ക്രിക്കറ്റ് പ്രേമികളെ ആവേശത്തിലാഴ്ത്തുന്ന മത്സരമായി മാറുകയാണ് ഐപിഎല്. ഓരോ ടീമംഗങ്ങളും വളരെപ്പെട്ടെന്നാണ് ആരാധകര്ക്കിടയില് താരങ്ങളാകുന്നത്. നിര്ണായക മത്സരമായിരുന്നു ലഖ്നൗ സൂപ്പര് ജയന്റ്സും കൊല്ക്കത്ത നൈറ്റ് റൈഡേഴ്സും തമ്മിലുണ്ടായിരുന്നത്. എന്നാല് ലഖ്നൗ സൂപ്പര് ജയന്റ്സിനോട് തോല്വി വഴങ്ങിയതോടെയാണ് കൊല്ക്കത്ത നൈറ്റ് റൈഡേഴ്സിന്റെ പ്ലേ ഓഫ് പ്രതീക്ഷകള് അസ്തമിച്ചത്. ലഖ്നൗവിനെതിരായ മത്സരത്തില് 33 പന്തില് പുറത്താകാതെ 67 റണ്സുമായി റിങ്കു സിങ് കൊല്ക്കത്തയ്ക്ക് വേണ്ടി പൊരുതി നോക്കിയെങ്കിലും ആ പ്രയത്നങ്ങളൊന്നും ഫലം കണ്ടില്ല. പ്ലേ ഓഫില് കയറിയില്ലെങ്കിലും റിങ്കു സിങ്ങിനെ പോലെ വളരെ മികവുള്ള താരങ്ങള് ക്രിക്കറ്റ് പ്രേമികള്ക്ക് ആവേശമാകുന്നുണ്ട്. ഈ സീസണില് കൊല്ക്കത്തയ്ക്ക് വേണ്ടി 14 കളികളില് നിന്ന് 474 റണ്സാണ് റിങ്കു നേടിയിരിക്കുന്നത്. നിരവധി പേരാണ് റിങ്കുവിനെ പ്രശംസിച്ച് രംഗത്തെത്തിയിട്ടുണ്ട്. അതിനിടയില് റിങ്കു പങ്കുവച്ച ഒരു ചിത്രമാണ് സോഷ്യല് മീഡിയയില് വൈറലാകുന്നത്. കൊല്ക്കത്ത നായകന് നിതീഷ് റാണയുടെ ഭാര്യക്കൊപ്പമുള്ള ചിത്രമാണ് റിങ്കു സിങ് പങ്കുവച്ചത്. നിതീഷിന്റെ ഭാര്യ സാച്ചി മര്വ റാണയ്ക്കൊപ്പമുള്ള ചിത്രമാണ് റിങ്കു ഇന്സ്റ്റഗ്രാം സ്റ്റോറിയായി പങ്കുവെച്ചത്. റിങ്കുവിനൊപ്പമുള്ള ചിത്രം സാച്ചിയും ഇന്സ്റ്റഗ്രാമില് പങ്കുവെച്ചിട്ടുണ്ട്. റിങ്കുവിന്റെ തോളില് സാച്ചി കിടക്കുന്ന ചിത്രമാണ് ഇത്. നിമിഷനേരം കൊണ്ട് ചിത്രം വൈറലാകുകയും ആരാധകര് ഈ ചിത്രം ഏറ്റെടുക്കുകയും ചെയ്തിട്ടുണ്ട്. റിങ്കു സിങ്ങിന് ഇന്ത്യന് ടീമിലേക്ക് ഉടന് വിളി ലഭിക്കുമെന്നാണ് ആരാധകരുടെ പ്രതീക്ഷ.
