തിരുവനന്തപുരം: സിപിഐഎം രാജ്യസഭാ സ്ഥാനാര്ത്ഥിയായി ഡിവൈഎഫ്ഐ അഖിലേന്ത്യാ അധ്യക്ഷന് എഎ റഹീമിനെ തീരുമാനിച്ചു. ഇന്ന് രാവിലെ ചേര്ന്ന സിപിഐഎം അവെയിലബിള് സെക്രട്ടറിയേറ്റ് യോഗത്തിലാണ് തീരുമാനം.
സിപിഐഎം ഔദ്യോഗിക വാര്ത്താക്കുറിപ്പിലാണ് അറിയിച്ചത്.
നിലവില് പാര്ട്ടിയുടെ കണ്ണൂര് ജില്ലാ സെക്രട്ടറിയും സംസ്ഥാന കൗണ്സില് അംഗവുമായ അഡ്വ. പി സന്തോഷ് കുമാറാണ് സിപിഐയുടെ രാജ്യസഭാ സ്ഥാനാര്ത്ഥി. സംസ്ഥാനത്ത് തെരഞ്ഞെടുപ്പ് നടക്കുന്ന മൂന്ന് സീറ്റുകളില് രണ്ടെണ്ണം എല്ഡിഎഫിന് വിജയിക്കാന് കഴിയും. ഇതിലൊന്ന് സിപിഐയ്ക്ക് നല്കാന് നേരത്തെ എല്ഡിഎഫ് യോഗത്തില് ധാരണയായിരുന്നു. കേരളത്തിന് പുറമെ പഞ്ചാബില് അഞ്ച്, അസമില് രണ്ട്, ഹിമാചല് പ്രദേശ്, ത്രിപുര, നാഗലാന്റ് എന്നീ സംസ്ഥാനങ്ങളില് ഒരോ സീറ്റുകളിലേക്കുമാണ് തെരഞ്ഞെടുപ്പ് നടക്കുക.
13 രാജ്യ സഭാ സീറ്റുകളിലേക്കുള്ള തെരഞ്ഞെടുപ്പ് മാര്ച്ച് 31നാണ് നടക്കുന്നത്. ഈ മാസം 14 ന് തെരഞ്ഞെടുപ്പ് വിജ്ഞാപനം ഇറങ്ങുക 21 വരെ സ്ഥാനാര്ത്ഥികള്ക്ക് നാമനിര്ദേശ പത്രിക സമര്പ്പിക്കാം.
