ആര്ട്ടിഫിഷ്യലി ഇന്റലിജന്റ് ഏജന്റിന്റെ നിര്മ്മാണത്തിലാണ് ടെക്നോളജി മേഖല മികച്ച ശ്രദ്ധ കേന്ദ്രീകരിച്ചിരിക്കുന്നതെന്ന് മൈക്രോസോഫ്റ്റ് മേധാവി ബില് ഗേറ്റ്സ്. ഇന്റര്നെറ്റ് സെര്ച്ച് എന്ജീനുകളെ തന്നെ ഇതിന്റെ വരവ് ഇല്ലാതാക്കുമെന്ന് അദ്ദേഹം പറഞ്ഞു. പ്രൊഡക്ടിവിറ്റി മേഖലയേയും ഓണ്ലൈന് ഷോപ്പിങ്ങിനെയുമാകും പുതിയ ടെക്നോളജി ഏറ്റവും കൂടുതല് ബാധിക്കുക. ഇന്റര്നെറ്റില് വരാന് പോകുന്ന സുപ്രധാന മാറ്റങ്ങള് എഐ ഫോര്വേഡ് 2023 സമ്മേളനത്തില് സംസാരിക്കുകയായിരുന്നു ബില് ഗേറ്റ്സ്.
മസ്ക് നേരത്തെ കൊവിഡിന്റെ വരവിനെ കുറിച്ച് പ്രവചനം നടത്തി ശ്രദ്ധ നേടിയിരുന്നു. എഐ മത്സരത്തില് ഗൂഗിള്, ആപ്പിള്, മൈക്രോസോഫ്റ്റ്, ആമസോണ് എന്നിവ ഉള്പ്പെട്ടിട്ടുണ്ട്. എന്നാല് ഈ മത്സരത്തില് ജയിക്കുക കേട്ടുകേള്വി പോലുമില്ലാത്ത ഒരു സ്റ്റാര്ട്ടപ്പ് കമ്പനിയായിരിക്കുമെന്നും ഇതിനുള്ള സാധ്യത 50 ശതമാനത്തോളമാണെന്നും ഗേറ്റ്സ് പറഞ്ഞു. എഐയുടെ സഹായത്തോടെ പ്രവര്ത്തിക്കുന്ന മനുഷ്യാകാരമുള്ള റോബോട്ടുകള് വരും കാലങ്ങളില് എത്തുമെന്നും മനുഷ്യന് നല്കുന്ന പ്രതിഫലത്തെക്കാള് കുറച്ചു പണം ഇവയ്ക്കായി ചെലവഴിച്ചാല് മതിയാകുമെന്നും ഗേറ്റ്സ് പറഞ്ഞു.
നിലവില് ഉപയോക്താക്കള് വിവിധ ആവശ്യങ്ങള്ക്കായി വിവിധ വെബ്സൈറ്റുകളെയും സേവനങ്ങളെയുമാണ് ആശ്രയിക്കുന്നത്. എന്നാല് ഓരോരുത്തര്ക്കും സബ്സ്ക്രൈബ് ചെയ്യാനാകുന്ന വോയിസ് കമാന്ഡ് അല്ലെങ്കില് ടെക്സ്റ്റ് കമാന്ഡ് ഉപയോഗിച്ച് ഇടപെടാന് സഹായിക്കുന്ന പഴ്സനല് ഏജന്റ് എന്ന സങ്കല്പ്പമാണ് തന്റെ മനസിലുള്ളതെന്നും അദ്ദേഹം വ്യക്തമാക്കി. പഴ്സനല് ഏജന്റ് എന്ന സങ്കല്പ്പം മികച്ച രീതിയില് അവതരിപ്പിക്കാനാകുന്നവര്ക്കായിരിക്കും വിജയമെന്നും അദ്ദേഹം പറയുന്നു.
