ഇന്സ്റ്റഗ്രാമില് ട്രെന്ഡുകള്ക്കൊപ്പം എത്തുന്ന ഡാന്സ് ചലഞ്ചുകള് ഏറ്റെടുക്കാത്തതായി അധികമാരും കാണില്ല. അതിന്റെ ഭാഗമായില്ലെങ്കിലും അവയെല്ലാം ആസ്വദിക്കുന്നവരാണ് ഇന്സ്റ്റഗ്രാം അനുയായികളില് ഭൂരിഭാഗവും. ഇത്തരം ചലഞ്ചുകളുമായി ജനങ്ങള്ക്കൊപ്പം ആദ്യം നിരയില് സെലിബ്രിറ്റി താരങ്ങളും എത്താറുണ്ട്. പ്രായഭേദമില്ലാതെ ഒഴിവു നേരങ്ങളെ ആനന്ദകരമാക്കാനും ആരാധകരെ സന്തോഷിപ്പിക്കാനും താരങ്ങള് ഇതിലൂടെ ശ്രമിക്കാറുണ്ട്.
കഴിഞ്ഞ കുറച്ചു നാളുകളായി നെറ്റ്ഫ്ളിക്സില് തരംഗം സൃഷ്ടിക്കുന്ന സീരിസാണ് വെനസ്ഡേ. സീരിസിലെ കേന്ദ്ര കഥാപാത്രമായ വെനസ്ഡേ ആഡംസിന്റെ പോപ്പുലര് ഡാന്സും പാട്ടുമെല്ലാം ഇന്സ്റ്റഗ്രാമില് ചലഞ്ചായി ആരാധകര് ഏറ്റെടുത്തിരിക്കുകയാണ്. ജെന്ന ഒര്ട്ടേഗയാണ് സീരിസില് വെനസ്ഡേയായി എത്തിയിരിക്കുന്നത്.
ഇപ്പോള് വെനസ്ഡേയായി വേഷ പകര്ച്ച നടത്തി ചലഞ്ചിന്റെ ഭാഗമായിരിക്കുകയാണ് ബോളീവുഡ് സൂപ്പര് താരം ശില്പ്പാ ഷെട്ടി. 'ഗൂ ഗൂ മക്ക്' എന്ന ഗാനത്തിനൊപ്പം നൃത്തമാടുന്ന രസകരമായ വീഡിയോ താരം തന്നെയാണ് പങ്കുവച്ചത്. നിമിഷ നേരങ്ങള്ക്കുള്ളില് വീഡിയോ വൈറലാകുകയും ചെയ്തു. സീരിസിലെ വെനസ്ഡേ ആഡംസിനെപോലെ കറുത്ത വസ്ത്രം ധരിച്ച് ഇരുവശത്തേക്കും മുടി പിന്നിയിട്ടാണ് ശില്പ്പ വീഡിയോയില് എത്തുന്നത്. പാട്ടിനൊപ്പം മുഖഭാവങ്ങള് ഇല്ലാതെയാണ് താരം നൃത്തം ചെയ്യുന്നത്. ഇതിനോടകം നിരവധി ആരാധകരാണ് വീഡിയോയ്ക്ക് കമന്റുകളുമായി രംഗത്തെത്തിയത്. പലരും ജെന്നയുടെ അടുത്തെത്താന്പോലും ശില്പ്പക്ക് കഴിഞ്ഞില്ലെന്ന് വാദിച്ചപ്പോള് മറ്റു ചിലര് താരത്തിന്റെ ശ്രമത്തെ അഭിനന്ദിക്കുകയും ചെയ്തു.
