‘ആനന്ദം’ എന്ന സിനിമയിലൂടെ മലയാള സിനിമാപ്രേക്ഷകരുടെ മനസ്സിലിടം നേടിയ സംവിധായകനാണ് ഗണേശ് രാജ്. ഗണേശിന്റെ ഏറ്റവും പുതിയ സിനിമയായ ‘പൂക്കാലം’ തിയേറ്ററില് മികച്ച വിജയം നേടി മുന്നേറിക്കൊണ്ടിരിക്കുകയാണ്. ഗണേഷ് രചനയും സംവിധാനവും നിര്വ്വഹിച്ച പൂക്കാലം ഒരു ഇടത്തരം കുടുംബത്തിലെ നൂറ് വയസ്സുള്ള ദമ്പതിമാരുടെ കഥ പറയുന്ന ചിത്രമാണ്. ചിത്രത്തിലെ കേന്ദ്ര കഥാപാത്രങ്ങളായി നൂറ് വയസ്സുകാരന് ഇട്ടൂപ്പായി വിജയരാഘവനും കൊച്ചുത്രേസ്യാമ്മയായി കെപിഎസി ലീലയുമാണ് പ്രേക്ഷകരുടെ മനം കവരുന്നത്. വിജയരാഘവന്റെ മേക്കോവര് ചിത്രങ്ങള് സോഷ്യല് മീഡിയയില് ശ്രദ്ധിക്കപ്പെട്ടിരുന്നു. ഇപ്പോഴിതാ സിനിമയില് ജഡ്ജ് വേഷത്തില് തിളങ്ങി നില്ക്കുന്ന വിനീത് ശ്രീനിവാസന് വിജയരാഘവന്റെ മേക്കോവര് വീഡിയോ പുറത്തുവിട്ടിരിക്കുകയാണ്. ‘‘പൂക്കാലത്തിന് ഇട്ടൂപ്പായി വിജയരാഘവൻ അങ്കിളിന്റെ രൂപമാറ്റം..’’ എന്ന ക്യാപ്ഷനും നല്കിയാണ് വിനീതിന്റെ വീഡിയോ.
71 വയസ്സുകാരനായ വിജയരാഘവനെ 100 വയസ് പ്രായത്തിലേക്ക് എത്തിക്കാനുള്ള മേക്കപ്പിനായി ചിത്രീകരണത്തില് പങ്കെടുത്ത ദിവസങ്ങളിലൊക്കെ നാലര മണിക്കൂറാണ് വേണ്ടിവന്നതെന്ന് അണിയറക്കാര് പറയുന്നുണ്ട്. 25 ദിവസമായിരുന്നു വിജയരാഘവന്റെ ഷൂട്ട്. മലയാള സിനിമ മേക്കപ്പ് ഉള്പ്പെടെയുള്ള മേഖലകളില് സമീപകാലത്ത് ആര്ജ്ജിച്ചിരിക്കുന്ന മികവിന്റെ അടയാളം കൂടിയാവുന്നു വിജയരാഘവന്റെ ഇട്ടൂപ്പ്. ബേസിൽ ജോസഫ്, വിനീത് ശ്രീനിവാസൻ, ജോണി ആന്റണി, അരുൺ കുര്യൻ, അനു ആന്റണി, റോഷൻ മാത്യു, ശരത് സഭ, അരുൺ അജിത് കുമാർ, അരിസ്റ്റോ സുരേഷ്, അമൽ രാജ്, കമൽ രാജ്, രാധ ഗോമതി, ഗംഗ മീര, കാവ്യ ദാസ്, നവ്യ ദാസ് തുടങ്ങിയവരാണ് ചിത്രത്തിലെ മറ്റു പ്രമുഖ താരങ്ങൾ.
