മൂന്നാര്: മലനിരകളെയും തേയിലത്തോട്ടങ്ങളെയും മഞ്ഞുപുതപ്പിനടിയിലാക്കി മൂന്നാറില് അതിശൈത്യം. മൂന്നാറിലെ വട്ടവടയില് താപനില രണ്ടു ഡിഗ്രി സെല്ഷ്യസ് രേഖപ്പെടുത്തി. വരും ദിവസങ്ങളില് താപനില പൂജ്യത്തിലും താഴെയെത്തുമെന്നും ഫെബ്രുവരി വരെ തണുപ്പ് നീണ്ടു നില്ക്കുമെന്നുമാണ് കാലാവസ്ഥാ നിരീക്ഷണകേന്ദ്രം കണക്കാക്കുന്നത്.
വട്ടവട, സൈലന്റ്വാലി ഗൂഡാര്വിള, ചെണ്ടുവര പ്രദേശങ്ങളിലാണ് അതിശൈത്യം അനുഭവപ്പെടുന്നത്. സെവന്മല്ലയിലും ദേവികുളത്തും പൂജ്യം ഡിഗ്രി ഇന്നു രേഖപ്പെടുത്തി. ഈ വര്ഷത്തെ ഏറ്റവും കുറഞ്ഞ താപനിലയാണ് മൂന്നാറിലും പരിസര പ്രദേശങ്ങളിലും രേഖപ്പെടുത്തിയിരിക്കുന്നത്.
സാധാരണഗതിയില് ഡിസംബര് പകുതിയോടെ എത്തുന്ന അതിശൈത്യം ഇത്തവണ ജനുവരിയിലാണ് വന്നത്. ഇതോടെ ഇത്തവണത്തെ ശൈത്യം അല്പ്പം കൂടി മുമ്പോട്ട് പോകുമെന്നാണ് കാലാവസ്ഥാ വിദഗ്ദ്ധര് നല്കുന്ന സൂചനകള്.
താപനില താഴേയ്ക്ക് പോയതോടെ മൂന്നാറില് മഞ്ഞുപെയ്യാനും തുടങ്ങിയിട്ടുണ്ട്. തേയിലത്തോട്ടങ്ങളും മറ്റും വെളുത്തനിറമായി മാറിയിട്ടുണ്ട്. കാലാവസ്ഥ മാറിയതോടെ മൂന്നാറില് മഞ്ഞ് ആസ്വദിക്കാന് സഞ്ചാരികളുടെ തിരക്കും കൂടി. 20 ദിവസത്തോളം ശൈത്യം മൂന്നാറില് തുടരും.
