ഈ വർഷം ജനുവരി 22നാണ് താരദമ്പതികളായ പ്രിയങ്ക ചോപ്രയ്ക്കും നിക് ജൊനാസിനും വാടകഗർഭപാത്രത്തിലൂടെ പെൺകുഞ്ഞ് പിറന്നത്. മാതാപിതാക്കളായ സന്തോഷം ഇരുവരും സോഷ്യൽ മീഡിയയിലൂടെ പങ്കുവെയ്ക്കുകയായിരുന്നു. മാൾട്ടി മേരി ചോപ്ര ജൊനാസ് എന്നാണ് മകളുടെ പേര്.
ഇപ്പോഴിതാ, മകളുടെ ആദ്യ ചിത്രം പങ്കുവെച്ചിരിക്കുകയാണ് നിക് ജൊനാസും പ്രിയങ്ക ചോപ്രയും. ലോക മാതൃദിനത്തിലാണ് മകൾ മാൾട്ടി മേരിക്കൊപ്പമുള്ള ഇരുവരുടെയും ചിത്രം വൈറലായത്.
കുഞ്ഞിനെ മാറോടണച്ചു പിടിച്ചിരിക്കുകയാണ് ചിത്രത്തിൽ പ്രിയങ്ക. തൊട്ടടുത്ത് മകളെ വാത്സല്യപൂർവം നോക്കിയിരിക്കുന്ന നിക് ജൊനാസിനെയും കാണാം. മകളുടെ മുഖം മറച്ചുള്ള ചിത്രമാണ് ഇത്.
‘കഴിഞ്ഞ കുറച്ചു മാസങ്ങളായി ഞങ്ങൾ സഞ്ചരിച്ച പാതകളെക്കുറിച്ച് ഇപ്പോൾ പറയാതിരിക്കാനാവില്ല. ഒരുപാട് ആളുകൾ അനുഭവിച്ചിട്ടുള്ള കാര്യമാണത്. NICU–ൽ നിന്ന് നൂറ് ദിവസങ്ങൾക്കു ശേഷം ഞങ്ങളുടെ മകൾ ഇപ്പോൾ വീട്ടിൽ എത്തിയിരിക്കുകയാണ്. കഴിഞ്ഞുപോയത് വെല്ലുവിളി നിറഞ്ഞ ഏതാനും മാസങ്ങളായിരുന്നുവെങ്കിലും ഓരോ നിമിഷവും എത്രമാത്രം വിലപ്പെട്ടതായിരുന്നുവെന്നു മനസ്സിലാക്കുന്നു. മകൾ വീട്ടിലെത്തിയതിൽ ഞങ്ങൾക്ക് അതിയായ സന്തോഷമുണ്ട്. ആശുപത്രിയിൽ മകളെ പരിചരിച്ച ഡോകടർമാരോടും നഴ്സുമാരോടും ഹൃദയം നിറഞ്ഞ നന്ദി അറിയിക്കുകയാണ്. ഞങ്ങളുടെ ജീവിതത്തിലെ പുതിയ അധ്യായം ഇവിടെ ആരംഭിക്കുന്നു. മോളെ, മമ്മിയും ഡാഡിയും നിന്നെ ഒരുപാട് സ്നേഹിക്കുന്നു...’.– ചിത്രത്തിനൊപ്പം നിക്ക് കുറിച്ചു.
അമ്മയെന്ന നിലയിൽ പ്രിയങ്ക തന്നെ അതിശയിപ്പിക്കുന്നുവെന്നും അവളുടെ ആദ്യ മാതൃദിനമാണ് ഇതെന്നും നിക്ക്.
