ഹോളിവുഡില് മാത്രമല്ല ഇവിടെ മോളിവുഡിലും സൂപ്പര് ഹീറോ ചിത്രങ്ങള് ചെയ്യാന് സാധിക്കുമെന്ന് തെളിയിച്ച ചിത്രമായിരുന്നു മിന്നല് മുരളി. ബേസില് ജോസഫിന്റെ സംവിധാനത്തില് പിറന്ന ചിത്രം 2021 ലെ ക്രിസ്മ്സ് റിലീസായി എത്തി പ്രേക്ഷക ഹൃദയത്തില് സ്ഥാനമുറപ്പിക്കുകയായിരുന്നു.
മികച്ച പ്രതികരണം ചിത്രം സ്വന്തമാക്കിയിരുന്നു. അപ്പോള് മുതല് ഉയര്ന്ന് കേള്ക്കുന്ന ചോദ്യമായിരുന്നു മിന്നല് മുരളിയുടെ രണ്ടാം ഭാഗം വരുമോയെന്ന്.
ഈ ചോദ്യം ഇപ്പോള് വീണ്ടും ശക്തിയാര്ജിച്ചിരിക്കുകയാണ്. അതിന് കാരണമാവട്ടെ ചിത്രത്തിന്റെ നിര്മാതാവ് സോഫിയാ പോള് ഞായറാഴ്ച പോസ്റ്റ് ചെയ്ത ഇന്സ്റ്റാഗ്രാം സ്റ്റോറിയും.
മിന്നല് മുരളി എന്ന സൂപ്പര് ഹീറോയെ സൂചിപ്പിക്കുന്ന മ എന്ന അടയാളമുള്ള ചിത്രമാണ് സോഫിയ പോള് പോസ്റ്റ് ചെയ്തിരിക്കുന്നത്. മിന്നല് എന്ന ഹാഷ്ടാഗും രണ്ട് മിന്നല് ചിച്നങ്ങളും ചേര്ത്തിട്ടുണ്ട്. മിന്നല് മുരളിക്ക് രണ്ടാം ഭാഗം വരികയാണെങ്കില് വലിയ ക്യാന്വാസിലുള്ള ചിത്രമായിരിക്കുമെന്ന് മുമ്പ് ചിത്രത്തിന്റെ സംവിധായകന് ബേസിലും മറ്റ് അണിയറപ്രവര്ത്തകരും പറഞ്ഞിരുന്നു.
മിന്നല് മുരളി കേരളത്തിന് പുറമേ മറ്റ് സംസ്ഥാനങ്ങളിലും ശ്രദ്ധ നേടിയ ചിത്രമായിരുന്നു. ടൊവിനോ നായകനായി എത്തിയ ചിത്രത്തില് വില്ലനായി തകര്ത്താടി കൈയടി വാങ്ങിയത് ഗുരു സോമസുന്ദരമായിരുന്നു.ഫെമിന, ഷെല്ലി, സ്നേഹ ബാബു, അജു വര്ഗീസ്, ഹരിശ്രീ അശോകന്, ബൈജു സന്തോഷ് തുടങ്ങിയവരും ചിത്രത്തില് പ്രധാന കഥാപാത്രങ്ങളായി. വീക്കെന്ഡ് ബ്ലോക്ക്ബസ്റ്റേഴ്സിന്റെ ബാനറിലാണ് സോഫിയാ പോള് മിന്നല് മുരളി നിര്മിച്ചത്.
