പ്രയാഗ്രാജ്: ഓണ്ലൈന് ഗെയിം കളിക്കുന്നതില് മാതാപിതാക്കള് വഴക്കുപറഞ്ഞതിനെ തുടര്ന്ന് 13 കാരന് വീട്ടിലെ പണവും സ്വര്ണ്ണവും അപഹരിച്ച് മുങ്ങി. ഉത്തര്പ്രദേശിലെ കൗശമ്പി ജില്ലയില് നിന്നുള്ള 13 കാരനാണ് വീട്ടിലെ ലോക്കറില് സൂക്ഷിച്ചിരുന്ന അമ്മയുടെ സ്വര്ണ്ണവും വീട്ടില് സൂക്ഷിച്ചിരുന്ന പണവുമായി പോയത്. 10 ലക്ഷം രൂപയുടെ സ്വര്ണ്ണാഭരണങ്ങളും വീട്ടിലുണ്ടായിരുന്ന 40,000 രൂപയുമായിട്ടാണ് പയ്യന് പോയത്.
മാതാപിതാക്കളുടെ പരാതിയില് പയ്യനെ ബംഗലുരുവിലെ മാലൂര് വൈറ്റ്ഫീല്ഡ് റോഡില് നിന്നും പോലീസ് കണ്ടെത്തി. മണിക്കൂറുകള് നീളുന്ന ഓണ്ലൈന് ഗെയിമിംഗില് മാതാപിതാക്കള് വഴക്കു പറയുന്നെന്നും ഇത് ഒഴിവാക്കാനാണ് ഒളിച്ചോടിയതെന്നാണ് ചോദ്യം ചെയ്യലില് പയ്യന് പറഞ്ഞത്. ബംഗലരുവില് ഐടി നഗരത്തില് വെച്ച് അര്ദ്ധരാത്രിയിലാണ് യുപി പോലീസ് പയ്യനെ കണ്ടെത്തിയത്. റെയില്വേ സ്റ്റേഷനിലും മറ്റും അന്തിയുറങ്ങുകയും കയ്യിലിരുന്ന പണം എടുത്ത് ആഹാരം കഴിക്കുകയും ചെയ്യുന്നതായിരുന്നു രീതി.
കയ്യിലുണ്ടായിരുന്ന പണത്തില് നല്ലൊരു ഭാഗവും പയ്യന് തീര്ത്തിരുന്നു. എന്നാല് അമ്മയുടെ ആഭരണം ഉപയോഗിച്ചില്ല. മെയ് 13 നായിരുന്നു പയ്യനെ കാണാനില്ലെന്ന് പറഞ്ഞ് വീട്ടുകാര് കേസുകൊടുത്തത്. തട്ടിക്കൊണ്ടുപോകലിനാണ് പോലീസ് ആദ്യം കേസെടുത്തത്. പിന്നീട് സൈബര് സെല്ലിന്റെ സഹായത്തോടെയാണ് പോലീസുകാര് കുട്ടിയെ കണ്ടുപിടിച്ചത്. കുട്ടിയില് നിന്നും സ്വര്ണ്ണാഭരണങ്ങള്, മൊബൈല്ഫോണ്, ഒരു ടാബ് എന്നിവ പോലീസ് കണ്ടെത്തിയിട്ടുണ്ട്. മാതാപിതാക്കളെക്കാള് തനിക്ക് ഓണ്ലൈന് ഗെയിമിങ്ങാണ് പ്രിയമെന്നായിരുന്നു ചോദ്യം ചെയ്യലില് നല്കിയ മറുപടി.
