കൊലപാതകശ്രമത്തിന് 2006 മുതല് ഇന്റര്പോള് തിരയുന്ന ഇറ്റാലിയന് മാഫിയ കൊലപാതകി അറസ്റ്റിലായി. ഫ്രഞ്ച് നഗരമായ സെയ്ന്റ് എറ്റിയനിലെ റസ്റ്റോറന്റില് പിസാ ഷെഫായി ജോലി ചെയ്യുകയായിരുന്നു 63 കാരനായ ഇയാള്.
തെക്കന് ഇറ്റലിയിലെ കാലാബ്രിയയിലെ മാഫിയകളിലൊന്നായ 'എന്ഡ്രംഗേറ്റ' യിലെ പ്രധാനികളില് ഒരാളാണ് അറസ്റ്റിലായ എഡ്ഗാര്ഡോ ഗ്രെക്കോ.'അപകടകാരിയായ ഒളിച്ചോട്ടക്കാരന്'എന്നാണ് ഇയാള് വിശേഷിപ്പിക്കപ്പെടുന്നത്.
1990 കളുടെ തുടക്കത്തില് മാഫിയാ സംഘങ്ങളായ പെര്ന പ്രണോ സംഘവും, പിനോ സേനയും തമ്മില് നടന്ന ഗ്യാംഗ് വാറിന്റെ ഭാഗമായി എമിലിയോ മോസ്സിയറോയെ കൊലപ്പെടുത്താന് ശ്രമിച്ച കേസ് ഉള്പ്പെടെ നിരവധി കേസുകളില് പ്രതിയാണ് ഗ്രെക്കോ . 17 വര്ഷമായി ഒളിവ് ജീവിതം നയിച്ച ഇയാള് ചെയ്ത കൊലപാതകങ്ങള്ക്കു ശിക്ഷയായി ജീവപര്യന്തം തടവ് അനുഭവിക്കേണ്ടി വരുമെന്നാണ് ഇന്റര്പോള് റിപ്പോര്ട്ട്.
ഇറ്റലിയിലെ ഏറ്റവും വലുതും, ശക്തവുമായ സംഘടനയായിട്ടാണ് എന്ഡ്രംഗേറ്റ അറിയപ്പെടുന്നത്. യൂറോപ്പിലെ തെക്കേ അമേരിക്കന് കൊക്കൈയ്ന് വ്യാപാരവുമായി ആഗോള ബന്ധമുളള അപകടകരമായ ക്രൈം ഗ്രൂപ്പായി ഇവരെ കണക്കാക്കുന്നു.
