ഹോണ്ട ആക്ടിവ കഴിഞ്ഞാല് ഇന്ത്യയില് ഏറ്റവും കൂടുതല് വിറ്റഴിക്കപ്പെടുന്ന സ്കൂട്ടറാണ് ടിവിഎസ് ജുപ്പിറ്റര്. ഉയര്ന്ന നിര്മാണ നിലവാരവും യാത്രാസുഖവും ഫീച്ചറുകളും മികച്ച മൈലേജും ഒക്കെയാണ് ഇന്ത്യയിലെ 110 സിസി സ്കൂട്ടര് വിഭാഗത്തില് ജുപ്പിറ്റര് തിളങ്ങി നില്ക്കുന്നതിന്റെ പ്രധാന കാരണം. ഈ വിജയം ആഘോഷിക്കുന്നതിന്റെ ഭാഗമായി ടിവിഎസ് മോട്ടോര് കമ്പനി ജുപ്പിറ്ററിന്റെ പുതിയ വകഭേദം പുറത്തിറക്കിയിരിക്കുകയാണിപ്പോള്.
ജുപ്പിറ്റര് ക്ലാസിക് എന്ന് വിളിക്കപ്പെടുന്ന ഈ പുതിയ മോഡല് സ്കൂട്ടറിന്റെ ടോപ്പ് എന്ഡ് വേരിയന്റായാണ് വിപണിയില് എത്തിയിരിക്കുന്നത്. 85,866 രൂപയുടെ എക്സ്ഷോറൂം വിലയിലാണ് ഇതിനെ അവതരിപ്പിച്ചിരിക്കുന്നത്. ഇന്ത്യയില് ജുപ്പിറ്ററിന്റെ 50 ലക്ഷം യൂണിറ്റ് വില്പ്പനയെന്ന നാഴികക്കല്ല് പിന്നിട്ടതിന്റെ ആഘോഷത്തിന്റെ ഭാഗമായാണ് പുതിയ ക്ലാസിക് പതിപ്പിനെ കമ്പനി ഇപ്പോള് വിപണിയില് ഇറക്കിയിരിക്കുന്നത്. നിര്മാതാവ് ജുപ്പിറ്റര് ക്ലാസിക്കില് ചില കോസ്മെറ്റിക് മാറ്റങ്ങള് വരുത്തിയിട്ടുണ്ട്. ഫ്യുവല് ഇഞ്ചക്ഷന് ലഭിക്കുന്ന 109.7 സിസി സിംഗിള് സിലിണ്ടര് എഞ്ചിനുമായാണ് സ്കൂട്ടര് വിപണിയില് എത്തുന്നത്.
ഇത് 7,500 rpm-ല് 7.47 bhp പവറും 5,500 rpm-ല് പരമാവധി 8.4 Nm torque വരെ നിര്മിക്കാന് ശേഷിയുള്ളതാണ്. ഈ യൂണിറ്റ് CVT ഓട്ടോമാറ്റിക് ഗിയര്ബോക്സിലേക്കാണ് ജോടിയാക്കിയിരിക്കുന്നത്. എക്കോത്രസ്റ്റ് ഇന്ധന ഇഞ്ചക്ഷന് (ET-Fi) സാങ്കേതികവിദ്യയും സംയോജിത സ്റ്റാര്ട്ടര് ജനറേഷന് സംവിധാനമുള്ള ഐ-ടച്ച്സ്റ്റാര്ട്ടും ടിവിഎസ് ജുപ്പിറ്ററില് വാഗ്ദാനം ചെയ്യുന്നുണ്ട്. ഫീച്ചറുകളുടെ കാര്യത്തില് മൊബൈല് ഉപകരണങ്ങള് ചാര്ജ് ചെയ്യാന് യുഎസ്ബി ചാര്ജര്, ഓള്-ഇന്-വണ് ലോക്ക്, എഞ്ചിന് കില് സ്വിച്ച്, എന്നിവയും സ്കൂട്ടറിന്റെ ടോപ്പ് എന്ഡ് വേരിയന്റില് അവതരിപ്പിക്കുന്നുണ്ട്. മികച്ച ബ്രേക്കിംഗിനായി മുന്നിലും പിന്നിലും ഡിസ്ക് ബ്രേക്കുകളാണ് ജുപ്പിറ്റര് ക്ലാസിക്കില് ഇടംപിടിച്ചിരിക്കുന്നത്.
ക്രമീകരിക്കാനാവുന്ന ഷോക്ക് അബ്സോര്ബറുകളും സ്കൂട്ടറിന് ലഭിക്കുന്നതിനാല് ഇത് സവാരി സുഖം മെച്ചപ്പെടുത്തും. സ്കൂട്ടര് ഇക്കോ മോഡില് ആണോ അതോ പവര് മോഡില് ആണോ എന്നതും ഇന്സ്ട്രുമെന്റ് ക്ലസ്റ്റര് പ്രദര്ശിപ്പിക്കും. എല്ഇഡി ഹെഡ്ലാമ്പ്, സൈഡ് സ്റ്റാന്ഡ് ഇന്ഡിക്കേറ്റര്, ഇലക്ട്രിക് സ്റ്റാര്ട്ടര്, ലോ ഫ്യുവല് വാര്ണിംഗ്, ഫ്രണ്ട് യൂട്ടിലിറ്റി ബോക്സ്, 21 ലിറ്റര് ബൂട്ട് സ്പേസ്, പിന്വലിക്കാവുന്ന ഹുക്ക് ബാഗുകള്, എക്സ്റ്റേണല് ഫ്യൂവല് ഫില്ലര് എന്നീ സവിശേഷതകളും ടിവിഎസ് ജുപ്പിറ്റര് ക്ലാസിക്കില് ലഭ്യമാവും.
