കാസര്‍കോട് : കുഴല്‍പ്പണ കേസില്‍ പിടിയിലായ കാഞ്ഞങ്ങാട് സ്വദേശി 18 ലക്ഷം രൂപയോളം കൊണ്ടുപോയത് സ്‌കൂട്ടിയില്‍. കാഞ്ഞങ്ങാട് ഒഴിഞ്ഞവളപ്പ് സ്വദേശി കെ കെ ഇര്‍ഷാദ്( 33)ആണ് പിടിയിലായത്. നീലേശ്വരം മാര്‍ക്കറ്റില്‍ നടന്ന വാഹന പരിശോധനയിലാണ് കുടുങ്ങിയത്.
ഇയാള്‍ രേഖകളില്ലാതെ കടത്തിയത് 18.5 ലക്ഷം രൂപയുടെ 500 ന്റെ നോട്ടുകളായിരുന്നു. സഞ്ചരിച്ചിരുന്ന സ്‌കൂട്ടറിന്റെ സീറ്റിനടിയില്‍ അടുക്കി വെച്ച നിലയിലായിരുന്നു. പിടികൂടിയ പണവും പ്രതിയെയും നീലേശ്വരം പോലീസ് സ്റ്റേഷനില്‍ എത്തിച്ചു. ഉച്ചയോടെ ഹോസ്ദുര്‍ഗ് കോടതിയില്‍ ഹാജരാക്കും.
ജില്ലാ പോലീസ് മേധാവി ഡോക്ടര്‍ വൈഭവ് സക്‌സേനയുടെ നേതൃത്വത്തില്‍ നടപ്പാക്കി വരുന്ന ഓപ്പറേഷന്‍ കാസര്‍കോടിന്റെ രണ്ടാം ഘട്ടത്തിന്റെ ഭാഗമായി പരിശോധനകള്‍ ശക്തമാക്കിയിരിക്കുകയാണ്. കുഴല്‍പ്പണ - മയക്കുമരുന്ന് പരിശോധനകളാണ് നടക്കുന്നത്. ഏപ്രില്‍ 14നു നടത്തിയ പരിശോധനയില്‍ 67 ലക്ഷം രൂപ കുഴല്‍ പണം പിടികൂടിയിരുന്നു. നാലുപുരപ്പാട്ടില്‍ ഹാരിസ് എന്നയാളാണ് പിടിയിലായത്.
Comments