തിരുവനന്തപുരം: വായില് പ്ലാസ്റ്ററും മൂക്കില് ക്ലിപ്പുമായി ദുരൂഹ സാഹചര്യത്തില് യുവതിയുടെ മൃതദേഹം കണ്ടെത്തിയ സംഭവം ഓണ്ലൈന് ഗെയിമുമായി ബന്ധപ്പെട്ട സാധ്യതകളും പോലീസ് തെരയുന്നു. മരണപ്പെട്ട തിരുവനന്തപുരം പ്ലാമൂട് സ്വദേശി സേവ്യറിന്റെ മകള് സാന്ദ്രയെയാണ് ആണ് വീട്ടില് അടച്ചിട്ടമുറിയില് മരിച്ചനിലയില് കണ്ടെത്തിയത്. 20 കാരിയായ സാന്ദ്രയ്ക്ക് മൊബൈല്ഫോണ് ഉപയോഗം കൂടുതലായിരുന്നു.
അമിതമായ മൊബൈല്ഫോണ് പ്രണയം ഗെയിമില് നിന്നുള്ള മാനസീക സമ്മര്ദ്ദത്തിന് കാരണമായിട്ടുണ്ടോ എന്നാണ് അന്വേഷിക്കുന്നത്. ഇക്കാര്യത്തില് വ്യക്തത വരുത്താന് പോസ്റ്റുമാര്ട്ടത്തിന് പിന്നാലെ ഫോണ് ഫോറന്സിക് വിഭാഗത്തിന് കൈമാറും. പോലീസിന്റെ കൈവശമുള്ള ഫോണില് നിന്നും രണ്ടുമൂന്ന് ദിവസത്തിനുള്ളില് വിവരശേഖരണം നടത്തും. ബുധനാഴ്ച വൈകിട്ടായിരുന്നു സാന്ദ്രയെ അപകടകരമായ അവസ്ഥയില് കണ്ടെത്തിയത്. ഉടന് ജനറല് ആശുപത്രിയില് എത്തിച്ചെങ്കിലും മരണം കഴിഞ്ഞിരുന്നു.
മുറി അടച്ചിരിക്കുന്ന സ്വഭാവമുണ്ടായിരുന്നു സാന്ദ്രയ്ക്ക് എന്നാണ് വിവരം. മരണപ്പെടുന്ന ദിവസവും കഴിഞ്ഞ ദിവസം പകല് സാന്ദ്ര മുറിക്കുള്ളിലായിരുന്നു. ഈ സമയം അച്ഛനും സഹോദരനും വീട്ടിലുണ്ടായിരുന്നു. സാന്ദ്ര മുറിയുടെ വാതില് തുറക്കാത്തതിനാല് ജോലി കഴിഞ്ഞെത്തിയ അമ്മ പുറത്തുനിന്നു വാതില് തുറന്നപ്പോഴാണ് മരിച്ചനിലയില് കണ്ടെത്തിയത്. വായില് സെല്ലോ ടേപ്പിന്റെ പ്ലാസ്റ്ററും മൂക്കില് ഇരുമ്പ് ക്ലിപ്പുമിട്ട നിലയിലായിരുന്നു സാന്ദ്ര.
ശ്വാസംമുട്ടി മരിച്ചെന്നാണ് പ്രാഥമിക നിഗമനം. മൂക്കില് ക്ലിപ്പ് ഇട്ടതിന്റെ മുറിവുണ്ടായിരുന്നു എന്നും ശരീരത്ത് പിടിവലിയുടെ ലക്ഷണങ്ങള് ഇല്ലായിരുന്നു എന്നും പോലീസ് പറയുന്നു. മാനസീകാസ്വാസ്ഥ്യതയ്ക്ക് ചികിത്സയും തേടിയിരുന്നതിനാല് ആത്മഹത്യ ആയിരിക്കാമെന്ന നിഗമനത്തിലാണ് പോലീസ്. മാര് ഇവാനിയോസ് കോളേജില് രണ്ടുവര്ഷം മുമ്പ് ചേര്ന്നിരുന്നെങ്കിലും മാനസീകാസ്വാസ്ഥ്യത്തെ തുടര്ന്ന് സാന്ദ്രയുടെ പഠനം തടസ്സപ്പെട്ടിരുന്നു.
