കഴിഞ്ഞ ദിവസങ്ങളില് മാധ്യമങ്ങളില് നിറഞ്ഞു നില്ക്കുന്ന ഒരു പേരാണ് പി.ടി. ഉഷയുടേത്. ലൈംഗീക അതിക്രമം നടത്തിയ ദേശീയ ഗുസ്തി ഫെഡറേഷന് അധ്യക്ഷനും ബിജെപി എംപിയുമായ ബ്രിജ് ഭൂഷണ് സിങ്ങിനെതിരെ നടപടിയാവശ്യപ്പെട്ട് പ്രതിഷേധം നടത്തുന്ന ഗുസ്തി താരങ്ങളെ കുറിച്ചാണ് വിവാദപരമായി പി ടി ഉഷയുടെ പ്രസ്താവന നടത്തിയത്. ഇപ്പോഴിതാ ബ്രിജ്ഭൂഷൺ സിങ്ങിനെ അറസ്റ്റ് ചെയ്യണമെന്നാവശ്യപ്പെട്ട് സമരം ചെയ്യുന്ന താരങ്ങളെ കുറ്റപ്പെടുത്തിയും അവരെ വിമർശിച്ച പി.ടി ഉഷയെ പിന്തുണച്ചും നടിയും നേതാവുമായ ഖുഷ്ബു സുന്ദർ ട്വിറ്ററില് പോസ്റ്റിട്ടിരിക്കുകയാണ്.
‘‘ഉഷയുടെ വേദനയ്ക്കും കണ്ണുനീരിനും നിങ്ങൾക്ക് തിരിച്ചടി കിട്ടും’ എന്നു തുടങ്ങുന്ന ഖുശ്ബുവിന്റെ ട്വീറ്റ്. ‘അവരുടെ വേദന, അവരുടെ കണ്ണുനീർ.. അവർ ഇതൊന്നും അർഹിക്കുന്നേയില്ല. ഒരു ചാമ്പ്യന് ഒരു ബദൽ അഭിപ്രായം ഉണ്ടായിക്കൂടേ? കായികരംഗത്ത് സാങ്കേതികവിദ്യ ഒട്ടും വികാസം പ്രാപിക്കാതിരുന്ന, സർക്കാർ സഹായം തീരെ കുറവായിരുന്ന കാലത്ത് രാജ്യത്തിനായി നിരവധി നേട്ടങ്ങൾ കൊയ്തയാളാണ് അവർ. അവരെ തടഞ്ഞുനിർത്തി അവഹേളിക്കുന്നത് അപലപനീയമാണ്. നിങ്ങളുടെ ചെയ്തികൾ നിങ്ങളെ തന്നെ തിരിഞ്ഞുകൊത്തും. ഉടൻ തന്നെ’ എന്നാണ് താരം കുറിച്ചിരിക്കുന്നത്.
