പ്രശാന്ത് നീലിന്റെ സംവിധാനത്തില് ഒരുങ്ങുന്ന ചിത്രം 'കെജിഎഫ് ചാപ്റ്റര് 2'വിലെ പുതിയ ഗാനം റിലീസ് ചെയ്തു. 'സുല്ത്താന' എന്ന് തുടങ്ങുന്ന ഗാനത്തിന്റെ അഞ്ച് ഭാഷാ പതിപ്പുകളും ഒരുമിച്ചാണ് റിലീസ് ചെയ്തിരിക്കുന്നത്. ലഹരി മ്യൂസിക്കിന്റെ യൂട്യൂബ് ചാനലിലൂടെയാണ് ഗാനം റിലീസ് ചെയ്തത്.
2018ല് റിലീസ് ചെയ്ത കെ ജി എഫ് എന്ന സിനിമയുടെ തുടര്ച്ചയാണ് കെ ജി എഫ് ചാപ്റ്റര് 2. യാഷ് നായകനാകുന്ന ചിത്രത്തില് ബോളിവുഡ് താരം സഞ്ജയ് ദത്ത് ആണ് വില്ലന് വേഷത്തില് എത്തുന്നത്. അധീര എന്നാണ് സഞ്ജയ് അവതരിപ്പിക്കുന്ന കഥാപാത്രത്തിന്റെ പേര്. ഇരുവര്ക്കും പുറമെ രവീണ ടണ്ടണ്, മാളവിക അവിനാഷ്, ശ്രീനിധി ഷെട്ടി എന്നിവരും ചിത്രത്തില് പ്രധാന കഥാപാത്രങ്ങളാണ്.
ഭുവന് ഗൗഡ ഛായാഗ്രഹണം നിര്വ്വഹിക്കുന്ന ചിത്രത്തിന്റെ എഡിറ്റര് ശ്രീകാന്താണ്. രവി ബസൂര് സംഗീതം. സിനിമയുടെ സംഘട്ടനം ഒരുക്കുന്നത് പ്രശസ്ത സ്റ്റണ്ട് കൊറിയോഗ്രാഫേഴ്സായ അന്പറിവാണ്. ചിത്രം ഏപ്രില് 14ന് റിലീസ് ചെയ്യും.
100 കോടി ബജറ്റില് ഒരുങ്ങുന്ന ചിത്രം നിര്മ്മിക്കുന്നത് ഹോമബിള് ഫിലിംസാണ്. കന്നഡ ഭാഷയിലെ ഏറ്റവും ബിഗ് ബജറ്റ് ചിത്രമാണ് കെ ജി എഫ് ചാപ്റ്റര് 2. കന്നഡയ്ക്ക് പുറമെ തമിഴ്, ഹിന്ദി, മലയാളം, തെലുങ്ക് ഭാഷകളിലും സിനിമ റിലീസ് ചെയ്യും. കേരളത്തിലെ സിനിമയുടെ വിതരണം ഏറ്റെടുത്തിരിക്കുന്നത് നടന് പൃഥ്വിരാജാണ്.
