞ്ഞുങ്ങളെ നിരീക്ഷിക്കാത്തതുകൊണ്ട് മാത്രം ഓട്ടിസമുള്ള കുഞ്ഞുങ്ങള്ക്ക് ശരിയായ രീതിയില് ശരിയായ ചികിത്സ ലഭിക്കാതെ പോകും. കുട്ടിയില് ഓട്ടിസത്തിന്റെ ലക്ഷണങ്ങള് നേരത്തെ കണ്ടുപിടിക്കുകയും തുടര്ച്ചയായി ഇവരുടെ കാര്യത്തില് ശരിയായ രീതിയില് ഇടപെടുകയുമാണെങ്കില് ഇത്തരം കുട്ടികള്ക്ക് മെച്ചപ്പെട്ട പുരോഗതി ഉണ്ടാകാന് കാരണമാകും. ശൈശവത്തില് തന്നെ കുട്ടികളുടെ പെരുമാറ്റരീതികള് നിരീക്ഷിച്ചാല് അവരില് ഓട്ടിസത്തിന്റെ ലക്ഷണങ്ങള് ഉണ്ടോയെന്ന് കണ്ടെത്താന് കഴിയും.
പ്രധാന അടയാളങ്ങള്
- ഓട്ടിസം ബാധിച്ച കുട്ടികള് ആദ്യകാലങ്ങളില് മറ്റുള്ളവരുടെ കണ്ണില് നോക്കുകയോ ഇടപഴകുകയോ ചെയ്യില്ല. ഇത്തരം സ്വഭാവവൈകല്യമുള്ളവര് ഒന്നിനോടും താല്പ്പര്യം കാണിക്കാതെയും സംരക്ഷകരോട് സ്നേഹത്തോടെ പ്രതികരിക്കാതെയും ഇരിക്കും. അച്ഛനമ്മമാരോടും മറ്റു വേണ്ടപ്പെട്ടവരോടും ആടുപ്പമോ പരിചയത്തോടെ ചിരിക്കുകയോ ഇല്ല. ഓട്ടിസമുള്ള കുട്ടികളില് കണ്ടുവരുന്ന മറ്റൊരു പ്രധാന ലക്ഷണമാണ് സംസാര വൈകല്യം. ചില വാക്കുകള് ആവശ്യമില്ലാത്ത സന്ദര്ഭങ്ങളില് ആവര്ത്തിച്ചു പറയുന്ന പ്രത്യേകതയും ഇവരില് കാണാറുണ്ട്. സംസാരശേഷി ആദ്യം വളരുകയും പിന്നീട് പെട്ടെന്ന് സംസാരം കുറയുന്നതായും കാണാം. ചില കുട്ടികള് തങ്ങളോട് ആരെങ്കിലും സംസാരിക്കുമ്പോള് അവരെ ശ്രദ്ധിക്കുകയില്ല. എന്നാല് ഒരു വിഭാഗം കുട്ടികള് പരിചിതരോടും അപരിചിതരോടും ഒരുപോലെ അടുപ്പം പ്രകടിപ്പിക്കുകയും ചെയ്യാറുണ്ട്. മറ്റുള്ളവര് തന്റെ അടുത്തേക്ക് വരുന്നതോ പോകുന്നതോ അറിയാത്തതായി ഭാവിക്കുന്നു.
