മുംബൈ: ബോളിവുഡില് വളരെ കൃത്യനിഷ്ഠ പാലിക്കുന്ന നടനാണ് അമിതാഭ് ബച്ചന്. സമയത്ത് ഷൂട്ടിങ് ലൊക്കേഷനില് എത്തണമെന്നുളളത് അദ്ദേഹത്തിന് നിര്ബന്ധമാണ്. റിഭു ദാസ്ഗുപ്ത സംവിധാനം ചെയ്യുന്ന സെക്ഷന് 84 ന്റെ ഷൂട്ടിങ് ലൊക്കേഷനിലേക്ക് കഴിഞ്ഞ ദിവസം അമിതാഭ് ബച്ചന് വന്നത് ഒരു ബൈക്കിലാണ്. ട്രാഫിക്കില് പെട്ടുപോയ അദ്ദേഹത്തെ ഷൂട്ടിങ് ലൊക്കേഷനില് സമയത്ത് എത്തിച്ച അജ്ഞാതന് അദ്ദേഹം ഇന്സ്റ്റഗ്രാമിലൂടെ നന്ദിയും അറിയിച്ചു.
‘റൈഡിന് നന്ദി സഹോദരാ നിങ്ങള് ആരാണെന്ന് അറിയില്ല. എന്നെ കൃത്യസമയത്ത് ജോലിസ്ഥലത്തെത്തിച്ച നിങ്ങളോട് ഞാന് കടപ്പെട്ടിരിക്കുന്നു.’ എന്നായിരുന്നു അദ്ദേഹത്തിന്റെ കുറിപ്പ്. അജ്ഞാതനൊപ്പം ബൈക്കില് യാത്ര ചെയ്യുന്ന ചിത്രവും കുറിപ്പിനൊപ്പം താരം പങ്കുവെച്ചിട്ടുണ്ട്. തൊപ്പിവെച്ച് മഞ്ഞ ടീ ഷര്ട്ടും ഷോട്ട്സും ആയിരുന്നു ബൈക്കിലെ അജ്ഞാതന്റെ വേഷം.
ഇന്സ്റ്റഗ്രാം കുറിപ്പിന് താഴെ നിരവധി കമന്റുകളാണ് പ്രത്യക്ഷപ്പെട്ടത്. ഇത്രയും നേരം അദ്ദേഹത്തിന്റെ കൂടെ ബൈക്കില് യാത്ര ചെയ്തു. ഫോട്ടോയും എടുത്തു എന്നിട്ടും അദ്ദേഹത്തിന്റെ പേരു ചോദിക്കാതിരുന്നത് മോശമായിപ്പോയി എന്നായിരുന്നു അമിതാഭ്ബച്ചന്റെ ചെറുമകളുടെ കമന്റ്. അതേസമയം ഹെല്മെറ്റ് വെക്കാതെയാണ് ഇരുവരും ബൈക്കില് യാത്ര ചെയ്തിരിക്കുന്നതെന്ന് ആരാധകരില് പലരും ചൂണ്ടിക്കാട്ടി. തൊപ്പി പോരാ ഹെല്മെറ്റ് നിര്ബന്ധമെന്നായിരുന്നു ഒരാളുടെ കമന്റ്.
