ഏറെ ചര്ച്ചകള്ക്കൊടുവില് വിവാഹത്തിലെത്തിയ പങ്കാളികളാണ് നയന്താരയും വിഘ്നേഷ് ശിവനും. നീണ്ട കാലത്തെ പ്രണയത്തിനൊടുവിൽ ഇരുവരും വിവാഹിതരായത് തെന്നിന്ത്യൻ സിനിമ ആരാധകര് ഏറെ ആവേശത്തോടെയാണ് ഏറ്റെടുത്തത്. അതിനു പിന്നാലെ ഇവര്ക്ക് ഇരട്ടക്കുഞ്ഞുങ്ങള് ജനിച്ച വിശേഷവും ഇവര് സോഷ്യല് മീഡിയയിലൂടെ പങ്കുവച്ചിരുന്നു. സോഷ്യല് മീഡിയയില് ഏറെ സജീവമായ വിക്കി യാത്രാവിശേഷങ്ങളും ചിത്രങ്ങളുമൊക്കെ ഇതിലൂടെ പങ്കുവയ്ക്കാറുണ്ട്.
കേരളത്തെ ഏറെയിഷ്ടമുള്ള ആളാണ് വിക്കിയെന്ന് പലപ്പോഴും കേരളത്തിൽ എത്തിയ വിശേഷങ്ങളും ചിത്രങ്ങളും തന്റെ സോഷ്യൽ മീഡിയയിലൂടെ പങ്കുവയ്ക്കുമ്പോള് മനസ്സിലാകാറുണ്ട്. ഇപ്പോഴിതാ ശബരിമലയിലേക്ക് പോകുന്ന വിഘ്നേഷിന്റെ ഫോട്ടോയാണ് സോഷ്യല് മീഡിയ ഏറ്റെടുത്തിരിക്കുന്നത്. കറുപ്പണിഞ്ഞ് മാലയിട്ട് ശബരിമലയിലേക്ക് പോകാനായി എത്തിയ വിക്കി, എരുമേലിയിലേക്ക് പോകുന്ന വഴിയിലെ സൈൻ ബോർഡിന് മുന്നില് നിന്നെടുത്ത ചിത്രമാണ് പങ്കുവച്ചിരിക്കുന്നത്.
‘‘സ്വാമിയേ.. ശരണം അയ്യപ്പ...... നിന്നെ കാണാന് അവളുടന് വരും’’ എന്നാണ് ചിത്രത്തിന് വിക്കി ക്യാപ്ഷന് നല്കിയിരിക്കുന്നത്. ഇൻസ്റ്റാഗ്രാമിൽ ഇതിനോടകം മൂന്നു ലക്ഷത്തിലേറെ പേരാണ് ഈ ഫോട്ടോയ്ക്ക് ലൈക്ക് അടിച്ചിരിക്കുന്നത്.
അജിത്ത് നായകനായി എത്തുന്ന പുതിയ ചിത്രമാണ് വിഘ്നേഷിന്റേതായി വരാനിരിക്കുന്നത്. ചിത്രത്തില് തൃഷയാണ് നായികയായി എത്തുന്നത്. അനിരുദ്ധ് രവിചന്ദര് സംഗീത സംവിധാനം ചെയ്യുന്ന ചിത്രത്തില് അരവിന്ദ് സ്വാമി വില്ലനായി എത്തുമെന്നും കേള്ക്കുന്നുണ്ട്. അജിത്തിന്റെ കരിയറിലെ 62-ാമത്തെ സിനിമ ജനുവരി 17ന് ചിത്രത്തിന് തുടക്കമാകും എന്നും അടുത്ത വര്ഷം മധ്യത്തോടെ ചിത്രം റിലീസ് ചെയ്യുമെന്നാണ് ലൈക്ക പ്രൊഡക്ഷന്സ് അറിയിച്ചിരിക്കുന്നത്.
ഏഴ് വർഷത്തെ പ്രണയത്തിന് ഒടുവിൽ 2022 ജൂൺ 9ന് ആയിരുന്നു നയൻതാര- വിഘ്നേഷ് ശിവൻ വിവാഹം. മഹാബലിപുരത്തു വച്ച് നടന്ന വിവാഹ ചടങ്ങില് പ്രമുഖരായ നിരവധി സിനിമാ താരങ്ങളാണ് പങ്കെടുത്തത്. ഷാരൂഖ് ഖാന്, കമല് ഹാസന്, രജനികാന്ത്, സൂര്യ. ജ്യോതിക തുടങ്ങിയവര് വിവാഹത്തില് നിറസാന്നിധ്യമായിരുന്നു. നാനും റൗഡിതാൻ എന്ന സിനിമയുടെ സെറ്റിൽ വച്ചായിരുന്നു നയൻതാരയും വിഘ്നേഷും കണ്ടുമുട്ടി പ്രണയത്തിലായത്.
