ബംഗലുരു: കര്ണാടകാ നിയമസഭാ തെരഞ്ഞെടുപ്പു തൊട്ടടുത്ത് നില്ക്കേ രാഷ്ട്രീയ നാടകങ്ങള് തുടരുമ്പോള് പ്രമുഖ കന്നഡ നടന് കിച്ചാ സുദീപ് ബിജെപിയില് ചേരുമെന്ന് റിപ്പോര്ട്ടിന് പിന്നാലെ അദ്ദേഹത്തിന് ഭീഷണിക്കത്ത് ലഭിച്ചു. ബംഗലുരുവില് നടക്കുന്ന ചടങ്ങില് കര്ണാടകാ മുഖ്യമന്ത്രി സിഎം ബസവരാജ് ബൊമൈയുടെയും മറ്റ് നേതാക്കളുടെയും സാന്നിദ്ധ്യത്തിലാകും താരം ബിജെപിയില് അംഗത്വം എടുക്കുക.
തെരഞ്ഞെടുപ്പ് നടക്കാനിരിക്കെ ബിജെപിയില് ചേരുന്ന രണ്ടാമത്തെ നടനാണ് സുദീപ്. നേരത്തേ പ്രമുഖനടന് ദര്ശന് തുഗുദീപ ബിജെപിയില് ചേരുന്നതായി വാര്ത്ത വന്നിരുന്നു. രണ്ടുപേരുടേയും തീരുമാനം ബിജെപി നേതാവ് കൂടിയായ ബസവരാജ് ബൊമൈ സ്വാഗതം ചെയ്തു. കിച്ചാ സുദീപ് ബിജെപിയില് ചേരുന്ന വാര്ത്ത ഇന്റര്നെറ്റില് പെട്ടെന്ന് തന്നെ വൈറലായിട്ടുണ്ട്.
കിച്ചാ സുദീപിന്റെ രാഷ്ട്രീയ വാര്ത്ത പുറത്തുവന്നതിന് പിന്നാലെ താരത്തിന് അജ്ഞാതനില് നിന്നും ഭീഷണിക്കത്തും വന്നതായി വാര്ത്തയുണ്ട്. താരത്തിന്റെ സ്വകാര്യ വീഡിയോകള് ഓണ്ലൈന് വഴി പുറത്തുവിടുമെന്നാണ് ഭീഷണിക്കത്തില് പറഞ്ഞിരിക്കുന്നത്. മോശമായ ഭാഷയിലാണ് കത്തിലെ വാക്കുകള്. സുദീപിന്റെ മാനേജര് ജാക്ക് മഞ്ജുവിനാണ് കത്തു വന്നത്. തുടര്ന്ന് താരം പുട്ടനഹള്ളി പോലീസ് സ്റ്റേഷനില് പരാതി നല്കുകയും ചെയ്തിട്ടുണ്ട്. ഈച്ച എന്ന സിനിമയിലൂടെ മലയാളി പ്രേക്ഷകര്ക്കും ഏറെ പരിചയമുള്ള നടനാണ് കിച്ച സുദീപ്.
