76-ാമത് കാന്സ് ഫിലിം ഫെസ്റ്റിവലിന്റെ ത്രില്ലിലാണിപ്പോള് സിനിമ ലോകവും ഫാഷന് ലോകവും. ഇന്ത്യയില് നിന്ന് നിരവധി സെലിബ്രിറ്റികളാണ് ഇത്തവണ കാന്സില് പങ്കെടുക്കുന്നത്. ഇപ്പോഴിത കാന്സ് ഫിലിം ഫെസ്റ്റവലിനേക്കുറിച്ച് ഒരു കുറിപ്പുമായെത്തിയിരിക്കുകയാണ് നടിയും സംവിധായികയുമായ നന്ദിത ദാസ്. ഇത് സിനിമയുടെ ഉത്സവമാണെന്ന കാര്യം ആളുകള് പലപ്പോഴും മറന്നു പോകുന്നുവെന്നാണ് നന്ദിത കുറിച്ചിരിക്കുന്നത്. ഇന്സ്റ്റഗ്രാം പോസ്റ്റിലൂടെയാണ് നന്ദിത കുറിപ്പ് പങ്കുവച്ചിരിക്കുന്നത്.
ഖേദകരമെന്ന് പറയട്ടേ, ഈ വര്ഷം കാന്സില് പങ്കെടുക്കാനായില്ല. ഇത് വസ്ത്രങ്ങളുടെ ഉത്സവമല്ല, സിനിമയുടെ ഉത്സവമാണെന്ന കാര്യം ചിലപ്പോഴൊക്കെ ആളുകള് മറന്നുപോകും. ഞാന് കണ്ട അതിശയകരമായ സിനിമകളോ ഞാന് നടത്തിയ സംഭാഷണങ്ങളോ നിങ്ങളെ കാണിക്കാനോ മാന്റോ അവിടെ പ്രീമിയര് ചെയ്ത സമയത്തിലേക്ക് നിങ്ങളെ തിരികെ കൊണ്ടുപോകാനോ കഴിയില്ല. ഏതാനും ചില വര്ഷങ്ങളിലെ എന്റെ ചിത്രങ്ങളിതാ.
കാനില് സാരി ധരിച്ച സെലിബ്രിറ്റികളെ' കുറിച്ച് സംസാരം ഉള്ളതിനാല് സാരിയിലുള്ളവ മാത്രം. തീര്ച്ചയായും ഇത് എന്റെ വസ്ത്രമാണ്. സിംപിള്, എലഗന്റ്, അതുപോലെ ഇന്ത്യന്. കുറഞ്ഞ പക്ഷം അത് ധരിക്കാനും അഴിച്ചു വയ്ക്കാനും എളുപ്പമാണ്. ഓരോ ചിത്രത്തിനും പിന്നില് രസകരമായ ഒരു കഥയുണ്ടെങ്കിലും അത് പങ്കുവയ്ക്കുക എന്നത് അത്ര എളുപ്പമല്ല. അതുകൊണ്ട് നിങ്ങള് കാണുന്ന ഫോട്ടോകളില് നിന്ന് നിങ്ങളുടെ സ്വന്തം സ്റ്റോറി ഉണ്ടാക്കാന് മടിക്കേണ്ടതില്ല. 2005, 20013, 2016-2018 വര്ഷങ്ങളില് നിന്നുള്ള ചിത്രങ്ങളാണ് ഇത്- എന്നാണ് നന്ദിത കുറിച്ചിരിക്കുന്നത്.
നിരവധി പേരാണ് നന്ദിതയുടെ പോസ്റ്റിന് താഴെ കമന്റുമായെത്തിയിരിക്കുന്നത്. 4 വര്ഷങ്ങളിലെ കാന് ചലച്ചിത്രമേളയില് നിന്നുളള ചിത്രങ്ങളാണ് നന്ദിത പങ്കുവെച്ചിരിക്കുന്നത്.
