ന്യൂഡല്ഹി: ഉപേക്ഷിച്ചു പോയ ഭര്ത്താവിന്റെ പേര് മകന്റെ പാസ്പോര്ട്ടില് നിന്നും നീക്കം ചെയ്യണമെന്ന് ആവശ്യപ്പെട്ട് മാതാവ് നടത്തിയ നിയമപോരാട്ടം വിജയം. പ്രായപൂര്ത്തിയാകാത്ത മകന്റെ ഉത്തരവാദിത്വം തനിക്ക് മാത്രമാണെന്നും കുട്ടിയുടെ പാസ്പോര്ട്ടില് നിന്നും പിതാവിന്റെ പേര് ചേര്ക്കാനുള്ള നിര്ബ്ബന്ധം അനുവദിക്കരുതെന്നുമുള്ള മാതാവിന്റെ വാദം കോടതി അംഗീകരിച്ചു.
കുട്ടി ജനിക്കും മുമ്പ് പിതാവ് കുട്ടിയെ ഉപേക്ഷിച്ചതാണെന്നും തനിച്ചാണ് കുട്ടിയെ വളര്ത്തിയതെന്നും മാതാവ് കോടതിയില് പറഞ്ഞു. തുടര്ന്ന് കുട്ടിയുടെ പാസ്പോര്ട്ടില് നിന്നും പിതാവിന്റെ പേര് പൂര്ണ്ണമായും നീക്കം ചെയ്ത് പിതാവിന്റെ പേര് ഇല്ലാതാക്കി പുതുക്കിയ പാസ്പോര്ട്ട് നല്കാനായിരുന്നു കോടതിയുടെ വിധി. പിതാവ് കുട്ടിയെ പൂര്ണ്ണമായും പരിത്യജിച്ചതാണെന്ന് ജസ്റ്റീസ് പ്രതിഭാ എം സിംഗ് നിരീക്ഷിച്ചു.
ചില പ്രത്യേക സാഹചര്യത്തില് ജൈവപിതാവിന്റെ പേര് ഡിലീറ്റ് ചെയ്ത് കുടുംബപ്പേരില് മാറ്റം വരുത്താന് കഴിയുമെന്ന് കോടതി വിലയിരുത്തി. പിതാവിന്റെ പേരില്ലാത്ത വിഷയങ്ങളില് സാഹചര്യം പരിശോധിച്ച് പാസ്പോര്ട്ടുകള് നല്കാമെന്നാണ് പാസ്പോര്ട്ട് മാനുവലും ഓഫീസ് മെമ്മോറാണ്ടവും പറയുന്നത്. ദാമ്പത്യം സംബന്ധിച്ച് അനേകം സാഹചര്യം മാതാപിതാക്കള്ക്കിടയില് ഉണ്ടാകാറുണ്ട്. കുട്ടിയുടെ പാസ്പോര്ട്ട് അപേക്ഷ നോക്കുമ്പോള് അധികൃതര് ഇത്തരം സാഹചര്യങ്ങള് കൂടി പരിഗണിക്കേണ്ടതുണ്ടെന്ന് കോടതി പറഞ്ഞു.
സിംഗിളായ അമ്മയും മകനും പിതാവിന്റെ പേര് മകന്റെ പാസ്പോര്ട്ടില് നിന്നും മാറ്റണമെന്ന് ആവശ്യപ്പെട്ട് ഹൈക്കോടതിയെയാണ് സമീപിച്ചത്. പിതാവിന്റെ പേര് കാണിക്കാതെ പുതിയ പാസ്പോര്ട്ട് നല്കണമെന്ന് ആയിരുന്നു മാതാവിന്റെ ആവശ്യം. പിതാവ് ഉപേക്ഷിച്ചു പോയതാണെന്നും താന് ഒറ്റയ്ക്കാണ് കുട്ടിയെ വളര്ത്തുന്നതെന്നും അതുകൊണ്ടു തന്നെ കുട്ടിയുടെ പിതാവിന്റെ സ്ഥാനത്ത് പേര് നല്കണമെന്ന ശാഠ്യം പാസ്പോര്ട്ട് അതോറിറ്റികള് ഒഴിവാക്കണമെന്നും ആവശ്യപ്പെട്ടു. ഏപ്രില് 10 നായിരുന്നു കോടതിവിധി പുറത്തുവന്നത്.
