കൊച്ചി: തെക്കേത്തല വറീതിന്റെയും മര്ഗലീത്തയുടെയും മകനായി 1948 ഫിബ്രവരി 28ന് ഇരിങ്ങാലക്കുടയില് ജനിച്ചു. എട്ട് കുട്ടികളുള്ള മാതാപിതാക്കളുടെ അഞ്ചാമത്തെ കുട്ടിയും മൂന്നാമത്തെ ആണ്തരിയുമായിട്ടാണ് ഇന്നസെന്റ് ജനിച്ചത്. ലിറ്റില് ഫ്ലവര് കോണ്വെന്റ് ഹൈസ്കൂള്, നാഷണല് ഹൈസ്കൂള്, ഡോണ് ബോസ്കോ എസ്.എന്.എച്ച്.സ്കൂള് എന്നിവിടങ്ങളില് പഠിച്ചു. എട്ടാം ക്ലാസ്സില് പഠിപ്പ് നിര്ത്തി. പഠിപ്പ് താങ്ങാനാകാതെയാണ് നിര്ത്തിയത്.
പല ജോലികളും മാറി മാറി ചെയ്തു. ഇടയ്ക്ക് രാഷ്ര്ടീയ രംഗത്ത് പ്രവര്ത്തിച്ചു. മുനിസിപ്പല് കൗണ്സിലറായി. സംവിധായകന് മോഹന് മുഖേനയാണ് സിനിമാരംഗത്തു വരുന്നത്. ആദ്യ സിനിമ നൃത്തശാലയാണ് (1972). തുടര്ന്നും ചില ചിത്രങ്ങളില് ചെറിയ വേഷങ്ങളില് അഭിനയിച്ചു. ഡേവിഡ് കാച്ചപ്പിള്ളിയുമായി ചേര്ന്ന് ശത്രു കംെബെന്സ് എന്ന സിനിമാ നിര്മാണ കമ്പനി തുടങ്ങി. ഈ ബാനറില് ഇളക്കങ്ങള്, വിട പറയും മുമ്പേ, ഓര്മയ്ക്കായി, ലേഖയുടെ മരണം ഒരു ഫ്ലാഷ് ബാക്ക്, ഒരു കഥ ഒരു നുണക്കഥ തുടങ്ങിയ ചിത്രങ്ങള് നിര്മിച്ചു.
1989 ല് ഇറങ്ങിയ റാംജിറാവു സ്പീക്കിംഗ് ആണ് ഇന്നസെന്റിന്റെ അഭിനയജീവിതത്തില് ഒരു വഴിത്തിരിവായത്. റാംജിറാവുവിലെ മാന്നാര് മത്തായി എന്ന കോമഡി കഥാപാത്രം വലിയ ജനപ്രീതി നേടുകയും ധാരാളം ആരാധകരെ നേടിക്കൊടുക്കുകയുംചെയ്തു. തുടര്ന്ന് ഗജകേസരി യോഗം, ഗോഡ് ഫാദര്, കിലുക്കം, വിയ്റ്റ്നാം കോളനി, ദേവാസുരം, കാബൂളിവാല, രാവണപ്രഭു, ഹിറ്റ്ലര്, മനസിനക്കരെ, ഡോളി സജാകെ് രഖ്ന, മാലാമാല് വീക്കിലി (ഹിന്ദി), ശിക്കാരി (കന്നട), ലേസാ ലേസാ (തമിഴ്) എന്നിങ്ങനെ നിരവധി സൂപ്പര്ഹിറ്റ് സിനിമകളില് മികച്ച കഥാപാത്രങ്ങളെ അവതരിപ്പിയ്ക്കുകയും അവയെല്ലാം പ്രേക്ഷക പ്രീതി നേടുകയും ചെയ്തു. അറുനൂറിലധികം ചലച്ചിത്രങ്ങളില് അഭിനയിച്ചിട്ടുണ്ട്. രണ്ടു സിനിമകള്ക്ക് അദ്ദേഹം കഥ എഴുതിയിട്ടുണ്ട്. ചില സിനിമകളില് പാട്ടുപാടി താനൊരു ഗായകന് കൂടിയാണെന്ന് തെളിയിച്ചിട്ടുണ്ട്.
സത്യന് അന്തിക്കാടിന്റെ മഴവില് കാവടി എന്ന സിനിമയ്ക്ക് മികച്ച സഹനടനുള്ള സംസ്ഥാന അവാര്ഡ് ലഭിച്ചു. 2009ലെ മികച്ച നടനുള്ള ഫിലിം ക്രിട്ടിക്സ് അവാര്ഡ് ഇന്നസെന്റിന് ലഭിച്ചു. മികച്ച സഹനടനുള്ള ഫിലിം ക്രിട്ടിക്സ് അവാര്ഡും ലഭിച്ചിട്ടുണ്ട്. കഴിഞ്ഞ 11 വര്ഷമായി ചലച്ചിത്ര നടീനടന്മാരുടെ സംഘടനയായ അമ്മയുടെ പ്രസിഡന്റ്. നല്ലൊരു എഴുത്തുകാരന് കൂടിയായ ഇന്നസെന്റ് നാലു പുസ്തകങ്ങള് എഴുതി പ്രസിദ്ധീകരിച്ചിട്ടുണ്ട്. ഞാന് ഇന്നസെന്റ്, മഴക്കണ്ണാടി, ചിരിയ്ക്കുപിന്നില് (ആത്മകഥ), കാന്സര്വാര്ഡിലെചിരി എന്നിവയാണ്. കണ്ഠത്തില് ക്യാന്സര് ബാധിച്ച് കുറച്ചുകാലം ചികിത്സാര്ത്ഥം ആശുപത്രിയില് കിടന്നതിന്റെ അനുഭവങ്ങളാണ് ക്യാന്സര്വാര്ഡിലെ ചിരി എന്ന പുസ്തകം.
2014 ലെ ലോക്സഭാ ഇലക്്ഷനില് ഇന്നസെന്റ് എല്.ഡി.എഫ്. സ്വതന്ത്ര സ്ഥാനാര്ഥിയായി മത്സരിച്ച് ജയിക്കുകയും എം.പിയാകുകയും ചെയ്തു. സ്വകാര്യ ജീവിതം 1976 സെപ്റ്റംബര് 26-ന് ആലീസിനെ വിവാഹം കഴിച്ച അദ്ദേഹത്തിന്റെ ഏകമകന് സോണറ്റ്. മരുമകള്: രശ്മി സോണറ്റ്. ചെറുമക്കള്: ഇന്നസെന്റ് സോണറ്റ്, അന്ന സോണറ്റ്. വിലാസം: പാര്പ്പിടം, ഇരിങ്ങാലക്കുട, തൃശ്ശൂര്.
