ഡെറാഡൂണ്‍: ഉത്തരാഖണ്ഡില്‍ റിസോര്‍ട്ട് റിസപ്ഷനിസ്റ്റ് ആയിരുന്ന അങ്കിത ഭണ്ഡാരിയെ വധിച്ച കേസില്‍ വിചാരണയ്ക്ക് അതിവേഗ കോടതി സ്ഥാപിക്കുമെന്ന് മുഖ്യമന്ത്രി പുഷ്‌കര്‍ സിംഗ് ധാമി. അങ്കിതയുടെ കുടുംബത്തിന് 25 ലക്ഷം രൂപ ധനസഹായം നല്‍കുമെന്നും മുഖ്യമന്ത്രി അറിയിച്ചു.
ബി.ജെ.പിയില്‍ നിന്ന് പുറത്താക്കപ്പെട്ട നേതാവും മുന്‍മന്ത്രിയുമായ വിനോദ് ആര്യയുടെ മകന്‍ പുല്‍കിത് ആര്യയും സുഹൃത്തുക്കളും ചേര്‍ന്നാണ് അങ്കിതയെ കനാലില്‍ തള്ളിയിട്ട് കൊലപ്പെടുത്തിയതെന്ന് പോലീസ് കണ്ടെത്തിയിരുന്നു. റിസോര്‍ട്ടില്‍ വരുന്ന അതിഥികളുമായി ലൈംഗിക ബന്ധത്തിന് വിസമ്മതിച്ചതിന്റെ പേരിലായിരുന്നു കൊലപാതകം.
അതേസമയം, റിസോര്‍ട്ടില്‍ ലഹരിമരുന്നുകളുടെ ഇടപാടും വ്യഭിചാരവും നടന്നിരുന്നുവെന്ന് മുന്‍പ് അവിടെ ജോലി ചെയ്തിരുന്നവര്‍ വ്യക്തമാക്കി. ഋഷികേശില്‍ നിന്നും 10 കിലോമീറ്റര്‍ അകലെ പുരി ജില്ലയിലാണ് വനന്ത്ര എന്ന റിസോര്‍ട്ട് പ്രവര്‍ത്തിച്ചിരുന്നത്.
റിസോര്‍ട്ട് മാനേജ്‌മെന്റ് പെണ്‍കുട്ടികള്‍ അടക്കമുള്ള അതിഥികള്‍ക്ക് മദ്യവും കഞ്ചാവും മറ്റ് ലഹരി വസ്തുക്കളും നല്‍കിയിരുന്നുവെന്ന് മുന്‍ റിസപ്ഷനിസ്റ്റായ റിഷിതയും ഹൗസ് കീപ്പറായ അവരുടെ ഭര്‍ത്താവ് വിവേകും മാധ്യമങ്ങളോട് പ്രതികരിച്ചു. രണ്ട് മാസം മുന്‍പാണ് ഇവര്‍ റിസോര്‍ട്ടിലെ ജോലി ഉപേക്ഷിച്ചത്.
ജോലിയില്‍ പ്രവേശിച്ച് ഒരു മാസത്തിനുള്ളിലാണ് അങ്കിത കൊല്ലപ്പെട്ടത്. കെട്ടിട നിര്‍മ്മാണ ചട്ടങ്ങള്‍ പാലിക്കാതെ അനധികൃതമായി നിര്‍മ്മിച്ച റിസോര്‍ട്ട് ഭരണകൂടം ഇടിച്ചുനിരത്തിയിരുന്നു. കെട്ടിടത്തിന് നാട്ടുകാര്‍ തീയിടുകയും ചെയ്തു.
Comments