ബോളിവുഡില് അപ്രതീക്ഷിതമായി പല മരണങ്ങളും സംഭവിച്ചിട്ടുണ്ട്. അതില് ചിലത് സ്വഭാവികമായതാണ്, മറ്റു ചിലത് അസ്വഭാവിക മരണങ്ങളുമാണ്. ആരാധകരെ കണ്ണീരിലാഴ്ത്തി സുശാന്ത് സിംഗ് രാജ്പുത് വിട പറഞ്ഞിട്ട് ഇന്ന് രണ്ട് വര്ഷം തികയുകയാണ്.
2020 ജൂണ് 14നാണ് സുശാന്ത് സിംഗിനെ ആത്മഹത്യ ചെയ്ത നിലയില് കണ്ടെത്തിയിത്. സുശാന്ത് സിംഗിന്റെ മരണം ബോളിവുഡിനെയാകെ പിടിച്ചുലച്ചിരുന്നു.
ഇപ്പോഴിതാ സുശാന്ത് സിംഗിന്റെ ഓര്മ ദിനത്തില് ഫോട്ടോകള് പങ്കുവെച്ച് രംഗത്ത് എത്തിയിരിക്കുകയാണ് മുന് കാമുകിയും നടിയുമായ റിയ ചക്രബര്ത്തി. ‘‘എന്നും നിന്നെ മിസ് ചെയ്യുന്നു.… ’’ എന്ന ക്യാപ്ഷനും നല്കിയാണ് റിയ ചിത്രങ്ങളടക്കം പോസ്റ്റിട്ടിരിക്കുന്നത്. ഇരുവരും ഒന്നിച്ച് ഉല്ലാസഭരിതരായി ഇരിക്കുന്ന ചിത്രങ്ങളാണധികവും.
റിയയുടെ പോസ്റ്റിനു താഴെ ചുരുങ്ങിയ സമയത്തിനുള്ളില് തന്നെ ഒട്ടേറെ പേര് ഫോട്ടോയ്ക്ക് കമന്റുകളുമായി എത്തിയിട്ടുണ്ട്. ചിലര് റിയയെ ആശ്വസിപ്പിക്കുമ്പോള് മറ്റ് ചിലര് രൂക്ഷമായി വിമര്ശിക്കുന്നുമുണ്ട്. സുശാന്ത് സിംഗ് രാജ്പുതിന്റെ മരണം ബോളിവുഡിനെ വലിയ വിവാദത്തിന് വഴിവെച്ചിരുന്നു. ബോളിവുഡിലെ വിവേചനമാണ് സുശാന്തിനെ ആത്മഹത്യയിലേക്ക് നയിച്ചത് എന്ന് ചൂണ്ടിക്കാട്ടി താരങ്ങളടക്കമുള്ളവര് രംഗത്ത് എത്തിയിരുന്നു. മരണത്തെ കുറിച്ചുള്ള അന്വേഷണം റിയയിലേക്കും നീങ്ങി. മരിക്കുന്നതിന് മുന്പ് രാത്രി സുശാന്ത് റിയായെ ഫോണില് വിളിക്കാന് ശ്രമിച്ചിരുന്നെന്നും പക്ഷേ കിട്ടിയില്ലെന്നും പൊലീസ് കണ്ടെത്തിയിരുന്നു. എന്നാല് അവസാന നാളുകളില് തങ്ങള് പിരിഞ്ഞിരുന്നുവെന്നായിരുന്നു റിയയുടെ മൊഴി. ഈ അന്വേഷണം പിന്നീട് ബോളിവുഡിലെ ഉന്നതരിലേക്കും എത്തിയിരുന്നു.
പിന്നീട് സുശാന്ത് ലഹരി മരുന്ന് സ്ഥിരമായി ഉപയോഗിച്ചിരുന്നെന്നും ലഹരി വസ്തുക്കള് ആവശ്യപ്പെട്ട് റിയ നടത്തിയ ചാറ്റുകള് എന്ഫോഴ്സ്മെന്റ് ഡയറക്ടറേറ്റ് കണ്ടെത്തുകയും ചെയ്തിരുന്നു. തുടര്ന്ന് സിബിഐ നിരവധി തവണ റിയയെ ചോദ്യം ചെയ്യുകയും താരത്തെ അറസ്റ്റ് ചെയ്ത് റിമാന്ഡ് ചെയ്യുകയും ചെയ്തിരുന്നു. സുശാന്തിന് ലഹരി മരുന്ന് വാങ്ങി നല്കിയെന്ന് റിയ സമ്മതിച്ചുവെന്നായിരുന്നു റിമാന്ഡ് റിപ്പോര്ട്ട്. പിന്നീട് റിയ ജാമ്യത്തില് ജയിലില് നിന്ന് പുറത്തിറങ്ങുകയായിരുന്നു. എന്നാല് സുശാന്ത് സിംഗിന്റേത് കൊലപാതകമാണെന്ന വാദം ദില്ലി എയിംസിലെ ഡോക്ടര്മാരുടെ സംഘം തള്ളിയിരുന്നു. എന്തുതന്നെയായാലും സുശാന്ത് സിംഗിനെ മരണത്തിലേക്ക് നയിച്ചതിന്റെ കാരണങ്ങള് കൃത്യമായി തെളിയിക്കപ്പെട്ടിട്ടില്ല.
