ആക്ഷന് സിനിമകളിലൂടെ പേരു കേട്ട ബോളിവുഡ് സംവിധായകനാണ് രോഹിത് ഷെട്ടി. രോഹിതിന്റെ സിനിമയില് ഒരു തവണയെങ്കിലും അഭിനയിച്ച താരങ്ങളും പിന്നീട് ആക്ഷന് സീനുകള്ക്ക് കേള്വി കേട്ടവരായി മാറും. ഇന്ത്യൻ പോലീസ് ഫോഴ്സ് എന്ന തന്റെ ആദ്യ വെബ് സീരീസിന്റെ പണിപ്പുരയിലാണ് താരം. ഇപ്പോഴിതാ അതിന്റെ ഷൂട്ടിങ്ങിനിടെ ഉണ്ടായ അപകടത്തിൽ രോഹിത് ഷെട്ടിക്ക് പരിക്ക് പറ്റിയിരിക്കുകയാണ്. താരം തന്നെയാണ് അപകടത്തിന്റെ കാര്യം സോഷ്യല് മീഡിയയിലൂടെ ആരാധകരെ അറിയിച്ചത്. ‘‘വീണ്ടുമൊരു കാർ മറിഞ്ഞു... എന്നാൽ ഇത്തവണ 2 വിരലുകളിൽ മാത്രമാണ് തുന്നിക്കെട്ടിയത്.... വിഷമിക്കേണ്ട കാര്യമില്ല, ഞാൻ പൂർണ്ണമായും സുഖമായിരിക്കുന്നു... നിങ്ങളുടെ സ്നേഹത്തിനും കരുതലിനും വളരെ നന്ദി...❤️🙏🏻... ഹൈദരാബാദിൽ ആമസോൺ ഒറിജിനൽസിനായി ഇന്ത്യൻ പോലീസ് ഫോഴ്സിന്റെ ഷൂട്ടിംഗ്...’’ എന്ന ക്യാപ്ഷനും നല്കി സീരിസിന്റെ അണിയറപ്രവര്ത്തകര്ക്കൊപ്പം കൈയിലെ മുറിവില് ബാന്ഡേജിട്ട് നില്ക്കുന്ന ചിത്രമാണ് താരം പോസ്റ്റ് ചെയ്തിരിക്കുന്നത്. സീരിസില് പ്രധാന കഥാപാത്രമാകുന്ന സിദ്ധാര്ത്ഥ് മല്ഹോത്ര കൈയില് പരുക്കുമായി നില്ക്കുന്ന രോഹിത് ഷെട്ടിയെ ചൂണ്ടിക്കാണിക്കുന്നതും ചിത്രത്തില് കാണാം.
കാർ ചേസ് ചിത്രീകരിക്കുന്നതിനിടെയാണ് രോഹിത് ഷെട്ടിക്ക് പരിക്കേറ്റത്. അപകടത്തിൽ പെട്ട താരത്തെ ഉടൻ സ്വകാര്യ ആശുപത്രിയിൽ പ്രവേശിക്കുകയും ശസ്ത്രക്രിയയ്ക്ക് വിധേയനാക്കുകയും ചെയ്തിരുന്നു. നേരത്തെ ഇതേ വെബ് സീരിസന്റെ ഷൂട്ടിങ്ങിനിടെ ഉണ്ടായ അപകടത്തിൽ സിദ്ധാർഥ് മൽഹോത്രയ്ക്കും ശില്പ ഷെട്ടിക്കും പരിക്കേറ്റിരുന്നു. രണ്ടു പേരും പരിക്കിനെത്തുടര്ന്ന് വിശ്രമത്തിലുമായിരുന്നു. ഇവര്ക്ക് പുറമെ വിവേക് ഒബ്രോയിയും ആമസോൺ പ്രൈം വീഡിയോയ്ക്ക് വേണ്ടി രോഹിത് ഷെട്ടി ഒരുക്കുന്ന വെബ് സീരിസിൽ അണിനിരക്കുന്നുണ്ട്. രോഹിത് ഷെട്ടി ആദ്യമായി സംവിധാനം ചെയ്യുന്ന വെബ് സീരിസ് എന്ന പ്രത്യേകത ഇന്ത്യൻ പോലീസ് ഫോഴ്സിനുണ്ട്. റൺവീർ സിങ്ങിനൊപ്പമുള്ള ‘സര്ക്കസ്’ എന്ന സിനിമയാണ് രോഹിത് ഷെട്ടിയുടേതായി അവസാനം തിയറ്ററിൽ എത്തിയത്. എന്നാൽ സർക്കസിന് കാര്യമായ നേട്ടം ബോക്സ് ഓഫീസിൽ സൃഷ്ടിക്കാനായില്ല. ഇന്ത്യൻ പോലീസ് ഫോഴ്സിന് പുറമെ സിംഗം 5, സൂര്യവംശി 2, ഗോൾമാൽ 5 എന്നീ രോഹിത് ചിത്രങ്ങൾ 2023 ല് രോഹിത്തിന്റേതായി തിയേറ്ററില് എത്തിയേക്കും.
