ന്യൂയോര്ക്ക്: അമേരിക്കയിലെ ചൈനയുടെ രഹസ്യപോലീസ് സ്റ്റേഷന് പൊളിച്ച എഫ്.ബി.ഐ. രണ്ടുപേരെ അറസ്റ്റ് ചെയ്തതായി റിപ്പോര്ട്ട്. ന്യൂയോര്ക്കിലായിരുന്നു ചൈന രഹസ്യപോലീസ് സ്റ്റേഷന് തുറക്കാന് പദ്ധതി സജ്ജമാക്കിയത്. യുഎസിലെ ചൈനീസ് വിമതരുടെ നീക്കങ്ങള് നിരീക്ഷിക്കാനും ആവശ്യമെങ്കില് അവരെ ഉപദ്രവിക്കാനും ആഹ്വാനം ചെയ്യുന്ന ഒരു പ്രചാരണത്തിന്റെ പേരില് ഡസന് കണക്കിന് ചൈനീസ് സുരക്ഷാ ഉദ്യോഗസ്ഥര്ക്കെതിരെ കുറ്റം ചുമത്തിയിട്ടുണ്ട്.
ലോകമെമ്പാടുമായി ഏറ്റവും കുറഞ്ഞത് 53 രാജ്യങ്ങളിലെങ്കിലും ഇത്തരം ഔട്ട്പോസ്റ്റുകള് ഉണ്ടെന്ന് സ്പെയിന് ആസ്ഥാനമായ സേഫ്ഗാര്ഡ് ഡിഫന്റേഴ്സ് എന്ന സംഘടന വെളിപ്പെടുത്തി മാസങ്ങള് പിന്നിടും മുമ്പാണ് ഈ റിപ്പോര്ട്ട് വന്നിരിക്കുന്നത്. ഹാരി ലു ജിയാന്വാംഗ് എന്ന 61 കാരനേയും ചെന് ജിംഗ്പിംഗ് എന്ന 59 കാരനേയുമാണ് അറസ്റ്റ് ചെയ്തിരിക്കുന്നത്. വിദേശത്ത് പോലീസ് പോസ്റ്റുകള് സ്ഥാപിക്കാനുള്ള ചൈനയുടെ രഹസ്യ ഓപ്പറേഷനുമായി ബന്ധപ്പെട്ട് ലോകത്തെവിടെയും നടക്കുന്ന ആദ്യത്തെ അറസ്റ്റാണിത്.
ചൈന നാഷണല് പോലീസ് ഫോഴ്സിന്റെയും പൊതുസുരക്ഷാ മന്ത്രാലയത്തിന്റെ ഫുഷു ബ്രാഞ്ചിന്റെയും സഹായത്തോടെ കഴിഞ്ഞ വര്ഷം മാന്ഹട്ടനിലെ ചൈനാടൗണിലാണ് അറസ്റ്റിലായ രണ്ടുപേര് ചേര്ന്ന് ഓഫീസ് സ്ഥാപിച്ചത്. ചൈനീസ് ഡ്രൈവിംഗ് ലൈസന്സ് റിന്യൂവല് എന്ന രീതിയിലായിരുന്നു ഓഫീസെന്ന് ന്യൂയോര്ക്ക് ബ്രൂക്ക്ലീനിലെ ഫെഡറല് പ്രോസിക്യൂട്ടര് ബ്രിയോന് പീസ് പറയുന്നു.
2022 സെപ്തംബര് മുതല് സ്പെയിനിലെ മനുഷ്യാവകാശ സംഘടന ഇക്കാര്യം പറഞ്ഞുകൊണ്ടിരിക്കുന്നതാണെന്നും ചൈനീസ് ഡ്രൈവിംഗ് ലൈസന്സ് പുതുക്കല് സേവനങ്ങള് എന്ന വ്യാജേനെ ഈ പോലീസ് സ്റ്റേഷനുകള് ചൈനീസ് വിമതരെ കണ്ടെത്തുന്ന ജോലിയാണ് ചെയ്തിരുന്നതെന്ന് അമേരിക്കന് അധികൃതര് പറഞ്ഞു. സമാന രീതിയിലുള്ള ചൈനയുടെ പോലീസ് സ്റ്റേഷനുകള് ക്യാനഡയും ചില യൂറോപ്യന് രാജ്യങ്ങളും പിടികൂടിയിരുന്നു. ക്രിമിനല് കുറ്റങ്ങള് നേരിടാന് നാട്ടിലേക്ക് മടങ്ങാന് ചൈനീസ് പൗരന്മാരെ സമ്മര്ദ്ദത്തിലാക്കുന്നതിലും ഇവര് ഏര്പ്പെട്ടിട്ടുള്ളതായി സംഘടന ആരോപിച്ചിരുന്നു. മോണ്ടിറിയാലിലെ ഔട്ട്പോസ്റ്റാണ് കാനഡ അടച്ചുപൂട്ടിയത്.
ആംസ്റ്റര്ഡാമിലും റോട്ടര്ഡാമിലും ചൈനീസ് പോലീസ് ഓപ്പറേഷന്സ് നടക്കുന്നതായുള്ള റിപ്പോര്ട്ടിന്റെ അടിസ്ഥാനത്തില് അന്വേഷണം നടന്നുവരുന്നതായി ഒക്ടോബറില് ഡച്ച് അധികൃതര് പറഞ്ഞിരുന്നു. അറസ്റ്റിലായിരിക്കുന്ന ലൂ വിനും ചെനിനും എതിരേ ചാരപ്രവര്ത്തനത്തിനാണ് കേസെടുത്തിരിക്കുന്നത്. ചൈനീസ് ഉദ്യോഗസ്ഥരുമായുള്ള ആശയവിനിമയം സംബന്ധിച്ച തെളിവുകള് നശിപ്പിച്ചതിനും ഇവര്ക്കെതിരേ കേസെടുത്തിട്ടുണ്ട്. ചൈനയുടെ പൊതുസുരക്ഷാ മന്ത്രാലയത്തിലെ 34 ഉദ്യോഗസ്ഥര്ക്ക് എതിരേയും കേസെടുത്തിട്ടുണ്ട്.