Her pain, her tears, she doesn’t deserve any of this. Can’t a champ have an alternate opinion? She has brought more laurels to the nation when sports technology was primitive and when government aid was minimal. Heckling her to the point of frustration is worthy of condemnation.… pic.twitter.com/ogswSMQNfI
— KhushbuSundar (@khushsundar) May 4, 2023
എന്നാല് നീതിയ്ക്കായി പോരാടുന്ന താരങ്ങള്ക്കൊപ്പം നില്ക്കാത്ത പി ടി ഉഷയെ പിന്തുണക്കരുതെന്നാണ് ചിലര് കമന്റ് ചെയ്യുന്നത്. താരങ്ങളുടെ ആവശ്യം മനസിലാക്കാതെ പി.ടി ഉഷയെ പിന്തുണച്ച് രംഗത്തെത്തിയ ഖുശ്ബുവിനെ വൻ പൊങ്കാലയാണ് ട്വീറ്റിനടിയിൽ നടക്കുന്നത്. പീഡകനെതിരെ ഒരക്ഷരം മിണ്ടാതെയും നീതി കിട്ടാത്തതിൽ പ്രതിഷേധിക്കുന്ന താരങ്ങളെ പിന്തുണയ്ക്കാതെയുമുള്ള ഖുശ്ബുവിന്റെ നിലപാടിനെതിരെ വിവിധ ഭാഷകളിൽ രൂക്ഷ വിമർശനമാണ് ആളുകൾ ഉയർത്തുന്നത്. ഉഷയ്ക്കെതിരെയും കമന്റിൽ വിമർശനമുണ്ട്. ‘ഇവർക്ക് മനഃസാക്ഷിയെ പറ്റി അറിയുമോ ?, ‘സ്ത്രീയായിട്ടും ഒരു പീഡന വീരനെ പിന്തുണയ്ക്കുന്ന നിങ്ങൾ പ്രതിഷേധിക്കുന്ന ഗുസ്തി താരങ്ങളെ ഭീഷണിപ്പെടുത്തുകയാണോ, ‘ഉഷയുടെ കണ്ണീരിനോട് പ്രതികരിച്ചാൽ നിങ്ങൾക്ക് രണ്ടു നാണയമെങ്കിലും കിട്ടുമായിരിക്കും. എന്നാൽ, ലൈംഗിക പീഡനത്തിന്റെ ഇരകളായ ആ ഗുസ്തി താരങ്ങൾക്കൊപ്പം നിന്നാൽ ഒന്നും കിട്ടില്ല. നിങ്ങൾ കപടനാട്യക്കാരിയായ ബിജെപിക്കാരി മാത്രമാണെന്ന് എല്ലാവർക്കുമറിയാം’ എന്നിങ്ങനെ രൂക്ഷ വിമര്ശനങ്ങള് പോസ്റ്റിനു താഴെ നിറയുന്നു.
ഗുസ്തി താരങ്ങളെ കുറ്റപ്പെടുത്തിയതിനു പിന്നാലെ വിമർശനം ശക്തമായതോടെ കഴിഞ്ഞദിവസമാണ് പി.ടി ഉഷ അവരെ സന്ദർശിക്കാനെത്തിയത്. എന്നാൽ ശക്തമായ പ്രതിഷേധമാണ് ഉഷയ്ക്കെതിരെ ഉണ്ടായത്. സമരപ്പന്തലിന് സമീപമുണ്ടായിരുന്ന സ്ത്രീകളും ഉഷയ്ക്കെതിരെ രൂക്ഷമായാണ് പ്രതികരിച്ചത്. സുരക്ഷാ ഉദ്യോഗസ്ഥരാണ് ഉഷയെ ആൾക്കൂട്ടത്തിൽ നിന്ന് രക്ഷപ്പെടുത്തിയത്. തെരുവിൽ സമരം ചെയ്യുന്ന ഗുസ്തി താരങ്ങൾ രാജ്യത്തിന്റെ പ്രതിച്ഛായയെ കളങ്കപ്പെടുത്തുകയാണെന്നായിരുന്നു ഉഷയുടെ വിമർശനം. താരങ്ങൾ പ്രതിഷേധിക്കുകയല്ല ഒളിമ്പിക് അസോസിയേഷനെ സമീപിക്കുകയാണ് വേണ്ടത് എന്നും ഉഷ അഭിപ്രായപ്പെട്ടിരുന്നു. ഇതിനെതിരെ വലിയ പ്രതിഷേധം ഉയർന്നതിനിടെയായിരുന്നു പി.ടി ഉഷയുടെ സന്ദർശനം. വിമർശനത്തിന് പിന്നാലെ, താരങ്ങളെ സന്ദർശിക്കാനെത്തിയ ഉഷയെ പ്രതിഷേധക്കാർ തടയുകയും ചോദ്യങ്ങൾ നേരിടാനാവാതെ അവർ തടിയൂരുകയും ചെയ്തിരുന്നു. ഈ സാഹചര്യത്തിലാണ് പി.ടി ഉഷയെ പിന്താങ്ങി ഖുശ്ബു രംഗത്തെത്തിയത്.
