അഹമ്മദാബാദ്: വര്‍ഗ്ഗീയ കലാപം കഴിഞ്ഞ് വര്‍ഷങ്ങള്‍ കഴിഞ്ഞിട്ടും ഇപ്പോഴും ലോകമാധ്യമങ്ങള്‍ ഗുജറാത്തിനെയും ബിജെപിയെയും നരേന്ദ്രമോഡിയെയും വെറുതേ വിടുന്നില്ല. എന്നാല്‍ മതസൗഹാര്‍ദ്ദത്തിന്റെ പേരില്‍ സൂറത്തിലെ പുനഗാമും അവിടുത്തെ ജനങ്ങളും പിന്നെ അവര്‍ കാത്തു സൂക്ഷിക്കുന്ന ഒരു മുസ്‌ളീം ദര്‍ഗയും വലിയ ശ്രദ്ധ നേടുകയാണ്.
സൗഹാര്‍ദ്ദത്തിന്റെ പേരിലാണ് ഇവിടുത്തെ ഹിന്ദുക്കളും മുസ്‌ളീങ്ങളും ശ്രദ്ധ നേടുന്നത്. 2022 ല്‍ വര്‍ഗ്ഗീയ കലാപം ഉണ്ടായ കാലത്തും ദര്‍ഗ പൊളിക്കാനും തകര്‍ക്കാനും എത്തിയവരെ നാട്ടുകാര്‍ ഒന്നു ചേര്‍ന്നു നിന്നു ചെറുത്തു തോല്‍പ്പിച്ചു. വര്‍ഷങ്ങളായി പൂന ഗ്രാമത്തിലെ പിര്‍ പാലിയയിലെ ഹിന്ദുക്കള്‍ സ്വന്തം പോലെ സൂക്ഷിക്കുന്ന ദര്‍ഗ നാട്ടുകാര്‍ ചേര്‍ന്ന് കേടുപാടുകള്‍ പരിഹരിക്കാനൊരുങ്ങുകയാണ്.
മതസൗഹാര്‍ദ്ദത്തിന്റെ അപൂര്‍വ്വ കാഴ്ചകളാണ് സൂററ്റിലെ പുനഗാവില്‍. വര്‍ഷങ്ങള്‍ക്ക് മുമ്പ് പിര്‍ പാലിയയില്‍ ജീവിച്ചിരുന്ന മുസ്‌ളീങ്ങളാണ് 'മിസ്‌രി പിര്‍ബാബ ദര്‍ഗ' പണി കഴിപ്പിച്ചത്. 1992-93 ല്‍ ബാബ്റി മസ്ജിദ് വര്‍ഗ്ഗീയ കലാപത്തിന് ശേഷം ഇവിടെയുള്ള മുസ്‌ളീം കുടുംബങ്ങള്‍ ഇവിടം വിട്ടു പോയിരുന്നു. ഇതിന് പിന്നാലെ ഏതാനം പേര്‍ അന്നും ദര്‍ഗ തകര്‍ക്കാന്‍ സംഘം ചേര്‍ന്നെത്തി. എന്നാല്‍ പിര്‍പാലിയയിലെ ഹിന്ദു കുടുംബങ്ങള്‍ സമ്മതിച്ചില്ല. അവര്‍ ദര്‍ഗയെ രക്ഷിച്ചു. അതിന് ശേഷം 30 വര്‍ഷമായി ഇവിടം വൃത്തിയായി സൂക്ഷിക്കുന്നതും പരിപാലിക്കുന്നതുമെല്ലാം അവരാണ്.
കഴിഞ്ഞ രണ്ടു വര്‍ഷമായി ഓടിപ്പോയ മുസ്‌ളീം കുടുംബങ്ങള്‍ ഇവിടേയ്ക്ക് തിരിച്ചു വന്നുകൊണ്ടിരിക്കുകയാണ്. ഏറെ സൗഹാര്‍ദ്ദത്തോടെയാണ് ഇവരെ നാട്ടുകാര്‍ സ്വീകരിക്കുന്നത്. ദര്‍ഗയില്‍ പ്രാര്‍ത്ഥനയ്ക്ക് എത്തുന്ന മുസ്‌ളീങ്ങള്‍ക്ക് ചായയും കുടിവെള്ളവും ഭക്ഷണവും അവര്‍ നല്‍കുന്നു. ദര്‍ഗയ്ക്ക് കാലപ്പഴക്കത്തിന്റേതായ ചെറിയ കുഴപ്പങ്ങള്‍ വന്നു തുടങ്ങിയിട്ടുണ്ട്. ഇപ്പോള്‍ അത് പരിഹരിച്ച് പഴയ രൂപത്തിലേക്ക് കൊണ്ടുവരാനുള്ള ആലോചനയിലാണ് നാട്ടുകാരിപ്പോള്‍. കുറേക്കാലം മുമ്പ് ദര്‍ഗ ഇവിടെ നിന്നും മാറ്റാന്‍ ചില ശ്രമങ്ങള്‍ നടന്നിരുന്നതായും നാട്ടുകാര്‍ പറയുന്നു.
ചത്ത പന്നിയെയും മറ്റും ഇവിടെ കൊണ്ടിട്ട് പ്രശ്‌നമുണ്ടാക്കാനുള്ള ശ്രമമായിരുന്നു. എന്നാല്‍ പ്രദേശവാസികള്‍ തന്നെ ഇതിനെതിരേ പോലീസില്‍ പരാതി നല്‍കി. ഇതോടെ ദര്‍ഗയ്ക്ക് ഇപ്പോള്‍ പോലീസ് പ്രൊട്ടക്ഷനും കിട്ടിയിട്ടുണ്ട്. റാം ആയാലും റഹീമായാലും ഞങ്ങള്‍ ഈ നാട്ടുകാര്‍ ഒന്നാണെന്നും പച്ചയോ കാവിയോ എന്നൊന്നും ആര്‍ക്കും വ്യത്യാസമില്ലെന്നും മുതിര്‍ന്ന ആള്‍ക്കാര്‍ പറയുന്നു.
കടപ്പാട് : ദി ന്യൂ ഇന്ത്യന്‍ എക്‌സ്പ്രസ്‌
Comments