നെഞ്ചുവേദനയെത്തുടര്ന്ന് ആശുപത്രിയില് ചികിത്സ തേടിയ നടന് ചിയാന് വിക്രം ആദ്യമായി പൊതുവേദിയില് പ്രത്യക്ഷപ്പെട്ടു. പുതിയ ചിത്രം കോബ്രയുടെ മ്യൂസിക് ലോഞ്ച് വേദിയിലാണ് ആരോഗ്യവാനായ ചിയാന് പങ്കെടുത്തത്. സെവന് സ്ക്രീന് സ്റ്റുഡിയോയുടെ ബാനറില് എസ്.എസ്. ലളിത് കുമാര് നിര്മ്മിച്ച് ആര്. അജയ് ജ്ഞാനമുത്തു സംവിധാനം ചെയ്യുന്ന ചിയാന് വിക്രം ചിത്രം കോബ്രായുടെ ഓഡിയോ ലോഞ്ച് ചെന്നൈയില് വെച്ച് നടന്നു. എ.ആര്. റഹ്മാന്, ഇര്ഫാന് പത്താന്, ദ്രുവ് വിക്രം, റോഷന് മാത്യു, ശ്രീനിധി ഷെട്ടി, ഉദയനിധി സ്റ്റാലിന്, കെ.എസ്. രവികുമാര്, മിയ ജോര്ജ്, ഡോക്ടര് അജയ് ജ്ഞാനമുത്തു തുടങ്ങി നിരവധി പ്രമുഖ വ്യക്തികള് ഓഡിയോ ലോഞ്ചില് പങ്കെടുത്തു.
ഇഫാര് മീഡിയായ്ക്ക് വേണ്ടി റാഫി മതിര കേരളത്തില് അവതരിപ്പിക്കുന്ന 'കോബ്ര', ഡ്രീം ബിഗ് ഫിലിംസും, ഇ ഫോര് എന്റ്റര്ടൈന്മെന്റ്റും ചേര്ന്ന് തിയെറ്ററുകളില് എത്തിക്കുന്നു. എ.ആര്. റഹ്മാന്റെ സംഗീത സംവിധാനത്തില് പുറത്തുവന്ന ചിത്രത്തിലെ ഗാനങ്ങളെല്ലാം ഹിറ്റ് ചാര്ട്ടില് ഇടം നേടിക്കഴിഞ്ഞു. ഇമൈക്ക നൊടികള്, ഡിമാന്ഡി കോളനി എന്നീ സൂപ്പര്ഹിറ്റ് സിനിമകള്ക്ക് ശേഷം അജയ് ജ്ഞാനമുത്തു സംവിധാനം ചെയ്യുന്ന ചിത്രമാണ് 'കോബ്ര'. കെജിഎഫിലൂടെ സുപരിചിതയായ ശ്രീനിധി ഷെട്ടിയാണ് നായിക. മുന് ഇന്ത്യന് ക്രിക്കറ്റ് താരമായ ഇര്ഫാന് പത്താന് ആദ്യമായി അഭിനയിക്കുന്ന ചിത്രം കൂടിയാണിത്. മലയാളി താരങ്ങളായ റോഷന് മാത്യു, സര്ജാനോ ഖാലിദ്, മിയ ജോര്ജ്, കനിഹ, പദ്മപ്രിയ, മാമുക്കോയ, ബാബു ആന്റ്റണി എന്നിവരാണ് മറ്റു പ്രധാന താരങ്ങള്.
ആശുപത്രിയിലായ സാഹചര്യത്തില് തന്നെക്കുറിച്ച് വന്ന വാര്ത്തകളെ കുറിച്ച് വേദിയില് വളരെ രസകരമായാണ് വിക്രം പ്രതികരിച്ചത്. ' നിരവധി വാര്ത്തകള് സോഷ്യല് മീഡിയയിലും മറ്റു മാധ്യമങ്ങളിലും ആയി ചുറ്റിത്തിരിയുന്നുണ്ടായിരുന്നു. ചിലര് വയ്യാതെ കിടക്കുന്ന ഏതോ രോഗിയുടെ ശരീരം തന്റെ തല വെച്ച് ഫോട്ടോഷോപ്പ് ചെയ്തു വരെ ന്യൂസ് കൊടുത്തിരുന്നു. അതൊക്കെ വളരെ ക്രിയേറ്റിവ് ആയിരുന്നു. എനിക്ക് ഇഷ്ടമായി. എന്തെല്ലാം നമ്മള് കാണുന്നു, ഇതൊന്നും ഒന്നുമില്ല '.
തമാശ രൂപേണ വിക്രം പറഞ്ഞു.
