തിരുവനന്തപുരം: പണമുള്ളവരെ അടുത്ത് ഇരുത്തുന്ന രീതി കമ്യൂണിസ്റ്റുകാര്‍ക്ക് ചേര്‍ന്ന പരിപാടിയാണോയെന്ന് പരിഹസിച്ച് പ്രതിപക്ഷ നേതാവ് വി.ഡി. സതീശന്‍. ലോക കേരളസഭ യുഎസ് മേഖല സമ്മേളനത്തിലെ പണപിരിവിനെയാണ് പ്രതിപക്ഷ നേതാവ് വിമര്‍ശിച്ചത്. ഇത് നാണക്കേടാണെന്നും മുഖ്യമന്ത്രി ആ പരിപാടിയില്‍ പങ്കെടുക്കരുതെന്നും വി.ഡി. സതീശന്‍ ആവശ്യപ്പെട്ടു.
ഈമാസം 9 മുതൽ 11 വരെ ന്യൂയോർക്കിലാണ് സമ്മേളനം. പണമുള്ളവരെ അടുത്ത് ഇരുത്തുന്നതാണോ കമ്മ്യൂണിസ്റ്റ് രീതിയെന്നും ചോദിച്ച അദ്ദേഹം പ്രവാസികളെ പണത്തിന്റെ പേരില്‍ വേർതിരിക്കുകയാണെന്നും അനധികൃത പണപ്പിരിവിന് ആരാണ് അനുമതി നൽകിയതെന്നും ചോദിച്ചു. പണം ഇല്ലാത്തവർ മുഖ്യമന്ത്രിയുടെ അടുത്ത് വരേണ്ട എന്ന രീതി നാണക്കേടാണെന്നും പറഞ്ഞു. യുഎസിലെ സമ്മേളനത്തിനായി സംഘാടകസമിതി സ്പോണ്‍സര്‍ഷിപ്പ് നടപ്പാക്കുന്നതാണ് വിവാദമായിരിക്കുന്നത്. ഗോൾഡ്, സിൽവർ, ബ്രോൺസ് പാസുകളാണ് നിര്‍ദേശിക്കപ്പെട്ടിരിക്കുന്നത്.
ലോക കേരള സഭ സർക്കാർ സംരംഭമായ പരിപാടിയില്‍ ഗോൾഡ് പാസിന് ഒരുലക്ഷം ഡോളർ (ഏകദേശം 82 ലക്ഷം രൂപ), സിൽവറിന് 50,000 ഡോളർ (ഏകദേശം 41 ലക്ഷം രൂപ), ബ്രോൺസിന് 25,000 ഡോളർ (ഏകദേശം 20.5 ലക്ഷം രൂപ) എന്നിങ്ങനെയാണ് തുക. ഗോള്‍ഡന്‍ പാസ് നേടുന്നവര്‍ക്ക് മുഖ്യമന്ത്രിയുടെ അടുത്തിരിക്കാനും അദ്ദേഹത്തിനൊപ്പം ഡിന്നറിനും മറ്റും സൗകര്യങ്ങളാണ് വാഗ്ദാനം ചെയ്യപ്പെട്ടിരിക്കുന്നത്.
യുഎസിലെ സമ്മേളനത്തിനായി സർക്കാർ ഖജനാവിൽനിന്നു പണം എടുക്കുന്നില്ലെന്നാണ് നോര്‍ക്കയുടെ തലവന്‍ പി.ശ്രീരാമകൃഷ്ണൻ മാധ്യമങ്ങളോടു പറഞ്ഞത്. റജിസ്ട്രേഷൻ സൗജന്യമാണെന്നും പ്രതിനിധി സമ്മേളനത്തിൽ പങ്കെടുക്കാൻ പണം നൽകേണ്ടതില്ലെന്നും പറഞ്ഞു. സംഘാടക സമിതി പിരിക്കുന്ന പണവും ഓഡിറ്റ് ചെയ്യപ്പെടും. മുഖ്യമന്ത്രിയെ ആർക്കും കാണാം. അതിനു പണം മാനദണ്ഡമല്ല. പരസ്യം വിവാദമായ സാഹചര്യത്തിൽ എന്തെന്ന് അന്വേഷിക്കുമെന്നും ലോക കേരള സഭയെ വക്രീകരിച്ച് ദുർബലമാക്കാനാണ് ശ്രമമെന്നും പി.ശ്രീരാമകൃഷ്ണൻ പറഞ്ഞു.
Comments