ചുരുങ്ങിയ കാലം കൊണ്ട് പ്രേക്ഷകരുടെ മനസ്സില് ഇടം നേടിയ താരമാണ് സിജു വില്സണ്. നായകനൊപ്പം ചേര്ന്നു നില്ക്കുന്ന സുഹൃത്ത് കഥാപാത്രമായി മലയാള സിനിമയിലെത്തി പിന്നീട് വില്ലനായും പത്തൊന്പതാം നൂറ്റാണ്ട് എന്ന ബിഗ് ബജറ്റ് സിനിമയില് നായകനായും സിജു തിളങ്ങി. സോഷ്യല് മീഡിയയില് സജീവമായ താരം എല്ലാ വിശേഷങ്ങളും ആരാധകരുമായി പങ്കുവയ്ക്കാന് ഈ പ്ലാറ്റ്ഫോം ഉപയോഗിക്കാറുണ്ട്. ഇപ്പോഴിതാ ആദ്യ ഷൂട്ടിംഗ് ദിനത്തെക്കുറിച്ചും അന്ന് മലയാളികളുടെ പ്രിയ താരം ജഗതിയെ കണ്ടതിനെക്കുറിച്ചും സോഷ്യല് മീഡിയ കുറിപ്പ് പങ്കുവച്ചിരിക്കുകയാണ് സിജു.
‘‘എന്റെ സിനിമ സ്വപ്നങ്ങൾ സാധ്യമായ ആദ്യ ദിനം.. മലർവാടി ആർട്സ് ക്ലബ് എന്ന സിനിമയുടെ ഷൂട്ടിനു ഷൊർണൂർ, പാഞാൾ എത്തിയിരിക്കുന്നു. സോങ് ഷൂട്ട് ആണ് ‘ലവൻ കഷ്മലൻ’ ( ഈ സോങ് സിനിമയിൽ ഉൾപ്പെടുത്തിയിട്ടില്ല ). അന്നാണ് ആദ്യമായി ജഗതി ചേട്ടനെ (പ്രിയപ്പെട്ടവരുടെ അമ്പിളിചേട്ടനെ) നേരിൽ കാണുന്നതും, പരിചയപ്പെടുന്നതും, അദ്ദേഹം അഭിനയിക്കുന്നത് നേരിൽ കാണുന്നതും .. ഒരു തുടക്കക്കാരൻ എന്ന നിലയിൽ മലയാളത്തിലെ തന്നെ ഏറ്റവും മികവുറ്റ കലാകാരന്മാരിൽ ഒരാളായ അദ്ദേഹത്തിന്റെ മുഖത്തു ഞൊടിയിടയിൽ ഭാവങ്ങൾ മിന്നി മറയുന്നത് അങ്ങ് ദൂരെ നിന്ന് കണ്ട കൗതുകവും, ആശ്ചര്യവും, സന്തോഷവും, എന്നും ജീവിതത്തിൽ ഓർമ്മയിൽ നിൽക്കുന്ന നല്ലൊരു അനുഭവമാണ്, നല്ലൊരു പാഠമാണ് . പതിമൂന്നു വർഷങ്ങൾക്കു ശേഷം ഇന്ന് വീണ്ടും കാണാനുള്ള അവസരം ലഭിച്ചു. ഒരുപാട് മുഖങ്ങൾ അദ്ദേഹത്തിന്റെ ഉള്ളിൽ മിന്നി ഓടിയിരിക്കാം.. അദ്ദേഹത്തിന്റെ ഒരുപാടു കഥാപാത്രങ്ങളും, ആദ്യ സിനിമ ഷൂട്ടിന്റെ ഓർമ്മകളും എന്റെ ഉള്ളിൽ നിറഞ്ഞു ഓടി വന്നത് പോലെ...’’ കുറിപ്പിനൊപ്പം ജഗതി ശ്രീകുമാറിന്റെ കൂടെയുള്ള ചിത്രവും സിജു ഷെയര് ചെയ്തിട്ടുണ്ട്.
