‘ആനന്ദം’ എന്ന സിനിമയിലൂടെ മലയാള സിനിമയില് അരങ്ങേറ്റം കുറിച്ച സംവിധായകന് ഗണേഷിന്റെ പുതിയ ചിത്രം ‘പൂക്കാലം’ പ്രേക്ഷകര് ഇരുകൈയും നീട്ടി സ്വീകരിക്കുകയാണ്. തിയേറ്ററില് മികച്ച അഭിപ്രായം നേടി മുന്നേറിക്കൊണ്ടിരിക്കുന്ന ഈ സിനിമയും ഇതിലെ കഥാപാത്രങ്ങളും പ്രേക്ഷകര് ഏറ്റെടുത്തിട്ടുണ്ട്. വിജയ രാഘവൻ്റെ കരിയറിലെ തന്നെ മികച്ച കഥാപാത്രമായി മാറിയിരിക്കുകയാണ് ഇച്ചാപ്പയെന്ന് എല്ലാവരും വിളിക്കുന്ന ഇട്ടൂപ്പ്. ഇച്ചാപ്പയുടെ ഭാര്യ കൊച്ചുത്രേസ്യാമ എന്ന ഇച്ചാമ്മയായി കെപിഎസി ലീലയും പ്രേക്ഷക മനസ് കീഴടക്കുകയാണ് ചിത്രത്തിൽ. ഇപ്പോഴിതാ ഈ സിനിമയുടെ ഒരു നൊസ്റ്റാള്ജിക് വീഡിയോ പങ്കുവച്ചിരിക്കുകയാണ് നടനും ഗായകനും സംവിധായകനുമൊക്കെയായ വിനീത് ശ്രീനിവാസന്. തിയേറ്റര് വിസിറ്റിനെത്തിയ വിജയരാഘവനും കെപിഎസി ലീലയും കാണുന്നതും കെട്ടിപ്പിടിച്ച് സന്തോഷം പങ്കിടുന്നതുമാണ് വീഡിയോ. ‘‘നമ്മുടെ പ്രിയപ്പെട്ട നായകനും നായികയും!!! എല്ലാ സ്നേഹത്തിനും നന്ദി...’’ എന്നാണ് വീഡിയോയ്ക്കൊപ്പം വിനീത് കുറിച്ചിരിക്കുന്നത്. സിനിമയില് ജഡ്ജി കഥാപാത്രമായി വിനീതും തിളങ്ങുന്നുണ്ട്.
‘പൂക്കാല’ത്തിലെ ഇച്ചാപ്പയുടെ കുടുംബാംഗങ്ങളും അവരുടെ ജീവിതവുമായി ബന്ധപ്പെട്ടുമുള്ള കഥ സിനിമയില് പറയുമ്പോള് വലിയൊരു താരനിരയും അതിനൊപ്പം അണിനിരക്കുന്നുണ്ട്. ഓരോ കഥാപാത്രങ്ങളെയും പുതുമയോടും രസകരമായും അവതരിപ്പിക്കാൻ സംവിധായകന് കഴിഞ്ഞിട്ടുണ്ട് എന്നതു തന്നെയാണ് സിനിമയുടെ വിജയം.
