തമിഴകത്തിന്റെ തലയാണ് അജിത്ത്കുമാര്. വലിയൊരു ആരാധകവൃന്ദം തന്നെയുണ്ട് താരത്തിന്. തല അജിത്തുമായി ബന്ധപ്പെട്ട ഏതൊരു വാര്ത്തയും നിമിഷനേരം കൊണ്ടാണ് വൈറലാകുന്നത്. ഇപ്പോഴിതാ അജിത്തിന്റെ ആരാധകര്ക്ക് ഏറെ സന്തോഷമാകുന്ന ഒരു ചിത്രമാണ് സോഷ്യല് മീഡിയയില് ശ്രദ്ധിക്കപ്പെടുന്നത്. പത്ത് മാസം പ്രായമുള്ള കുഞ്ഞിനോടൊപ്പം തനിച്ച് യാത്ര ചെയ്യുകയായിരുന്ന യുവതിയുടെ ലഗേജ് ചുമന്ന് പുറത്തെത്തിച്ച അജിത്തിന്റെ ഹൃദയവിശാലതയാണ് വൈറലാകുന്നത്. ലണ്ടനില് നിന്നുള്ള താരത്തിന്റെ ചിത്രം യുവതിയുടെ ഭര്ത്താവ് കാര്ത്തിക് തന്നെയാണ് സോഷ്യല് മീഡിയയിലൂടെ പങ്കുവച്ചത്.
‘‘എന്റെ ഭാര്യ രാജി കാര്ത്തിക് ഗ്ലാസ്ഗോയില് നിന്ന് ചെന്നൈയിലേക്ക് പോവുകയായിരുന്നു. ഞങ്ങളുടെ 10 മാസം പ്രായമുള്ള കുഞ്ഞുമായി അവൾ തനിച്ചാണ് യാത്ര ചെയ്തത്. ലണ്ടൻ ഹീത്രൂവിൽ വെച്ച് അജിത്കുമാറിനെ കാണാൻ അവൾക്ക് അവസരം ലഭിച്ചു. ഒരു ക്യാബിൻ സ്യൂട്ട്കേസുമായിട്ടാണ് അവള് താരത്തെ കാണാനെത്തിയത്. ഒപ്പം ചിത്രമെടുക്കുക മാത്രമല്ല അദ്ദേഹം എന്റെ ഭാര്യയെ സഹായിക്കുകയും ചെയ്തു. ഭാര്യ നിരവധി തവണ വിലക്കിയെങ്കിലും ‘കുഴപ്പമില്ല . എനിക്ക് രണ്ട് കുട്ടികളുണ്ട്. അതിനാൽ അത് എങ്ങനെ അനുഭവപ്പെടുന്നുവെന്ന് എനിക്കറിയാം’ എന്നാണ് അദ്ദേഹം മറുപടി നല്കിയത്. ഫ്ലൈറ്റ് വരെ അദ്ദേഹമത് തന്റെ ക്യാബിൻ സ്യൂട്ട്കേസിനൊപ്പം കൊണ്ടുപോകുകയും ക്യാബിൻ ക്രൂവിന് നൽകുകയും ബാഗ് എന്റെ ഭാര്യയുടെ സീറ്റിൽ വെച്ചിട്ടുണ്ടെന്ന് ഉറപ്പാക്കുകയും ചെയ്തു. അദ്ദേഹത്തിനൊപ്പം യാത്ര ചെയ്തിരുന്ന മറ്റൊരാള് ‘തലൈവാ നീങ്ക എതുക്ക് , ഞാൻ കൊണ്ട് വരേൻ’ എന്ന് പറഞ്ഞപ്പോള് ‘കുഴപ്പമില്ല’ എന്നദ്ദേഹം മറുപടി പറഞ്ഞു. ഇന് ഷട്ടിൽ ബസിൽ യാത്ര ചെയ്യുന്നതിനിടയിൽ എന്റെ ഭാര്യ വീണ്ടും അദ്ദേഹത്തോടെ അവള് ലഗേജ് എടുക്കാമെന്നു പറഞ്ഞപ്പോള്, അദ്ദേഹമത് സൗമ്യമായി നിരസിച്ചു. അദ്ദേഹത്തിന്റെ വ്യക്തിത്വം എന്നെ ശരിക്കും അത്ഭുതപ്പെടുത്തുന്നു, ആ മനോഭാവത്തിൽ ഞാന് തികച്ചും വിനയാന്വിതനായി...’’ എന്നാണ് ചിത്രത്തിനൊപ്പം കാര്ത്തിക് കുറിച്ചത്.
ചിത്രം വൈറലായതോടെ ഇതൊരു പബ്ലിസിറ്റിക്ക് വേണ്ടി ചെയ്തതാണെന്ന് പലയിടത്തും വാര്ത്തകള് വരുന്നുണ്ട്. എന്നാലത് ശരിയല്ലെന്നും അദ്ദേഹത്തിന്റെ സത്യസന്ധമായ പെരുമാറ്റമായിരുന്നു അതെന്നും രാജി കാര്ത്തിക് കുറിച്ചിട്ടുണ്ട്.
‘‘അജിത്കുമാറിനെക്കുറിച്ചുള്ള എന്റെ ഭർത്താവിന്റെ കുറിപ്പ് അദ്ദേഹത്തിന്റെ പെരുമാറ്റത്തിന് നന്ദിയുള്ള പോസ്റ്റായിരുന്നു. അതൊരിക്കലും ഒരു പബ്ലിസിറ്റിയും ഉദ്ദേശിച്ചായിരുന്നില്ല. എന്നാൽ ചില മാധ്യമ ചാനലുകൾ ഈ ഫോട്ടോ എടുത്ത് ഞങ്ങളുടെ സമ്മതം ചോദിക്കാൻ മെനക്കെടാതെ അവരുടെ പേജിലും ചാനലിലും പോസ്റ്റ് ചെയ്തു. എകെ സാർ പോലും ഇത് പരസ്യമായി പോകുന്നത് ഇഷ്ടപ്പെടില്ലെന്നും ട്രെൻഡിംഗിനായി ഇത് ചെയ്തിട്ടില്ലെന്നും എനിക്ക് ഉറപ്പുണ്ട്. ദയവായി ഞങ്ങളുടെ സ്വകാര്യതയെയും അവന്റെ സ്വകാര്യതയെയും ബഹുമാനിക്കുക. ഇത് ഷെയർ ചെയ്യുന്നതും ഈ വാർത്ത ഒരു വാണിജ്യപരമാക്കുന്നതും നിർത്തുക.’’ എന്നാണ് രാജി കുറിച്ചത്.
