മുംബൈ: ദേശീയ സെലക്ടര്മാരുടെ ശ്രദ്ധ വീണ്ടും ആകര്ഷിച്ച് യുവതാരം പൃഥ്വിഷാ ഫോമിലേക്ക് ശക്തമായ തിരിച്ചുവരവ് നടത്തിയപ്പോള് രഞ്ജിട്രോഫിയില് പിറന്നത് ചരിത്രം. രഞ്ജിട്രോഫിയില് ഏറ്റവും ഉയര്ന്ന രണ്ടാമത്തെ സ്കോര് കുറിച്ച് മുംബൈ താരം പൃഥ്വിഷായുടെ ബാറ്റിംഗ് പ്രകടനം.
നാട്ടില് നടക്കാനിരിക്കുന്ന ന്യൂസിലന്റിനും ഓസ്ട്രേലിയയ്ക്കും എതിരേയുള്ള ടെസ്റ്റ് പരമ്പരയ്ക്കുള്ള ടീമിനെ പ്രഖ്യാപിക്കാനിരിക്കെ ആസ്സാമിനെതിരേയുള്ള മത്സരത്തില് ആദ്യ ഇന്നിംഗ്സില് 382 പന്തുകളില് താരം അടിച്ചുകുട്ടിയത് 379 റണ്സായിരുന്നു. രഞ്ജിയുടെ ചരിത്രത്തില് തന്നെ ഏറ്റവും ഉയര്ന്ന രണ്ടാമത്തെ വ്യക്തിഗത സ്കോറാണ്. ഗുവാഹത്തിയിലെ അമിഗോണ് ക്രിക്കറ്റ് ഗ്രൗണ്ടിലായിരുന്നു ഷായുടെ ബാറ്റിംഗ് വിരുന്ന്.
1948 ല് മഹാരാഷ്ട്രയ്ക്ക് വേണ്ടി കത്തിയവാഡയ്ക്ക് എതിരേ ഭൗസാഹേബ് നിംബാല്കുമാര് നേടിയ 443 റണ്സാണ് രഞ്ജിയിലെ ഏറ്റവും ഉയര്ന്ന വ്യക്തിഗത സ്കോര്. ഇന്ത്യയിലെ ഫസ്റ്റ്ക്ലാസ്സ് മത്സരങ്ങളിലെയും ഏറ്റവും ഉയര്ന്ന വ്യക്തിഗത സ്കോറാണ് ഷാ അടിച്ചത്.
കഴിഞ്ഞ ദിവസം 240 റണ്സിനാണ് പൃഥ്വി ചൊവ്വാഴ്ച മടങ്ങിയത്. ഇന്ന് താരം തന്റെ ആദ്യ ഫസ്റ്റ്ക്ലാസ്സ് ട്രിപ്പിള് പൂര്ത്തിയാക്കുകയും ചെയ്തു. അതേസമയം 400 റണ്സ് എടുക്കാന് താരത്തിനായില്ല. ലഞ്ചിന് മുമ്പുള്ള അവസാന ഓവറില് റിയാന് പരാഗ് ഷായെ വിക്കറ്റിന് മുന്നില് കുരുക്കി.
രഞ്ജിയില് മുംബൈയുടെ ഏറ്റവും ഉയര്ന്ന സ്കോറുമാണ് ഇത്. മുമ്പ് സഞ്ജയ് മഞ്ജ്രേക്കര് അടിച്ച 377 ആയിരുന്നു ഉയര്ന്ന സ്കോര്. രഞ്ജിയില് ട്രിപ്പിള് കുറിക്കുന്ന ഒമ്പതാമത്തെ താരമാണ് പൃഥ്വിഷാ.
ഇതിന് മുമ്പ് സ്വപ്നില് ഗുഗലേ (351), ചേതേശ്വര് പൂജാര (352), വിവിഎസ് ലക്ഷ്മണ് (353), സമിത് ഗോഹല് (359), എംവി. ശ്രീധര് (366), സഞ്ജയ് മഞ്ജ്രേക്കര് (377) എന്നിവരാണ് രഞ്ജിയില് ട്രിപ്പിള് നേടിയിട്ടുള്ള മറ്റു കളിക്കാര്. സെഞ്ച്വറി നേടിയ നായകന് അജിങ്ക്യാ രഹാനേയുമായി ചേര്ന്ന് 400 റണ്സിന്റെ കൂട്ടുകെട്ടാണ് ഷാ ഉണ്ടാക്കിയത്. രഹാനേ 131 റണ്സുമായി പുറത്താകാതെ നില്ക്കുകയാണ്.
