‘അമ്പിളിക്കല ചൂടും നിന് തിരു ജടയിലീ...’ എന്ന ഒറ്റ പാട്ടു മതി മലയാളികള് ഭാനുപ്രിയ എന്ന നടിയെ ഓര്ക്കാന്. പിന്നീടിങ്ങോട്ട് കാമ്പുള്ള ഒരുപാട് നല്ല കഥാപാത്രങ്ങള് മലയാള സിനിമയ്ക്ക് ഭാനുപ്രിയ നല്കിയിട്ടുണ്ട്. സൗന്ദര്യം കൊണ്ട് മാത്രമല്ല, അഭിനയവും നൃത്തവും നന്നായി വഴങ്ങിയിരുന്നു താരത്തിന്. എന്നാലിപ്പോള് ഞെട്ടിക്കുന്ന വെളിപ്പെടുത്തലുകള് നടത്തിയിരിക്കുകയാണ് താരം. തനിക്ക് ഓർമക്കുറവ് നേരിടുന്നതായി വെളിപ്പെടുത്തി നടി ഭാനുപ്രിയ. പഠിച്ച ചില കാര്യങ്ങൾ മറന്നുപോകുന്നുണ്ടെന്നും ഇത് മൂലം നൃത്തത്തോടുള്ള താൽപര്യം വരെ കുറഞ്ഞതായും താരം പറയുന്നു. ഒരു തെലുങ്ക് ചാനലിന് നൽകിയ അഭിമുഖത്തിലാണ് താരമിത് പറഞ്ഞത്. അടുത്തിടെ ഒരു സിനിമാ ലൊക്കേഷനിൽ വച്ച് ഡയലോഗുകൾ വരെ മറന്നുപോയി എന്നും ഭാനുപ്രിയ വെളിപ്പെടുത്തി.
‘‘എനിക്ക് ഈയിടെയായി സുഖമില്ല. ഓർമശക്തി കുറയുന്നു. പഠിച്ച ചില കാര്യങ്ങൾ ഞാൻ മറന്നു. പിന്നീട് നൃത്തത്തോടുള്ള താൽപര്യം കുറഞ്ഞു. വീട്ടിൽ പോലും ഞാൻ നൃത്തം പരിശീലിക്കാറില്ല. കഴിഞ്ഞ രണ്ട് വർഷമായി തനിക്ക് ഓർമക്കുറവ് അനുഭവപ്പെടുന്നുണ്ട്. അടുത്തിടെ 'സില നേരങ്ങളിൽ സില മനിദർഗൾ' എന്ന സിനിമയിലൂടെ സെറ്റിൽ വച്ച് ഡയലോഗുകൾ വരെ മറന്നുപോയി. പിരിമുറുക്കമോ വിഷാദമോ എന്നെ അലട്ടുന്നില്ല. മറവിക്ക് കാരണം മോശം ആരോഗ്യാവസ്ഥ മാത്രമാണ്. ചില മരുന്നുകൾ കഴിക്കുന്നുണ്ട്...’’ താരം പറയുന്നു. ഭർത്താവിന്റെ മരണശേഷം ഓർമക്കുറവ് വഷളായതെന്നും ഇക്കാരണത്താലാണ് നൃത്തവിദ്യാലയം തുടങ്ങാനുള്ള ആലോചന ഉപേക്ഷിച്ചതെന്നും അവർ പങ്കുവെച്ചു.
ഇടയ്ക്ക് ഭള്ത്താവുമായി പിരിഞ്ഞു എന്ന വാര്ത്ത ഭാനുപ്രിയയുടെ പേരില് കേട്ടിരുന്നു. എന്നാല് ആ വാര്ത്ത തെറ്റായിരുന്നുവെന്നും താരം പറയുന്നു. ഭാനുപ്രിയയുടെ ഭർത്താവ് ആദർശ് 2018-ൽ ഹൃദയാഘാതം മൂലം മരിച്ചിരുന്നു. ലണ്ടനിലെ ലോഫ്ബറോ യൂണിവേഴ്സിറ്റി വിദ്യാർഥിനിയായ അഭിനയ ഇവരുടെ ഏകമകളാണ്. അവധി കിട്ടുമ്പോള് മകള് നാട്ടില് വരാറുണ്ടെന്നും താരം പറയുന്നു. ചെന്നൈയിൽ അമ്മയ്ക്കും സഹോദരനുമൊപ്പമാണ് ഭാനുപ്രിയ ഇപ്പോള് താമസിക്കുന്നത്.
തൊണ്ണൂറുകളിൽ തെന്നിന്ത്യൻ താരസുന്ദരിയായി അരങ്ങു വാണ ഭാനുപ്രിയ തെലുങ്കിലും, തമിഴിലും മലയാളത്തിലുമടക്കം മികച്ച സിനിമകൾ ചെയ്തു. ഇടയ്ക്ക് ഹിന്ദി സിനിമകളിലും നായികയായി തിളങ്ങി. രാജശില്പി, അഴകിയ രാവണൻ, കൊച്ചു കൊച്ചു സന്തോഷങ്ങൾ, ഹൈവേ, കുലം തുടങ്ങിയ ചിത്രങ്ങളിലൂടെ മലയാളികളുടെയും പ്രിയ താരമായി. 2006 ൽ പുറത്തിറങ്ങിയ രാത്രിമഴയാണ് ഭാനുപ്രിയ അവസാനം അഭിനയിച്ച മലയാള ചിത്രം. ശിവകാർത്തികേയൻ നായകനാകുന്ന സയൻസ് ഫിക്ഷൻ ചിത്രം അയലാന് ആണ് ഭാനുപ്രിയയുടേതായി ഇനി ഇറങ്ങാനുള്ള ചിത്രം.
