ന്യൂഡല്ഹി: പാകിസ്ഥാന് സുന്ദരി ഒരുക്കിയ പ്രണയക്കെണിയില് വീണ് ഇന്ത്യയുടെ അതീവ രഹസ്യങ്ങള് ചോര്ത്തിക്കൊടുത്തു എന്ന ആരോപണത്തില് ഡിഫന്സ് റിസര്ച്ച് ആന്റ് ഡവലപ്മെന്റ് ഓര്ഗനൈസേഷന് (ഡിആര്ഡിഒ) ശാസ്ത്രജ്ഞനെ അറസ്റ്റ ചെയ്തു. 60 കാരനായ പ്രദീപ് കുരുല്ക്കര് എന്നയാളാണ് അറസ്റ്റിലായിരിക്കുന്നത്. ഇയാള് പാകിസ്താന് ഏജന്റിന് വിവരം കൈമാറിയെന്നാണ് ആരോപണം. മഹാരാഷ്ട്രയിലെ തീവ്രവാദ വിരുദ്ധ സ്ക്വാഡാണ് അറസ്റ്റ് ചെയ്തത്.
പാകിസ്താന് രഹസ്യാന്വേഷണ വിഭാഗത്തിന്റെ ഏജന്റുമായി ഇയാള് ബന്ധപ്പെട്ടതായിട്ടാണ് കണ്ടെത്തിയത്. പാക് സുന്ദരിയുടെ മധുരക്കെണിയില് വീണ് വാട്സാപ്പ്, വീഡിയോ കോള് വഴി ഇവരുമായി സംസാരിക്കുകയും നിര്ണ്ണായക വിവരങ്ങള് കൈമാറിയെന്നുമാണ് ആരോപണം. ഡിആര്ഡിഒ യില് റിസര്ച്ച് ആന്റ് ഡവലപ്മെന്റ് എസ്റ്റാബ്ളിഷ്മെന്റ് ഡയറക്ടറായിരുന്നു ഇയാള്.
ഡിആര്ഡിഒ യിലെ പ്രധാന ജോലികള് നിര്വ്വഹിക്കുന്ന വിഭാഗമാണ് ഇത്. മിസൈല് വികസനം അടക്കമുള്ള പ്രധാനപ്പെട്ട അനേകം ജോലികളില് ബന്ധപ്പെട്ടിട്ടുള്ളയാളാണ് കുറുല്ക്കര്. ഡിആര്ഡിഒ യുടെ പരാതിയില് ഇയാള്ക്കെതിരേ അന്വേഷണവും ആരംഭിച്ചിട്ടുണ്ട്. 'വേറിട്ട പ്രതിഭ' എന്നാണ് ഡിആര്ഡിഒ യുടെ വെബ്സൈറ്റില് കുരുല്ക്കറിനെ വിശേഷിപ്പിച്ചിരിക്കുന്നത്. ആകാശ് ഗ്രൗണ്ട് സിസ്റ്റംസിന്റെ സിസ്റ്റം മാനേജരും പ്രൊജക്ട് ലീഡറുമാണ് കുരുല്ക്കര്. ഈ നവംബറില് വിരമിക്കാന് ഇരിക്കുന്നതിനിടയിലാണ് കുരുല്ക്കര് കുരുക്കിലായിരിക്കുന്നത്.
സാമൂഹ്യമാധ്യമങ്ങളില് പോസ്റ്റ് ചെയ്തിട്ടുള്ള ഫോട്ടോയിലൂടെയാണ് കുരുല്ക്കറിനെ പാക് ചാരസുന്ദരി കുരുക്കിയത് തുടര്ന്ന് കഴിഞ്ഞ വര്ഷം സെപ്തംബര് ഒക്ടോബര് മാസങ്ങളില് വോയ്സ് മെസേജിലൂടെയും വീഡിയോ കോളിലൂടെയും ഇവരുമായി കുരുല്ക്കര് ബന്ധം ഉണ്ടാക്കുകയായിരുന്നു. ഇന്ത്യയുമായി ബന്ധപ്പെട്ട പല വിവരങ്ങളും ഇയാള് ഇവര്ക്ക് കൈമാറിയെന്നാണ് എടിഎസ് പറയുന്നത്. ബുധനാഴ്ചയായിരുന്നു കുരുല്ക്കറിനെ പോലീസ് കസ്റ്റഡിയില് എടുത്തത്. ഔദ്യോഗിക രേഖകളുമായി ബന്ധപ്പെട്ട വകുപ്പ് ചുമത്തിയാണ് കുരുല്ക്കറിനെ എടിഎസ് അറസ്റ്റ് ചെയ്തിട്ടുള്ളത്.
