‘ന്നാ താന് കേസ് കൊട്’ സിനിമയില് നിന്നുമുളള ‘ദേവതൂര് പാടി’ എന്ന ഗാനം യൂട്യൂബില് ഒന്നാം സ്ഥാനത്ത് ട്രെന്ഡിങ് തുടരുന്നു. 37 വര്ഷങ്ങള്ക്ക് മുന്പ് ഔസേപ്പച്ചന് ഈണമിട്ട ഗാനത്തിന് കുഞ്ചാക്കോ ബോബന്റെ സ്റ്റെപ്പുകള് തന്നെയാണ് പ്രധാന ആകര്ഷണം. പല ഉത്സവപ്പറമ്പുകളിലും അവിടെ മുഴങ്ങിക്കേള്ക്കുന്ന ഗാനത്തിന് ഇത്തരത്തില് മതിമറന്നു നൃത്തം ചെയ്യുന്ന ആള്ക്കാരെ പലരും ശ്രദ്ധിച്ചിട്ടുണ്ടാവും. അതുപോലൊരു വ്യക്തിയായായാണ് ചാക്കോച്ചന്റെ അംബാസ് രാജീവന് ഈ ഗാനത്തിന് ചുവടുവെയ്ക്കുന്നത്.
പാട്ടിനും ചാക്കോച്ചന്റെ നൃത്തത്തിനും പ്രശംസയുമായി സാക്ഷാല് ഔസേപ്പച്ചന് തന്നെ രംഗത്തുവന്നിട്ടുണ്ട്. ബിജു നാരായണന്റെ ഗാനാലാപനവും ഔസേപ്പച്ചനെ ആകര്ഷിച്ചു. ഫേസ്ബുക്ക് കുറിപ്പിലാണ് ഔസേപ്പച്ചന്റെ വാക്കുകള്: ‘ചാക്കോച്ചാ പൊളിച്ചൂടാ മോനെ പൊളിച്ചു. 37 വര്ഷം മുന്നേ ഞാന് വയലിന് വായിച്ചു കൊണ്ട് കണ്ടക്റ്റ് ചെയ്ത ഗാനം ഇന്നും ട്രെന്ഡിങ് ആയതില് സന്തോഷം. അന്ന് ഓര്ക്കസ്ട്രയില് ഒപ്പം ഉണ്ടായിരുന്നവര് കീബോര്ഡ് എ.ആര്. റഹ്മാന്, ഗിറ്റാര് ജോണ് ആന്റണി, ഡ്രംസ് ശിവമണി. അതേ ഓര്ക്കസ്ട്രയെ ഓര്മപ്പെടുത്തുന്ന രീതിയില് ഓര്ക്കസ്ട്രേഷന് പുനര് സൃഷ്ടിച്ചതിനൊപ്പം ബിജു നാരായണന്റെ ഹൃദയത്തില് തൊടുന്ന ആലാപനവും ഒത്തുചേര്ന്നപ്പോള് ഗംഭീരമായി’.കാതോട് കാതോരം'സിനിമയിലെ ഗാനത്തില് എ.ആര്. റഹ്മാനും ശിവമണിയും ഭാഗമായിരുന്നു എന്നത് പലര്ക്കും പുത്തനറിവാണ്.
എസ്.ടി.കെ. ഫ്രെയിംസിന്റെ ബാനറില് നിര്മ്മാതാവ് സന്തോഷ് ടി. കുരുവിള നിര്മ്മാണവും, കുഞ്ചാക്കോ ബോബന് പ്രൊഡക്ഷന്സ്, ഉദയ പിക്ചേഴ്സ് എന്നീ ബാനറുകളുടെ കീഴില് കുഞ്ചാക്കോ ബോബന് സഹനിര്മ്മാണം നിര്വ്വഹിക്കുന്ന ‘ന്നാ താന് കേസ് കൊട്’ ഹാസ്യ പശ്ചാത്തലത്തിലാണ് അവതരിപ്പിക്കുന്നത്.
ആന്ഡ്രോയ്ഡ് കുഞ്ഞപ്പന് എന്ന ജനപ്രിയ ചിത്രത്തിന്റെ സംവിധായകന് രതീഷ് ബാലകൃഷ്ണന് പൊതുവാളാണ് ചിത്രത്തിന്റെ രചനയും സംവിധാനവും നിര്വഹിക്കുന്നത്. ഷെറിന് റേച്ചല് സന്തോഷ് ആണ് ചിത്രത്തിന്റെ മറ്റൊരു സഹ നിര്മ്മാതാവ്.
കുഞ്ചാക്കോ ബോബനാണ് ചിത്രത്തില് കേന്ദ്ര കഥാപാത്രത്തെ അവതരിപ്പിക്കുന്നത്. സൂപ്പര് ഡീലക്സ്, വിക്രം എന്നീ ചിത്രങ്ങളിലൂടെ പ്രശസ്തയായ തമിഴ് നടി ഗായത്രി ശങ്കര് അഭിനയിക്കുന്ന അദ്യ മലയാള ചലച്ചിത്രം കൂടിയാണ് ഇത്. ബേസില് ജോസഫ്, ഉണ്ണിമായ തുടങ്ങിയവരാണ് ചിത്രത്തിലെ മറ്റ് പ്രധാന താരങ്ങള്.
