പ്രണയത്തിലൂടെ ഒന്നായ സെലിബ്രിറ്റികളാണ് ശാലിനിയും അജിത്ത്കുമാറും. വെള്ളിത്തിരയില് തിളങ്ങി നില്ക്കുന്ന സമയത്താണ് ശാലിനി അജിത്തിനെ വിവാഹം കഴിച്ച് കുടുംബസ്ഥയായി ഒതുങ്ങിയത്. തല അജിത്തായി തമിഴകത്തിന്റെ മുന്നിര നായകനായി അജിത്തിപ്പോഴും നിറഞ്ഞു നില്ക്കുന്നുണ്ട്. തന്റെ കരിയറിന്റെ പീക്ക് ടൈമില് ഏറ്റവും കരുത്തായി നില്ക്കുന്നത് ശാലിനിയാണെന്ന് അജിത്ത് പലപ്പോഴും പറയാതെ പറഞ്ഞിട്ടുണ്ട്. തമിഴ് സിനിമാലോകത്ത് ഏറെ ആഘോഷിക്കപ്പെടുന്ന താരങ്ങള് കൂടിയാണിവര്. ഇവരുടെ വിശേഷങ്ങളറിയാന് ആരാധകര് എപ്പോഴും കാതോര്ക്കാറുണ്ട്. ഇപ്പോഴിതാ തങ്ങളുടെ ജീവിതയാത്ര തുടങ്ങിയിട്ട് 23 വര്ഷങ്ങള് പൂര്ത്തിയാകുന്നതിന്റെ സന്തോഷം സോഷ്യല് മീഡിയയിലൂടെ പങ്കിടുകയാണ് ശാലിനി. തന്റെ ഇൻസ്റ്റാഗ്രാം പേജിൽ വാർഷിക ആഘോഷങ്ങളിൽ നിന്നുള്ള മനോഹരമായ ഒരു ഫോട്ടോ പങ്കുവെച്ചാണ് ശാലിനി ആശംസ കുറിച്ചത്. വിവാഹ ആഘോഷങ്ങളിൽ നിന്നുള്ള ബ്ലാക്ക് ആൻഡ് വൈറ്റ് ഫോട്ടോയാണത്. കൈയിൽ കേക്ക് പിടിച്ച് അവർ പരസ്പരം കെട്ടിപ്പിടിക്കുന്നത് കാണാം. ‘‘23 വയസ്സ്...’’ എന്നാണ് ലവ് ഇമോജിക്കൊപ്പം ശാലിനി ചിത്രത്തിനൊപ്പം കുറിച്ചത്. സെലിബ്രിറ്റികളുടെയും ആരാധകരുടെയും ആശംസകളാൽ നിറഞ്ഞിരിക്കുകയാണ് ഇവരുടെ കമന്റ് ബോക്സുകള്. മനോഹരമായ ഫോട്ടോ ഇപ്പോൾ എല്ലാ സോഷ്യൽ പ്ലാറ്റ്ഫോമുകളിലും വൈറലാകുകയാണ്.
