ഭീഷ്മ പർവം സിനിമയെയും മമ്മൂട്ടിയെയും പ്രശംസിച്ച് സംവിധായകൻ ഭദ്രൻ. പുല്ലാങ്കുഴലിലൂടെ കടന്നുപോയ കാറ്റിനെ നിയന്ത്രിച്ച പോലുള്ള അഭിനയ പാടവം കാണുമ്പോൾ മമ്മൂട്ടിക്ക് തള്ളവിരൽ അകത്ത് മടക്കി ഒരു സല്യൂട്ട് എന്നായിരുന്നു മമ്മൂട്ടിയുടെ പ്രകടനത്തെക്കുറിച്ച് ഭദ്രൻ കുറിച്ചത്.
ഭദ്രന്റെ വാക്കുകൾ:
''ഭീഷമ പർവം. ഇന്നലെ ആണ് ആ സിനിമ കാണാൻ കഴിഞ്ഞത്. കുടിപ്പക ആണ് പ്രമേയം. ലോകാരംഭം മുതൽ ലോകാവസാനം വരെ ഈ കുടിപ്പക ആവർത്തിച്ച് കൊണ്ടേ ഇരിക്കും. അത് കൊണ്ട് തന്നെ ഈ പ്രമേയം വെറും ഒരു പഴംതുണി ആണെന്ന് പറയുക വയ്യ!! എത്ര തന്മയത്തത്തോടെ അത് അവതരിപ്പിക്കാം എന്നത് ഒരു ഫിലിം മേക്കറുടെ വെല്ലുവിളി ആണ്. ഫ്രാൻസിസ് ഫോർഡ് കോപ്പോളോയുടെ 'ഗോഡ് ഫാദറി'ന് മുൻപും പിൻപും കുടിപ്പകകളുടെ കഥപറഞ്ഞ സിനിമകൾ ഉണ്ടായി. എന്ത് കൊണ്ട് 'ഗോഡ് ഫാദർ' സവിശേഷതയോടെ കാലങ്ങളെ അതിജീവിച്ച് നിൽക്കുന്നു.
അവിടെ നിന്ന് ഭീഷമ പർവത്തിലേക്ക് വരുമ്പോൾ, ജിഗിലറി കട്ട്സുകളും അനവസരങ്ങളിലെ ക്യാമറ മൂവ്മെന്റ്സും ഇല്ലാതെ അതിന്റെ ആദ്യമധ്യാന്തം കയ്യടക്കത്തോടെ സൂക്ഷിച്ച അമലിന്റെ അവതരണം ശ്ലാഘനീയമാണ്. ഒറ്റവാക്കിൽ 'മൈക്കിൾ' എന്ന കഥാപാത്രത്തോടൊപ്പം മേക്കിങ് സഞ്ചരിച്ചു എന്ന് പറയാം. മൈക്കിളിന്റെ വെരി പ്രസന്റ്സ്. മൊഴികളിലെ അർഥം ഗ്രഹിച്ച് ഔട്ട്സ്പോക്കൺ ആവാതെ, പുല്ലാങ്കുഴലിലൂടെ കടന്നുപോയ കാറ്റിനെ നിയന്ത്രിച്ച പോലുള്ള അഭിനയ പാടവം കാണുമ്പോൾ മമ്മൂട്ടിക്ക് തള്ളവിരൽ അകത്ത് മടക്കി ഒരു സല്യൂട്ട്.''
മമ്മൂട്ടിയെ കേന്ദ്ര കഥാപാത്രമാക്കി അമൽ നീരദ് സംവിധാനം ചെയ്ത ഭീഷ്മപർവത്തിന് തിയേറ്ററിൽ ഗംഭീര വരവേൽപ്പാണ് ലഭിച്ചത്. കോവിഡ് നിയന്ത്രണങ്ങള് പിന്വലിച്ചതോടെ നൂറ് ശതമാനം സീറ്റിംഗ് കപ്പാസിറ്റിയോടെയാണ് ഭീഷ്മ പര്വം തിയേറ്ററുകളിലെത്തിയത്. പിന്നാലെ ചിത്രം ഒടിടിയിലും പ്രദർശനത്തിന് എത്തി. ഏപ്രില് ഒന്ന് അര്ധരാത്രി മുതലാണ് ഭീഷ്മ പര്വ്വം ഡിസ്നി പ്ലസ് ഹോട്സ്റ്റാറില് സ്ട്രീമിംഗ് ആരംഭിച്ചത്
മാസ് ആൻഡ് ക്ലാസ് ചിത്രമെന്നാണ് പലരും സിനിമയെ വാഴ്ത്തിയത്. മമ്മൂട്ടിയോടൊപ്പം സൗബിൻ, ശ്രീനാഥ് ഭാസി, ഫർഹാൻ, സുദേവ് നായർ, നെടുമുടി വേണു, കെപിഎസി ലളിത, നാദിയ മൊയ്തു, അനഘ തുടങ്ങി വലിയൊരു താര നിര തന്നെയാണ് ചിത്രത്തിൽ അണിനിരന്നത്.
