ഇന്ത്യന് വിപണിയില് ഇറ്റാലിയന് സൂപ്പര് ബൈക്ക് നിര്മാതാക്കള് ഡ്യുക്കാട്ടി ഇപ്പോള് സ്ക്രാംബ്ലര് 1100 ട്രിബ്യൂട്ട് പ്രോയെ അവതരിപ്പിച്ചിരിക്കുകയാണ്. 12.89 ലക്ഷം രൂപയാണ് വാഹനത്തിന്റെ എക്സ്ഷോറൂം വില. പുതിയ 2022 ഡ്യുക്കാട്ടി സ്ക്രാംബ്ലര് ട്രിബ്യൂട്ട് 1100 പ്രോ ഒരു പ്രത്യേക മോട്ടോര്സൈക്കിളാണെന്നും എയര്-കൂള്ഡ്, ട്വിന് സിലിണ്ടര് എഞ്ചിന് മോട്ടോര്സൈക്കിളുകളുടെ ചരിത്രത്തിന് ആദരവ് അര്പ്പിക്കുന്നതിനാണ് ഈ മോഡല് വിപണിയില് എത്തിച്ചിരിക്കുന്നതെന്നും കമ്പനി വ്യക്തമാക്കുന്നു.
'' സ്ക്രാംബ്ലര് 1100 ട്രിബ്യൂട്ട് പ്രോ സ്ക്രാംബ്ലര് ഡിഎന്എയില് ഉറച്ചു നില്ക്കുന്നു, അതേസമയം ബോര്ഗോ പാനിഗാലെയുടെ ചരിത്രത്തിന് ആദരവ് അര്പ്പിക്കുകയും ചെയ്യുന്നു. ഈ വര്ഷത്തെ തങ്ങളുടെ ആദ്യ ലോഞ്ചാണ് സ്ക്രാംബ്ലര് ട്രിബ്യൂട്ട് 1100 പ്രോ, ഐക്കണിക് എയര്-കൂള്ഡ് L-ട്വിന് എഞ്ചിനെ ആഘോഷിക്കുന്ന ഒരു വ്യതിരിക്തമായ ഓഫറാണിത്. കൂടാതെ ഇന്ത്യയില് നിന്നുള്ള ഡ്യുക്കാട്ടിസ്റ്റിക്കും ഈ എക്സ്ക്ലൂസീവ് എഡിഷന് സ്വന്തമാക്കാനാകുമെന്നത് വളരെ സന്തോഷകരമാണ് '' - ഡ്യുക്കാട്ടി ഇന്ത്യ മാനേജിംഗ് ഡയറക്ടര് ബിപുല് ചന്ദ്ര പറയുന്നു.
പുതിയ സ്ക്രാംബ്ലര് 1100 ട്രിബ്യൂട്ട് പ്രോ, Giugiaro രൂപകല്പ്പന ചെയ്ത 1970-കളിലെ ഐക്കണിക് ഡ്യുക്കാട്ടി ലോഗോ ഉപയോഗിക്കുന്നു. ക്ലാസിക് വൈബ് കൂടുതല് ചേര്ക്കുന്നതിന്, ഡ്യുക്കാട്ടി സ്ക്രാംബ്ലര് 1100 ട്രിബ്യൂട്ട് പ്രോയില് കറുത്ത സ്പോക്ക് വീലുകള്, വൃത്താകൃതിയിലുള്ള റിയര് വ്യൂ മിററുകള്, സമര്പ്പിത സ്റ്റിച്ചിംഗുകളുള്ള ബ്രൗണ് സീറ്റ് എന്നിവയുണ്ട്. പുതിയ സ്ക്രാംബ്ലര് 1100 ട്രിബ്യൂട്ട് പ്രോയുടെ കരുത്ത് 1079 സിസി, L-ട്വിന്, ഡെസ്മോഡ്രോമിക്, എയര് കൂള്ഡ് എഞ്ചിനാണ്. അത് 7,500-rpm-ല് 85 bhp പവറും 4,750 rpm-ല് 90.2 Nm പീക്ക് ടോര്ക്കും ഉത്പാദിപ്പിക്കുന്നു. പുതിയ സ്ക്രാംബ്ലര് 1100 ട്രിബ്യൂട്ട് പ്രോയില് ട്വിന് സൈഡ് എക്സ്ഹോസ്റ്റ്, കാസ്റ്റ് അലുമിനിയം സ്വിംഗാര്ം, ബ്ലാക്ക് പെയിന്റ് ചെയ്ത അലുമിനിയം കവറുകള്, മുന്വശത്ത് 18' സ്പോക്ക്ഡ് വീലുകള്, പിന്നില് 17' സ്പോക്ക് വീലുകള്, ഡ്യുക്കാട്ടി നിര്ദ്ദിഷ്ട പിറെല്ലി MT60 RS ടയറുകള്, ബോസ്ഷ് ടയറുകള് എന്നിവയും സജ്ജീകരിച്ചിരിക്കുന്നു.
