കാസര്ഗോഡ്: കോളേജ് വിദ്യാര്ത്ഥിനി അഞ്ജു ശ്രീയുടേത് ആത്മഹത്യയാണെന്ന് സ്ഥിരീകരിച്ചതിന് പിന്നാലെ മരണകാരണം തേടി പോലീസ്. ഭക്ഷ്യവിഷബാധയല്ലെന്നും വിഷം ഉള്ളില് ചെന്നാണ് മരണമെന്നും പോസ്റ്റുമാര്ട്ടം റിപ്പോര്ട്ട് പുറത്തുവന്നതിന് പിന്നാലെ നടത്തിയ അന്വേഷണത്തില് അഞ്ജുവിന്റേത് ആത്മഹത്യയെന്ന് സംശയിക്കാവുന്ന കുറിപ്പും കിട്ടിയിരുന്നു.
പെണ്കുട്ടിയുടെ മൊബൈല് പരിശോധന നടത്തിയ പോലീസ് അഞ്ജുവിന് ഒരു ആണ്കുട്ടിയോട് അടുപ്പമുണ്ടായിരുന്നു എന്നും ഒന്നരമാസം മുമ്പ് ഇയാള് കാന്സര്ബാധിച്ച് മരണപ്പെട്ടതായും കണ്ടെത്തിയിട്ടുണ്ട്. രണ്ടു കൊല്ലമായുള്ള അടുപ്പമായിരുന്നു ഇത്. താന് കടുത്ത മാനസീക സമ്മര്ദ്ദത്തിലായിരുന്നു എന്നും എല്ലാവരോടും യാത്ര പറയുന്നു എന്നും അഞ്ജു എഴുതിയ കുറിപ്പാണ് പോലീസിന്റെ കൈവശം കിട്ടിയിരിക്കുന്നത്.
ജനുവരി 7 നായിരുന്നു അഞ്ജു മരണപ്പെട്ടത്. ജനുവരി 5 നാണ് ദേഹാസ്വാസ്ഥ്യത്തെ തുടര്ന്ന് അഞ്ജുവിനെ ആശുപത്രിയില് കാണിച്ചത്. പിറ്റേന്ന് ആരോഗ്യസ്ഥിതി കൂടുതല് ഗുരുതരമാകുകയും മംഗലാപുരത്ത് സ്വകാര്യ ആശുപത്രിയില് പ്രവേശിപ്പിക്കുകയുമായിരുന്നു. ഭക്ഷ്യവിഷബാധയെ തുടര്ന്നാണ് മരണം എന്ന ആരോപണം ഉയര്ന്നിരുന്നെങ്കിലും പിന്നീട് വിഷം ഉള്ളില് ചെന്നായിരുന്നു എന്ന് സ്ഥിരീകരിക്കുകയായിരുന്നു.
