പല തരം ഭക്ഷണ ശീലമുള്ളവരാണ് നാമെല്ലാവരും. മറ്റൊരാള്ക്ക് ഇഷ്ടമുള്ള ഭക്ഷണം ചിലപ്പോള് നമുക്ക് ഇഷ്ടമല്ലാത്തതാകാം. അതേ പോലെ നേരെ തിരിച്ചും. നമ്മള് ഇഷ്ടപ്പെട്ട് കഴിയ്ക്കുന്ന ഭക്ഷണം മറ്റൊരാള്ക്ക് ഇഷ്ടമല്ലാത്തതും ആകാം. എന്ത് തന്നെ ആയാലും ആര്ക്കും മറ്റൊരാളുടെ ഭക്ഷണസ്വാതന്ത്ര്യത്തില് ഇടപെടാന് അവകാശമില്ല.
ഇപ്പോള് സോഷ്യല് ഭക്ഷണവുമായി ബന്ധപ്പെട്ടുള്ള ഒരു കത്ത് ചര്ച്ച ആയിക്കൊണ്ടിരിയ്ക്കുകയാണ്. ഓസ്ട്രേലിയയില് നിന്നുള്ള ഒരു വീഗന് കുടുംബം അയല്ക്കാര്ക്ക് എഴുതിയ കത്താണ് ചര്ച്ചയാവുന്നത്. വലിയ അസഹിഷ്ണുതയാണ് കത്തെഴുതിയവര്ക്ക് എന്നാണ് സോഷ്യല് മീഡിയയില് മിക്കവരുടേയും അഭിപ്രായം.
കവറിലിട്ടാണ് കത്ത് അയല്ക്കാരന് അയച്ചിരിക്കുന്നത്. ഇത് ഗൗരവത്തില് എടുക്കണം എന്നാണ് കത്തിന്റെ മുകളില് എഴുതിയിരുന്നത്. കത്തില് പറയുന്നത്, താനും തന്റെ കുടുംബവും വീഗന് ഡയറ്റ് പിന്തുടരുന്നവരാണ്. അതുകൊണ്ട് തന്നെ നിങ്ങള് പാചകം ചെയ്യുമ്പോള് നിങ്ങളുടെ വീടിന്റെ ജനാലുകള് അടച്ചിടണം, 'സസ്യാഹാരങ്ങള് മാത്രം കഴിക്കുന്ന വീഗന് കുടുംബമാണ് ഞങ്ങളുടേത്. നിങ്ങള് പാകം ചെയ്യുന്ന മാംസത്തിന്റെ മണം ഞങ്ങള്ക്ക് ബുദ്ധിമുട്ടും അസ്വസ്ഥതയും ഉണ്ടാക്കുന്നു. എന്ന് സാറ, വെയ്നും കുട്ടികളും' എന്നു എഴുതി കത്ത് അവസാനിപ്പിച്ചിരിയ്ക്കുന്നത്. അധികം വൈകാതെ തന്നെ കത്ത് സോഷ്യല് മീഡിയയില് വൈറലായി.
ആദ്യം പെര്ത്തിലെ ആളുകള് മാത്രമുള്ളൊരു പേജിലാണ് കത്ത് പോസ്റ്റ് ചെയ്തത്. അതിനു പിന്നാലെ അത് ആ പേജില് നിന്നും നീക്കം ചെയ്തു. എങ്കിലും വളരെ വേഗം തന്നെ കത്ത് സോഷ്യല് മീഡിയയില് വൈറലായി. അതോടെ ആളുകള് ഇതിനെ പ്രതികൂലിച്ചും അനുകൂലിച്ചും രംഗത്തെത്തി. കത്തെഴുതിയവരുടെ അഭിപ്രായം മാനിക്കണം എന്നായിരുന്നു ഒരു കൂട്ടരുടെ അഭിപ്രായം. എന്നാല്, അതിനെ ശക്തമായി എതിര്ക്കുന്നവരും ഉണ്ടായിരുന്നു. അവരവരുടെ താല്പര്യമാണ് അവരുടെ വീട്ടില് എന്ത് പാകം ചെയ്യണം, എന്ത് കഴിയ്ക്കണം എന്നുള്ളത്. നിങ്ങള്ക്ക് മണം അസഹനീയമാണെങ്കില് നിങ്ങള് അവിടെ നിന്നും സ്ഥലം മാറി പോകുന്നതാണ് നല്ലത് എന്നാണ് വിമര്ശകര് പറയുന്നത്.
