കേള്ക്കാനിമ്പമുള്ള പാട്ടുകള് ചിട്ടപ്പെടുത്തുന്ന ഹാരിസ് ജയരാജ് ശ്രോതാക്കളുടെ ഇഷ്ടസംഗീതസംവിധായകനാണ്. തമിഴില് ഒരുപാട് നല്ല ഗാനങ്ങള് ഹാരിസ് ചിട്ടപ്പെടുത്തിയിട്ടുണ്ട്. ഇപ്പോഴിതാ കുട്ടിക്കാലത്തെ അപൂർവചിത്രം പങ്കുവച്ചിരിക്കുകയാണ് ഹാരിസ്. തന്റെ 48-ാം ജന്മദിനത്തില് അച്ഛനും അമ്മയ്ക്കും സഹോദരിക്കും ഒപ്പമുള്ള പഴയകാല ബ്ലാക്ക് ആന്ഡ് വൈറ്റ് ചിത്രം ഹാരിസ് ഷെയര് ചെയ്തു. തങ്ങളുടെ വീടിനു മുന്നിൽ വച്ചെടുത്ത ചിത്രമാണിതെന്ന് ഹാരിസ് ജയരാജ് കുറിച്ചു.
‘‘എന്നെ ഈ നിലയിലെത്തിച്ച എന്റെ അച്ഛനോടും അമ്മയോടും നന്ദി പറയാന് ഈ ജന്മദിനത്തിൽ ഞാൻ ആഗ്രഹിക്കുന്നു. എന്റെ അച്ഛൻ എന്നെ സംഗീതം പഠിപ്പിച്ചു. അമ്മ സ്നേഹം പ്രകടിപ്പിക്കാനും വിനയാന്വിതനായി കഴിയാനും പരിശീലിപ്പിച്ചു. നന്ദി’, ചിത്രത്തിനൊപ്പം ഹാരിസ് ജയരാജ് കുറിച്ചു. തന്റെ രണ്ടാം വയസ്സിലുള്ള ചിത്രമാണിതെന്നും ഹാരിസ് വെളിപ്പെടുത്തി.
ഹാരിസ് ജയരാജിന്റെ സോഷ്യല് മീഡിയ പോസ്റ്റ് ഇതിനകം തന്നെ വൈറൽ ആയിക്കഴിഞ്ഞു. അപൂർവചിത്രം കണ്ടതിന്റെ സന്തോഷത്തിലാണ് ആരാധകർ. 2001 ൽ ഗൗതം മേനോൻ സംവിധാനം ചെയ്ത ‘മിന്നലേ’ എന്ന ചിത്രത്തിലൂടെയാണ് ഹാരിസ് സംഗീതസംവിധാനരംഗത്ത് അരങ്ങേറ്റം കുറിച്ചത്. തുടർന്ന് തിരക്കുള്ള സംഗീതസംവിധായകനായി വളർന്നു. വലിയൊരു ആരാധക ശ്രേണി തന്നെ ഹാരിസിനുണ്ട്.
