ബാഴ്സിലോണ: സ്പാനിഷ് ലാലിഗയില് അവസാന മത്സരത്തിന് മുമ്പ് തന്നെ കിരീടം ഉറപ്പിച്ച ബാഴ്സിലോണയും അവരുടെ ഗോള്കീപ്പര് മാര്ക്ക് ആന്ദ്രേ ടെര് സ്റ്റീഗനും റെക്കോഡിനരികെ. ലാലിഗയില് ഗോള്വഴങ്ങാതെ 26 മത്സരങ്ങളാണ് ടെര്സ്റ്റീഗന് പൂര്ത്തിയാക്കുന്നത്. അടുത്ത മത്സരത്തില് സെല്റ്റാ വീഗോയ്ക്ക് എതിരേ കൂടി ഗോള് വഴങ്ങാതിരുന്നാല് താരം ക്ലീന്ഷീറ്റിന്റെ റെക്കോഡ് കുറിക്കും.
ഡിപ്പോര്ട്ടീവോ ലാ കൊരുണയുടെ 1993/94 സീസണില് അവരുടെ കീപ്പര് പാച്ചോ ലിയാനോ സ്പാനിഷ് ലീഗില് കുറിച്ച 26 ക്ലീന്ഷീറ്റ് എന്ന റെക്കോഡിന് ഒപ്പമെത്തിയിട്ടുണ്ട് ടെര് സ്റ്റീഗന്. ഒരു കളി കൂടി ബാക്കിയുള്ള ബാഴ്സിലോണയ്ക്കും അവരുടെ കീപ്പറിനും റെക്കോഡ് കുറിക്കാനുള്ള മത്സരമാണ് ഇത്. ഒരു സീസണില് ഏറ്റവും കൂടുതല് ക്ലീന്ഷീറ്റ് വരുന്ന കീപ്പര്ക്ക് നല്കാനുള്ള ഗോള്ഡന് ഗ്ളൗവിന് താരം ഈ സീസണില് അര്ഹനായേക്കും. ജൂണ് 4 നാണ് സെല്റ്റാ വീഗോയുമായുള്ള ബാഴ്സിലോണയുടെ ഈ സീസണിലെ അവസാന മത്സരം.
ഒരു സീസണില് ഏറ്റവും കൂടുതല് ക്ലീന്ഷീറ്റ് നേടിയ ഇംഗ്ളീഷ് പ്രീമിയര് ലീഗ് മുന് ചാംപ്യന്മാര് ചെല്സിയുടെ റെക്കോഡ് ബാഴ്സിലോണ മറികടന്നു. 2004/05 സീസണില് ജോസ് മൊറീഞ്ഞോ മാനേജരായിരിക്കെ ചെല്സി കീപ്പറായിരുന്ന പീറ്റര് ചെക്ക് 25 മത്സരത്തില് ക്ലീന്ഷീറ്റ് നേടിയിരുന്നു. ബാഴ്സിലോണ ഇപ്പോള് ഈ റെക്കോഡിന് ഒപ്പമെത്തിയിരിക്കുകയാണ്.
2014 ല് ജര്മ്മന്ക്ലബ്ബ് ബോറൂഷ്യ മോണ്ഷെന്ഗ്ളാഡ്ബാക്കില് നിന്നും ബാഴ്സിലോണയില് എത്തിയ ടെര്സ്റ്റീഗന് അന്നുമുതല് ബാഴ്സയുടെ ഏറ്റവും പ്രമുഖ താരങ്ങളില് ഒന്നാണ്. ബാഴ്സിലോണയ്ക്ക് വേണ്ടി 300 മത്സരങ്ങള് പൂര്ത്തിയാക്കിയ താരം അവര്ക്ക് വേണ്ടി ഏറ്റവും കൂടുതല് മത്സരങ്ങള് കളിച്ചിട്ടുള്ള അഞ്ച് വിദേശതാരങ്ങളില് ഒരാളാണ്. ഇതിനകം അഞ്ചു ലാലിഗ കീരിടവും ഒരു ചാംപ്യന്സ് ലീഗും അഞ്ചു കോപ്പാ ഡെല്റേയും ഒരു ക്ലബ്ബ് ലോകകപ്പും ഒരു യൂറോപ്യന് സൂപ്പര്കപ്പും മൂന്ന് സ്പാനിഷ് സൂപ്പര്കപ്പും നേടി.
അതേസമയം ജര്മ്മനിയ്ക്കൊപ്പം കാര്യമായി നേട്ടമുണ്ടാക്കാന് ടെര്സ്റ്റീഗനായിട്ടില്ല. 2017 ലെ കോണ്ഫെഡറേഷന് കപ്പും 2009 ല് നടന്ന യൂറോപ്യന് അണ്ടര് 17 ചാംപ്യന്ഷിപ്പും മാത്രമാണ് പേരിലുള്ളത്. 2018 ലും 2022 ലും ലോകകപ്പ് സ്ക്വാഡില് ഉണ്ടായിരുന്നെങ്കിലും ടീമിന് വേണ്ടി കാര്യമായി കളത്തിലിറങ്ങാന് താരത്തിനായിട്ടില്ല. മാനുവല് ന്യൂയറാണ് ജര്മ്മനിയുടെ ഒന്നാം നമ്പര് ഗോളി.
