ഗൊരഖ്പൂര്: മുമ്പ് ജനങ്ങളെ ഭയപ്പെടുത്തിയിരുന്ന നിയമവിരുദ്ധ പ്രവര്ത്തനങ്ങള്ക്കും സാമൂഹ്യവിരുദ്ധ കാര്യങ്ങള്ക്കും യുപിയുടെ മണ്ണില് ഇടമില്ലെന്ന് ഉത്തര്പ്രദേശ് മുഖ്യമന്ത്രി യോഗി ആദിത്യനാഥ്. ഇത്തരക്കാരെ കോടതി ശിക്ഷിച്ചതോടെ ഇപ്പോള് അവരുടെ പാന്റ് നനയുമെന്നും പറഞ്ഞു.
പെപ്സിക്കോയുടെ ഫ്രാഞ്ചൈസിയായ വരുണ് ബീവറേജസിന്റെ ശിലാസ്ഥാപനവുമായി ബന്ധപ്പെട്ട ചടങ്ങിലെ ഭൂമിപൂജയിലായിരുന്നു യോഗിയുടെ പ്രതികരണം. ഉത്തര്പ്രദേശില് നിയമവ്യവസ്ഥ ശക്തമാണെന്നും അതിനെ മറികടക്കാന് ആരേയും അനുവദിക്കില്ലെന്നും പറഞ്ഞു.
ജനങ്ങളുടെ ജീവിതത്തിന് എതിര് നില്ക്കുന്ന അവരുടെ ശത്രുക്കളായ മാഫിയ ഇപ്പോള് ഭയത്തിലാണ്. ജനങ്ങളെ ഭീതിപ്പെടുത്തുന്നവര്ക്കെതിരേ കോടതി ശിക്ഷ വിധിക്കാന് തുടങ്ങിയതോടെ ഇവരെല്ലാം വലിയ ഭീതിയിലാണ്. ഇപ്പോള് അവര് പാന്റില് മൂത്രമൊഴിക്കുമെന്നും യോഗി പറഞ്ഞു.
നിക്ഷേപകര്ക്ക് അവരുടെ മൂലധനത്തിന് സംസ്ഥാനം പൂര്ണ്ണ സുരക്ഷാഗ്യാരന്റിയാണ് ഇപ്പോള് നല്കുന്നത്. ജനങ്ങള്ക്ക് പൂര്ണ്ണ സുരക്ഷ നല്കാന് ബാദ്ധ്യസ്ഥരാണെന്നും അത് അവര്ക്ക് സന്തോഷവും സമൃദ്ധിയും കൊണ്ടുവരുന്നുണ്ടെന്നും പറഞ്ഞു.
നേരത്തേ ബിസിനസുകാരെ മാഫിയയും ഗുണ്ടകളും ചേര്ന്ന് ഭീഷണിപ്പെടുത്തുകയും തട്ടിക്കൊണ്ടു പോകുകയും ചെയ്യുമായിരുന്നു. എന്നാല് ഇപ്പോ ള് ആ ഭീതി ഒഴിഞ്ഞിരിക്കുകയാണെന്നും പറഞ്ഞു. കലാപവും അരാജകത്വവും കണ്ടിരുന്ന സംസ്ഥാനം ആറു വര്ഷം മുമ്പ് പൂര്ണ്ണമായും മാറി. ഇത്തവണ രാമനവമിക്ക് രാജ്യത്തിന്റെ പല ഭാഗത്തും കലാപം കണ്ടപ്പോള് ഉത്തര്പ്രദേശില് അത് സമാധാനപരമായിരുന്നു.
അയോദ്ധ്യയിലെ രാമന്റെ ജന്മദേശത്ത് 33 ലക്ഷം പേരാണ് സന്ദര്ശിച്ചത്. സംസ്ഥാനത്തിന്റെ പല ഭാഗങ്ങളില് നിന്നായി 1000 ലധികം ശോഭായാത്രകള് ഇവിടേയ്ക്ക് എത്തിച്ചേര്ന്നു. ഹിന്ദുക്കളും മുസ്ളീങ്ങളും അവയ്ക്ക്മേല് പുഷ്പവൃഷ്ടി നടത്തി.
ഹനുമാന് ജയന്തിയില് 500 ശോഭായാത്രകളാണ് വന്നത്. ഇവയെല്ലാം സംസ്ഥാനത്ത് നടന്നത് സമാധാനപരമായിരുന്നെന്നും ബോംബുകള്ക്ക് പകരം പുഷ്പങ്ങളാണ് ഇപ്പോള് ആഘോഷവേളകളില് നടക്കുന്നതെന്നും യോഗി പറഞ്ഞു.
