മലയാളത്തിന്റെ മെഗാസ്റ്റാര് മമ്മൂട്ടിയുടെ ‘ക്രിസ്റ്റഫര്’ റിലീസിനൊരുങ്ങുകയാണ്. ബി.ഉണ്ണിക്കൃഷ്ണന്റെ സംവിധാനത്തില് പിറക്കുന്ന ഈ സിനിമ ഏറെ ആവേശത്തോടെയാണ് പ്രേക്ഷകര് കാത്തിരിക്കുന്നത്. സിനിമയുടെ പ്രൊമോഷന്റെ ഭാഗമായി ‘ക്രിസ്റ്റഫര്’ ടീം മുഴുവന് ദുബായിലേക്ക് പറന്നിരുന്നു.
ഇപ്പോഴിതാ ക്രിസ്റ്റഫറിന്റെ റിലീസിന് മുന്നോടിയായി അവിടെ വച്ച് നടത്തിയ വാര്ത്താസമ്മേളനത്തില് മമ്മൂട്ടി പറഞ്ഞ വാചകങ്ങളാണ് സോഷ്യല് മീഡിയയില് ഇടം പിടിക്കുന്നത്. മലയാള സിനിമയുടെ പുരോഗമനെത്തെക്കുറിച്ചും മാറ്റങ്ങളെക്കുറിച്ചുമെല്ലാം രസകരമായി മമ്മൂട്ടി മറുപടികള് പറഞ്ഞിരുന്നു. ഇതിനിടയില് എന്തുകൊണ്ട് മലയാള സിനിമകള് ഓസ്കാര് അവാര്ഡ് വേദിയിലെത്തുന്നില്ല എന്നൊരു ചോദ്യവും വന്നു. അതിന് അക്കമിട്ട്, കൃത്യമായ വിശദീകരണം മെഗാസ്റ്റാര് നല്കി. ഓസ്കറിന് മത്സരിക്കുന്ന സിനിമകളെ കുറിച്ച് നമ്മള് മനസ്സിലാക്കണം.
ഇംഗ്ലീഷ് സംസാരിക്കുന്ന സിനിമകളെ കുറിച്ച് നമ്മള് മനസ്സിലാക്കണം. ഇംഗ്ലീഷ് സംസാരിക്കുന്ന സിനിമകള്ക്കാണ് സാധാരണ ഓസ്കര് ലഭിക്കുക. അമേരിക്കയിലെ ന്യൂയോര്ക്ക് കൗണ്ടിയിലും ലോസ് ഏഞ്ചല്സ് കൗണ്ടിയിലും കുറഞ്ഞത് രണ്ടാഴ്ചയെങ്കിലും ഓടുന്ന സിനിമകള്ക്കാണ് ഓസ്കറിന് പരിഗണിക്കുക. അവിടെ അക്കാദമിയിലുള്ള ആറായിരം മെമ്പര്മാരെങ്കിലും അത് കണ്ടിരിക്കണം. മികച്ച വിദേശ ഭാഷാ ചിത്രത്തില് മാത്രമേ മലയാളത്തിന് മത്സരിക്കാന് സാധിക്കൂവെന്നും അതില് ഇന്ത്യയില് നിന്നുള്ള മറ്റു ഭാഷാ ചിത്രങ്ങളും ഉള്പ്പെടുമെന്നും മമ്മൂട്ടി പറഞ്ഞു.
സിനിമാ വിമര്ശനം അതിരുവിട്ട് പരിഹാസമാകരുതെന്നും മമ്മൂട്ടി പറഞ്ഞു. ഒരു സിനിമയെ പറ്റിയും അവകാശവാദം ഉന്നയിക്കാനില്ല. എത്ര ഗീര്വാണം അടിച്ചാലും ഇഷ്ടപ്പെട്ടില്ലെങ്കില് പ്രേക്ഷകര് കൈയ്യൊഴിയും..’’ എന്നാണ് മമ്മൂട്ടി പറഞ്ഞത്.
‘ക്രിസ്റ്റഫറി’നെ കുറിച്ച് കൂടുതല് ചോദിച്ചാല് ചുറ്റിപ്പോകുമെന്നും താരം പറയുന്നുണ്ട്. സിങ്ക് സൗണ്ട് ഉപയോഗിച്ചതിനെക്കുറിച്ചും കഥാപാത്രങ്ങളും സിനിമകളും എത്രത്തോളം മാറിയിട്ടുണ്ടെന്നും അതിനൊക്കെ കാരണം പുതുമ സ്വീകരിക്കാനുള്ള പ്രേക്ഷകന്റെ മനസ്സാണെന്നും മമ്മൂട്ടി സംസാരിച്ചു. വളരെ രസകരമായും പക്വതയോടെയുമായിരുന്നു മെഗാസ്റ്റാറിന്റെ വാര്ത്താസമ്മേളനം.
ബി ഉണ്ണികൃഷ്ണൻ സംവിധാനം ചെയ്യുന്ന ക്രിസ്റ്റഫര് ഫെബ്രുവരി 9ന് റിലീസിനെത്തും. ബയോഗ്രഫി ഓഫ് എ വിജിലന്റ് കോപ്പ് എന്ന ടാഗ് ലൈനോടെ എത്തുന്ന ചിത്രത്തിൻ്റെ തിരക്കഥ ഒരുക്കുന്നത് ഉദയകൃഷ്ണയാണ്. തെന്നിന്ത്യന് താരം വിനയ് റായിയും ഒരു പ്രധാന കഥാപാത്രത്തെ അവതരിപ്പിക്കുന്നു. നായികമാരായി അമല പോള്, സ്നേഹ, ഐശ്വര്യ ലക്ഷ്മി എന്നിവരാണ് അഭിനയിക്കുന്നത്. ശരത്ത് കുമാർ, ദിലീഷ് പോത്തന്, സിദ്ദിഖ്, ജിനു എബ്രഹാം, ദീപക് പറമ്പോൾ, ജസ്റ്റിൻ, കലേഷ്, അതിഥി രവി ,വിനീത കോശി, വാസന്തി തുടങ്ങിയവരാണ് മറ്റ് പ്രധാന കഥാപാത്രങ്ങളാവുന്നത്.
