അസാധാരണമായ കഴിവുകൾ കൊണ്ട് സോഷ്യൽ മീഡിയയെ അമ്പരിപ്പിച്ച് പ്രശസ്തരായ നിരവധി പേരുണ്ട്. സോഷ്യൽ മീഡിയയിൽ പങ്കുവയ്ക്കുന്ന കഴിവുകൾ വൈറലാകുന്നതോടെ നിമിഷ നേരം കൊണ്ടാണ് പലരും താരങ്ങളാകുന്നത്. ഇതിന് സാധിക്കാത്തത് കൊണ്ട് മാത്രം ലോകം അറിയാതെ പോകുന്ന കലാകാരന്മാരുമുണ്ട്.
കോൽക്കത്തയിലെ റെയിൽവേ പ്ലാറ്റ് ഫോമിലിരുന്ന് പാട്ടു പാടിയ റാണു മണ്ടൽ ബോളിവുഡ് ഗായികയായി മാറിയ കഥ നമുക്ക് അറിയാം. ജീവിക്കാൻ വേണ്ടി ലതാ മങ്കേഷ്കറുടെ 'ഏക് പ്യാർ കാ നഗ്മ ഹായ്' എന്ന ഗാനം ആലപിച്ച റാണു സംഗീതാസ്വാദകരുടെ മനം കവർന്ന് പ്രശസ്തയായി.
ഇപ്പോൾ ഇതാ പ്രശസ്ത സംഗീത സംവിധായകനും ഗായകനുമായ ശങ്കർ മഹാദേവൻ പങ്കുവച്ച ഒരു വീഡിയോയാണ് സോഷ്യൽ മീഡിയ ഏറ്റെടുത്തിരിക്കുന്നത്. സാധാരണക്കാരനായ ഒരാൾ പാട്ട് പാടുന്നതാണ് വീഡിയോ. പാട്ട് പാടുന്നതിനൊപ്പം കൈകൊണ്ട് അയാൾ താളം പിടിക്കുന്നതാണ് വീഡിയോയുടെ ആകർഷണം. ശങ്കർ മഹാദേവൻ പോലും ഈ കലാകാരന്റെ കഴിവിൽ അത്ഭുതപ്പെട്ടിരിക്കുകയാണ്. വീഡിയോയ്ക്ക് ഒപ്പം അദ്ദേഹം പങ്കുവച്ച വരികളിൽ അത് വ്യക്തമാണ്.
'അവർ എന്നെ അത്ഭുതപ്പെടുത്തുന്നതിൽ പരാജയപ്പെടുന്നില്ല. സാധാരണക്കാരിൽ നിന്ന് പഠിക്കാൻ ഒരുപാട് കാര്യങ്ങളുണ്ട്. അയാളുടെ താളം വളരെ പൂർണമാണ്... വാദ്യമേളങ്ങൾ ഒന്നുമില്ല.. ആരാണ് ഇയാൾ?' എന്ന അടിക്കുറിപ്പോടെയാണ് ശങ്കർ മഹാദേവൻ ഈ വീഡിയോ പങ്കുവച്ചിരിക്കുന്നത്.
1963ൽ പുറത്തിറങ്ങിയ ദിൽ ഹീ തോ ഹേയ് (dil he to hai) എന്ന സിനിമയിലെ ലഗാ ചുനിരി മേ ദാഗ് ചുപ്വാൻ കൈസെ (laga chunri me daag chhupaun kaise) എന്ന ഗാനമാണ് ഇയാൾ സ്വന്തമായി താളം പിടിച്ച് പാടിയത്. കൈ കൊണ്ട് താളം പിടിച്ച് ഏറെ ആസ്വദിച്ചാണ് ഈ കലാകാരന്റെ പാട്ട്. നിരവധി പേരാണ് ഇതിനോടകം ഈ വീഡിയോ കണ്ടത്. ആരാണ് ഈ കലാകാരൻ എന്ന് അന്വേഷിക്കുകയാണ് സോഷ്യൽ മീഡിയ.
